2 Corinto 9:1-15
9 Bãrãba djabarã Jerusaleʉ̃nebema itea parata jʉrʉ pe panʉnebemada mʉ̃a naʉ̃ cartaɗe waa ɓʉiẽ́ ɓʉa.
2 Mʉ̃a cawa ɓʉa bãrãba careba quĩrĩã panʉda. Maʉ̃ carea nama Macedonia druaɗe mʉ̃a djabarãa bãrãnebemada bia beɗeabaria. Mʉ̃a ãdjirãa jarabaria poa aɓa ɓabʉrʉda bãrã Acaya druaɗe panʉba carebaɗi carea panʉda. Mãwã ũrĩpeɗaɗa bẽrã zocãrã djabarã Macedonianebemaba aɓari quĩrãca careba quĩrĩã panʉa.
3 Maʉ̃ carea mʉ̃a naʉ̃ djabarãda bãrãmaa diabuebʉrʉa bãrãba diaɗiaɗa apeɗaɗara wãrãda jũma jʉrʉ peɗamãrẽã. Mãwã mʉ̃a bãrãnebema bia jaraɗara sewa baẽ́a, ãtebʉrʉ bãrãba wãrãda diaɗi carea panania.
4 Mãwã oɗaẽ́bʉrʉ, ʉ̃cʉrʉ Macedonianebema djabarã mʉ̃ ume bãrãmaa wãbʉdaɗe ãĩbẽrã ununisicada bãrãba paratara jʉrʉ peɗaẽ́ panʉda. Mãwãra daira quĩrã peraɗia, crĩcha panana bẽrã bãrãba wãrãda jʉrʉ peɗida. Idjaɓa bãrã siɗa biara quĩrã peraɗia.
5 Maʉ̃ carea mʉ̃a naʉ̃ djabarãa beɗea djuburiasia mʉ̃ na bãrãa jaraɗe wãnamãrẽã bãrãba sobiaɗeba diaɗiaɗa apeɗaɗara jũma jʉrʉ peɗamãrẽã. Mãwã mʉ̃ jũẽbʉrʉɗe bãrãba sobiaɗeba diaɗiaɗa apeɗaɗara jũma eropanania. Maʉ̃ba cawabiɗia daiba õgo diabiɗaẽ́ panʉda ãtebʉrʉ bãrãba sobiaɗeba diasiɗada.
6 Naʉ̃da quĩrãnebaɗadua: “Maãrĩ ubʉrʉba maãrĩ ewaya. Waiɓʉa ubʉrʉba waiɓʉa ewaya.”
7 Ẽberãza diaida ɓʉa idji soɗe crĩcha ɓʉ quĩrãca. Dia amaaneba diaiẽ́ ɓʉa, idjaɓa õgo diabi panʉ carea diaiẽ́ ɓʉa. Ɓʉsriɗa dia ɓʉra Ãcõrẽba quĩrĩã ɓʉa.
8 Wãrãda Ãcõrẽba ne jũmada bãrãa aɗuba poya diaya. Mãwã ewariza ne jũmane bãrãba eroɓeaɗida panʉda wãrãda eropanania maʉ̃neba ne jũma biada oɗi carea.
9 Ãcõrẽ Beɗeaɗe nãwã ɓʉ́ ɓʉa:
Idjia jeɗecasiɗe ne neẽ́ queɗeaa waiɓʉa diasia. Ewariza idjia jipa obaria.*
10 Ãcõrẽba netada diabaria uɗamãrẽã. Coɗi careabema siɗa diabaria. Neta uɗamãrẽã aɗuba diabʉrʉ quĩrãca idjia ne jũmada aɗuba bãrãa diaya djãrãra bio carebaɗamãrẽã. Maʉ̃ne jipa o panʉneba ne biada zocãrã ununia ne uɗa bio zau ɓʉ quĩrãca.
11 Wãrãda Ãcõrẽba bãrãa ne jũmada aɗuba diaya djãrãra sobiaɗeba poya carebaɗamãrẽã. Maʉ̃be bãrãba dai ume parata diabuebʉda carea djabarãba Ãcõrẽa bia ɓʉaɗa aɗia.
12 Bãrãba parata diabʉdaba aɓabe carebaẽ́a djabarã ne neẽ́ panʉba eroɓeaɗamãrẽã, ãtebʉrʉ maʉ̃gʉ carea djabarãba Ãcõrẽa bio bia ɓʉaɗa a panania.
13 Bãrãba careba panʉneba unubi panʉa beɗea bia Critoɗebemada wãrãda ĩjã panʉda. Maʉ̃ bẽrã ãdjirãba Ãcõrẽa bia beɗeaɗia. Maʉ̃ awara Ãcõrẽa bia beɗeaɗia bãrãba sobiaɗeba ãdjirã itea diapeɗaɗa carea idjaɓa dewararã siɗa sobiaɗeba carebabada bẽrã.
14 Ãcõrẽba idji biaɗeba bãrãra bio carebasia ãdjirã carebaɗamãrẽã. Maʉ̃ bẽrã ãdjirãba bãrã bio quĩrĩã panʉneba Ãcõrẽa bãrã carea iwiɗi panania.
15 Wãrãda Ãcõrẽba diaɗa carea dadjirãba Ãcõrẽa bia ɓʉaɗa aɗida panʉa. Maʉ̃ diaɗara jãcua bio biya quiru bẽrã dadjirãba poya cawa jaraɗaẽ́a sãwã ɓʉda.
Beɗea eɗaare
^ 9:9. Salmo 112:9.
