2 Cronica 1:1-17
1 Davi warra Salomoʉ̃ba israelerãra bia pe eroɓesia Ãcõrẽra idji ume ɓʉ bẽrã idjaɓa bio dji dromada ɓʉɗa bẽrã.
2 Ewari aɓa Salomoʉ̃ba israelerãra jũma trʉ̃cuasia: idji sordaorã bororãda, nẽbʉra cawa obadarãda, dji dromarãda, dji drõãrã siɗa.*
3 Jũẽpeɗaɗacarea Salomoʉ̃ra jũma ãdjirã siɗa Gabaoʉ̃ puru caita ɓʉ eyaɗaa wãsiɗaa Ãcõrẽ wua deda mama ɓʉ bẽrã. Maʉ̃ wua dera Ãcõrẽ nezoca Moiseba ẽjũã põãsa ewaraga ɓʉɗe obiɗa basía.
4 Baribʉrʉ Salomoʉ̃ ewariɗe Ãcõrẽ baurudera maʉ̃ deɗe ɓaẽ́ basía, Daviba Quiriat-jeariʉ̃ puruɗeba Jerusaleʉ̃ puruɗaa edeɗa bẽrã. Mama idjia obiɗa wua deɗe eɗa waga ɓʉsia.
5 Baribʉrʉ animarã babue diabada bronce oɗada waɗibiɗa Ãcõrẽ wua de quĩrãpe ɓasia Gabaoʉ̃ puru caita. Maʉ̃ra Uri warra Bezaleelba oɗa basía.* Bezaleelera Hur wiuzaque basía. Salomoʉ̃ra, idjia trʉ̃cuaɗa ẽberãrã siɗa mamaa wãsiɗaa Ãcõrẽa iwiɗiɗi carea.
6 Mama Ãcõrẽ wua de quĩrãpe Salomoʉ̃ra animarã babue diabada bronce oɗa caita wãpeɗa Ãcõrẽa animarãda mil babue diacuasia.
7 Maʉ̃ diamasi Ãcõrẽra Salomoʉ̃ma odjapeɗa nãwã jarasia:
–Bʉa quĩrĩã ɓʉda mʉ̃́a iwiɗidua.–
8 Salomoʉ̃ba panusia:
–Bʉa mʉ̃ zeza Davira quĩrĩãneba bio carebabadjia. Maʉ̃be bʉa mʉ̃ra idji cacuabari israelerã boroda ɓʉsia.
9 Mʉ̃ Boro Ãcõrẽ, bʉa mʉ̃ zeza Davia jaraɗa quĩrãca odua. Bʉa mʉ̃ra israelerã boroda ɓʉsia. Baribʉrʉ ãdjirãra zocãrã panʉa ĩbʉ quĩrãca.
10 Maʉ̃ bẽrã necawaada, crĩcha cawaa siɗa mʉ̃́a diadua israelerãra bia pe eroɓai carea. Bʉa carebaẽ́bʉrʉ ni aɓaʉba bʉ ẽberãrã zocãrã panʉra poya bia pe eroɓaẽ́a.–
11 1:11-12 Maʉ̃ne Ãcõrẽba jarasia:
–Mʉ̃a bʉra mʉ̃ ẽberãrã boroda ɓʉsia. Maʉ̃ne bʉa aɓabe necawaada, crĩcha cawaa siɗa iwiɗisia ãdjirã bia pe eroɓai carea. Soɗeba maʉ̃da quĩrĩã ɓʉ bẽrã mʉ̃a necawaada, crĩcha cawaa siɗa bʉ́a diaya. Maʉ̃ awara bʉa parata waiɓʉada, ne jũma eroɓaida, bio dji droma baida, dãrã zocai ɓai siɗa iwiɗiɗaẽ́mĩna mʉ̃a diaya. Maʉ̃ awara bʉ dji quĩrũda beuɗamãrẽã iwiɗiɗaẽ́mĩna mʉ̃a bʉra ãdjiɗebemada wagaya. Bʉa eroɓai quĩrãca ni aɓaʉ boro bʉ naẽna ɓaɗaba neẽ́ ɓasia idjaɓa ni aɓaʉ boro bʉare zebʉrʉ biɗa eroɓaẽ́a.–
13 Maʉ̃be Gabaoʉ̃ puru caita ɓʉ eyaɗeba Ãcõrẽ wua de ɓʉmaʉba Salomoʉ̃ra Jerusaleʉ̃naa jẽda wãpeɗa jũma israelerãra pe eroɓesia.
Salomoʉ̃ba cawayo, carreta siɗa jʉrʉ peɗa
14 Salomoʉ̃ba djõbada carretada, cawayo siɗa zocãrã edasia.* Carretara 1,400 edasia idjaɓa cawayoda doce mil edasia. Maʉ̃gʉra idji sordaorã panabada puruza idjaɓa Jerusaleʉ̃ne idji ɓabarimaa biɗa ɓʉcuasia.
15 Salomoʉ̃ dji boro basiɗe oroda, parata siɗa Jerusaleʉ̃ne aɗuba eroɓasia mõgara quĩrãca. Idjaɓa dji biara ɓʉ bacuru Libanonebema enenada aɗuba eroɓasia mẽãbema higojõ eya carraɗe bara quĩrãca.*
16 Salomoʉ̃ itea ne nẽdobadarãba Egiptoɗe idjaɓa Ciliciaɗe cawayoda nẽdobadjiɗaa.*
17 Cawayo aɓa cuatro libra paratabari nẽdobadjiɗaa. Egiptoɗe carreta aɓa quince libra paratabari nẽdobadjiɗaa. Maʉ̃be ãdjirãba hititarã bororãa, Siriaɗebema bororãa biɗa cawayoda, carreta siɗa nẽdobuebadjiɗaa.
Beɗea eɗaare
^ 1:2 Idji sordaorã bororãda. Hebreo beɗeaɗe nãwã ɓʉ́ ɓʉa: “Mil sordaorã bororãda idjaɓa cien sordaorã bororãda.”
^ 1:5 Exodo 38:1-7
^ 1:14 Cawayo. Ʉ̃cʉrʉmaarã idjia cawayoɗeba djõbadarãda jʉrʉ pesia.
^ 1:15 Dji biara ɓʉ bacuru. Hebreo beɗeaɗe ɓʉ́ ɓʉa “cedro” baribʉrʉ ogoẽ́a.
^ 1:16 Egiptoɗe. Ʉ̃cʉrʉmaarã Musriɗe nẽdobadjiɗaa. Musri druara Cilicia drua caita ɓʉa.
