2 Corinto 7:1-16
7 Djabarã, Ãcõrẽba dadjirãa maʉ̃gʉra jũma oyaɗa aɗa bẽrã naʉ̃ cacuaba cadjirua obarira, dadji crĩchaɗeba obari siɗa jũma igaraɗida panʉa. Ãcõrẽ bio waya panʉneba idji itea bia ɓeaɗida panʉa.
Paulo djabarã Corintoɗebema carea ɓʉsriɗaɗa
2 Soɗeba daira quĩrĩãnadua. Daiba ni aɓaʉda biẽ́ oɗaẽ́ panʉa, cadjiruada crĩchabiɗaẽ́ panʉa, cũrũgaɗaẽ́ panʉa.
3 Mʉ̃a maʉ̃gʉra jaraẽ́ ɓʉa bãrã biẽ́ jarai carea. Mʉ̃a naẽna jarasia daiba bãrãra soɗeba quĩrĩã panʉda. Idjaɓa mãwã quĩrĩã panania bãrã ume ãbaa panʉne wa beubʉdaɗe biɗa.
4 Mʉ̃a bãrãa ebuɗa beɗea ɓʉa cawa ɓʉ bẽrã jipa oɗida. Bãrã carea mʉ̃ra ɓʉsriɗa ɓʉa. Dai bia mĩga panʉne mʉ̃ra bãrã carea sobia ɓabaria idjaɓa bio ɓʉsriɗa ɓabaria.
5 Macedonia druaɗe jũẽsiɗaɗe daira poya ʉ̃nãũnaẽ́ panasiɗaa, ãtebʉrʉ ne jũmane bia mĩga panasiɗaa. Daira ne waya nĩbabadjiɗaa idjaɓa ẽberãrãra dai ume caicayabadjiɗaa.
6 Baribʉrʉ Tito jũẽsiɗe daira sobiasiɗaa Ãcõrẽba sopua ɓeara sobiabibari bẽrã.
7 Daira aɓabe idji jũẽna carea ɓʉsriɗaɗaẽ́ basía, ãtebʉrʉ bãrã carea ɓʉsriɗasiɗaa. Idjia jarasia bãrã ume ɓasiɗe bãrãba idjira sobiabisiɗada. Maʉ̃ awara nẽbʉrʉsia bãrãba daira unu quĩrĩã panʉda, cadjirua opeɗaɗa carea sopuaba jĩã panʉda, idjaɓa quĩrĩãneba mʉ̃ra crĩcha panʉda. Maʉ̃ carea mʉ̃ra biara ɓʉsriɗasia.
8 Mʉ̃a carta naẽna ɓʉɗaba bãrãra sopuabiɗamĩna mʉ̃ra sopuaẽ́ ɓʉa. Naãrã sopua ɓasia. Cawasia bãrãra dãrã sopuaẽ́ pananamĩna maʉ̃ cartaɗeba bãrãra sopuabisida.
9 Baribʉrʉ iɗira mʉ̃ra ɓʉsriɗa ɓʉa. Ɓʉsriɗa ɓʉẽ́a bãrãra sopuabiɗa bẽrã, ãtebʉrʉ ɓʉsriɗa ɓʉa bãrãba cadjirua o pananara sopuaɗeba igaraɗapeɗa wayacusa Ãcõrẽmaa zesiɗa bẽrã. Wãrãda Ãcõrẽba quĩrĩã ɓʉ quĩrãca bãrãra sopuasiɗaa. Mãwã daiba quẽãpeɗaɗa carea bãrãra biẽ́ ɓeaɗaẽ́ basía.
10 Aɓaʉba cadjirua oɗa carea Ãcõrẽba quĩrĩã ɓʉ quĩrãca sopuaibʉrʉ, idjia cadjirua oɗara igarapeɗa Ãcõrẽmaa zeya. Maʉ̃be Ãcõrẽba idjira ẽdrʉ edaya. Ãcõrẽ ume bia ɓeɗa bẽrã maʉ̃ sopuaɗebemada biẽ́ crĩchacaa. Baribʉrʉ aɓaʉda naʉ̃ ẽjũãnebemarã sopuabada quĩrãca sopuaibʉrʉ, cadjiruara igaraẽ́ bẽrã beuya.
11 Ãcõrẽba quĩrĩã ɓʉ quĩrãca bãrãra sopuasiɗa bẽrã maʉ̃ sopuaba bãrãa jipa crĩchabisia idjaɓa jipaara obisia. Maʉ̃ bẽrã bãrãba jipa o panʉda jũmarãa cawabi quĩrĩã panʉa. Djababa cadjirua oɗa carea bãrãra quĩrũsiɗaa idjaɓa Ãcõrẽba cawa oiɗebemada wayasiɗaa. Maʉ̃ carea ara maʉ̃da dji cadjirua oɗa ẽberãda quẽãnapeɗa ãĩ ɓʉsiɗaa. Ne jũmaneba bãrãba unubisiɗaa maʉ̃ cadjirua oɗa carea beɗeaɗe panʉẽ́da. Maʉ̃ awara mʉ̃ra unu quĩrĩã panʉa.
12 Mʉ̃a maʉ̃ cartara aɓabe dji cadjirua oɗa ẽberãa quẽãi carea ɓʉẽ́ basía. Idjaɓa dji biẽ́ ɓeɗa ẽberã carebai carea ɓʉẽ́ basía. Ãtebʉrʉ ɓʉsia bãrãba ĩjã o panʉneba Ãcõrẽ quĩrãpita cawaɗamãrẽã wãrãda daiare panʉda.
13 Jũma maʉ̃gʉba daira sobiabisia.
Maʉ̃ awara bãrãba Titora ɓʉsriɗabisiɗaa. Idjira bãrãmaʉba ɓʉsriɗa zeɗa bẽrã daira biara ɓʉsriɗasiɗaa.
14 Tito bãrãmaa wãi naẽna mʉ̃a bãrãnebemada idjía bia jarasia. Mʉ̃a jaraɗa quĩrãca Titoba unune wãna bẽrã mʉ̃ra bãrã carea quĩrã peraẽ́ ɓʉa. Jũma daiba bãrãa jaradiapeɗaɗara wãrã basía. Ara maʉ̃ quĩrãca jũma daiba Titoa bãrãnebema bia jarapeɗaɗara wãrã basía.
15 Titoba quĩrãneba ɓabaria bãrãba idji beɗeara ĩjã osiɗada idjaɓa waya panʉneba idjira bia edasiɗada. Maʉ̃ bẽrã bãrãra biara quĩrĩã ɓʉa.
16 Iɗira mʉ̃ siɗa ɓʉsriɗa ɓʉa. Mʉ̃a cawa ɓʉa bãrãba wãrãda jipa o pananida.
