2 Corinto 8:1-24
8 Maʉ̃ awara djabarã, daiba cawabi quĩrĩã panʉa Ãcõrẽba idji biaɗeba djabarã Macedonia druaɗebemada careba ɓʉda.
2 Ãdjirãra bio bia mĩga panʉmĩna ɓʉsriɗa panʉa. Ne neẽ́ panʉmĩna ɓʉsriɗaba Ãcõrẽa paratada waiɓʉa diasiɗaa.
3 Mʉ̃a jaraya: ãdjia poya diabʉda quĩrãca sobiaɗeba diasiɗaa. Idjaɓa ãdjia poya diaɗida panana auɗu diasiɗaa.
4 Ãdjirãba daia bio beɗea djuburiasiɗaa ãdjia biɗa djabarã Jerusaleʉ̃nebemada carebaɗi carea.
5 Maʉ̃ne ãdjia aɓabe daiba crĩcha panana quĩrãca oɗaẽ́ basía. Ãtebʉrʉ naãrã ara ãdjida diasiɗaa dadjirã Boro Jesucritoba quĩrĩã ɓʉ quĩrãca oɗi carea. Maʉ̃are daiba jarapeɗaɗara osiɗaa. Mãwã Ãcõrẽba quĩrĩã ɓʉ quĩrãca ariɗe osiɗaa.
6 Djaba Titoba naãrã bãrãa crĩchada diasia bãrã biɗa paratada djabarã Jerusaleʉ̃nebema itea jʉrʉ peɗamãrẽã. Maʉ̃ carea daiba Titoa beɗea djuburiasiɗaa bãrãa jaraɗe wãmãrẽã jũma bãrãba sobiaɗeba diaɗiaɗa apeɗaɗara wãrãda jʉrʉ peɗamãrẽã.
7 Bãrãba ne jũmane bio bia o panʉa; Jesura bio ĩjã panʉa, bio beɗea cawa panʉa, Ãcõrẽneba bio ne cawa panʉa, Ãcõrẽba quĩrĩã ɓʉ quĩrãca bio o quĩrĩã panʉa, idjaɓa daira bio quĩrĩã panʉa. Maʉ̃ bẽrã bãrãba sobiaɗeba parata jʉrʉ pe panʉra waiɓʉa diaɗadua.
8 Mʉ̃a maʉ̃gʉra õgo obiẽ́ ɓʉa, ãtebʉrʉ mʉ̃a quĩrĩã ɓʉa bãrãba acʉbiɗida djabarã wãrãda quĩrĩã panʉda. Maʉ̃ carea mʉ̃a bãrãa cawabi ɓʉa sãwã dewararãba paratara djabarã Jerusaleʉ̃nebema itea jʉrʉ pe panʉda. Bãrã biɗa ara maʉ̃ quĩrãca oɗibʉrʉ, acʉbiɗia wãrãda djabarãra quĩrĩã panʉda.
9 Bãrãba bio cawa panʉa dadjirã Boro Jesucritoba idji biaɗeba bãrã carea oɗada. Idjira bajãne ne jũma bara ɓʉmĩna, bãrã carea naʉ̃ djaraɗe ne neẽ́ ɓʉ quĩrãca ɓasia bãrãba ne jũma Ãcõrẽba dia ɓʉɗebemada eroɓeaɗamãrẽã.
10 Bãrãba parata jʉrʉ pe panʉnebemada mʉ̃a jaraya. Mʉ̃maarã bãrãba nãwã oɗibʉrʉ bia panania: za wãsi poaɗe bãrãbʉrʉ naãrã jʉwa osiɗaa parata jʉrʉ peɗi carea idjaɓa maʉ̃gʉra o quĩrĩãsiɗaa.
11 Bãrãba naãrã parata jʉrʉ pe panasiɗaɗe sobiaɗeba mãwã o panasiɗaa. Ara maʉ̃ quĩrãca bãrãba sobiaɗeba diaɗiaɗa apeɗaɗara jũma daucha diaɗadua. Bãdjiza poya diabʉda quĩrãca diaɗadua.
12 Wãrãda aɓaʉba poya diabʉrʉ quĩrãca sobiaɗeba diaibʉrʉ, maʉ̃ diaɗara Ãcõrẽba bia unuya. Dadjia neẽ́ ɓʉbʉrʉ, Ãcõrẽba diabicaa.
13 Mʉ̃a mãwã jaraẽ́ ɓʉa dewararã careba panʉneba bãrãra bia mĩgaɗamãrẽã. Ãtebʉrʉ mʉ̃a quĩrĩã ɓʉa aɓarica dji carebaɗida.*
14 Mʉ̃a jara ɓʉa iɗira bãrãba aɗuba eropanʉ bẽrã djabarãra carebaɗida panʉda. Ara maʉ̃ quĩrãca bãrã ne neẽ́ panʉne ãdjirãba aɗuba eropanʉba bãrãra carebaɗida panʉa. Mãwã jũmarãda aɓarica dji careba ɓeaɗia.
15 Ãcõrẽ Beɗeaɗe nãwã jara ɓʉa: “Dji waitabeara jʉrʉ peɗaba aɗuba eroɓaẽ́ basía idjaɓa dji maãrĩara jʉrʉ peɗaba cʉrebaeẽ́ basía.”*
Pauloba Tito Corintoɗaa diabueɗa
16 Mʉ̃a Ãcõrẽa bia ɓʉaɗa abaria. Idjia djaba Tito soɗe ɓʉsia bãrãra quĩrĩã ɓamãrẽã mʉ̃a bãrã quĩrĩã ɓʉ quĩrãca.
17 Daiba idjía jarasiɗaa bãrã acʉɗe wãmãrẽã. Maʉ̃ne idjia bia ɓʉaɗa asia. Idjira wãrãda bãrã acʉɗe wã quĩrĩã ɓʉa.
18 Idji ume daiba djabada aɓa diabuebʉdaa. Maʉ̃ djababa beɗea bia Critoɗebemada careba jaradia nĩbabari bẽrã djabarã puruzabemaba idjira bia jarabadaa.
19 Maʉ̃ awara djabarã puruzabemaba idjira edasiɗaa dai ume parata djabarã itea jʉrʉ pepeɗaɗa Jerusaleʉ̃naa diaɗe wãmãrẽã. Maʉ̃gʉra daiba o panʉa djabarãba dadjirã Boroa bia beɗeaɗamãrẽã idjaɓa daiba wãrãda careba quĩrĩã panʉda acʉbiɗi carea.*
20 Daiba quĩrãcuita o panʉa maʉ̃ parata waiɓʉa jʉrʉ pepeɗaɗa edebʉdaɗe ni aɓaʉba biẽ́ jararãnamãrẽã.
21 Wãrãda daiba Ãcõrẽ quĩrãpita, ẽberãrã quĩrãpita biɗa jipa o quĩrĩã panʉa.
22 Umébema djabarã bãrãmaa wãbʉdaɗe dewara djabada ãdji ume diabueɗia. Maʉ̃ djababa ɓarima zocãrã daia unubisia djabarãra bio careba quĩrĩã ɓʉda. Iɗira bãrãra biara careba quĩrĩã ɓʉa bãrãba jipa oɗida cawa ɓʉ bẽrã.
23 Bariduaba Titoɗebemada iwiɗisiɗara jaraɗadua idjira mʉ̃ ume nĩbabarida idjaɓa mʉ̃ ume bãrã tãẽna Ãcõrẽ trajura o ɓʉda. Bariduaba dewara djabarãnebemada iwiɗisiɗara jaraɗadua ãdjira djabarãba diabuepeɗaɗarãda idjaɓa ãdji carea ẽberãrãba Critoɗebemada bia beɗea panʉda.
24 Maʉ̃ djabarãa unubiɗadua bãrãba ãdjira wãrãda quĩrĩã panʉda. Mãwã ãdjia cawaɗia daiba bãrãnebema bia jarapeɗaɗara wãrã basida. Maʉ̃ne djabarã ɓeaza biɗa ara maʉ̃ quĩrãca cawaɗia.
