2 Cronica 5:1-14
5 Ãcõrẽ de droma Salomoʉ̃ba obiɗa pãrãpeɗaɗacarea jũma idji zeza Daviba Ãcõrẽ itea diaɗara maʉ̃ deɗaa enebisia: oroda, paratada, dewara nebia siɗa. Jũma maʉ̃gʉra Ãcõrẽ itea diaɗa wagabadaɗe ɓʉbisia.
2 Maʉ̃be Salomoʉ̃ba Israelɗebema dji dromarãda, nẽbʉra cawa obadarãda, dji drõãrã siɗa Jerusaleʉ̃naa jũma trʉ̃cuasia Ãcõrẽ baurude Sioʉ̃ne ɓʉda Ãcõrẽ de dromanaa edeɗamãrẽã. (Sioʉ̃ purura idjaɓa Davi puru abadaa.*)
3 Israelɗebema dji umaquĩrãra Salomoʉ̃ ɓʉmaa jũma zesiɗaa ãdji warrewarreabema de zaqueɗe panabada ewari obada jeɗecoɗe.*
4 Israelɗebema dji dromarã jũma jũẽpeɗaɗacarea levitarãba Ãcõrẽ baurudera edaɗe wãsiɗaa.
5 Maʉ̃ne ãdjirãba, sacerdoterã biɗa baurudera, Ãcõrẽ wua dera jũma maʉ̃ deɗe ɓʉ siɗa Ãcõrẽ de dromanaa edesiɗaa.
6 Maʉ̃ne Ãcõrẽ baurude quĩrãpe Israelɗebema boro Salomoʉ̃ba, jũma israelerã idji ume dji jʉre duanʉ biɗa ovejada, paca siɗa Ãcõrẽa babue diacuasiɗaa. Ãdjia babue diapeɗaɗa animarãra zocãrã panana bẽrã poya juachaɗaẽ́ basía.
7 Maʉ̃be sacerdoterãba Ãcõrẽ baurudera idji de dromane dji eɗaara ɓʉ dejãnaa edesiɗaa. Maʉ̃ dejãra “Ãcõrẽ itea biara ɓʉ dejã” abadjiɗaa. Mama baurudera bajãnebema nezoca zaca panʉ i edre ɓʉsiɗaa.*
8 Maʉ̃ bajãnebema nezoca zaca panʉra i pae panʉ quĩrãca nũpanasiɗaa. Mãwã ãdji ira baurude dji jira edebada bacuru bara ʉ̃rʉ̃ panasiɗaa.
9 Baurude jira edebada bacurura drasoa ɓʉ bẽrã dji quẽbʉra Ãcõrẽ itea ɓʉ dejãareba unubadjiɗaa. Baribʉrʉ Ãcõrẽ de droma dajadaareba maʉ̃ bacuru quẽbʉra ununaca basía. Waɗibiɗa maʉ̃ bacurura mama panʉa.
10 Umébema mõgara peweɗea Moiseba ɓʉɗada baurudeɗe eɗa panasiɗaa. Waa neẽ́ basía. Israelerã Egiptoɗeba ẽdrʉɗapeɗa Horeb eyaɗe panasiɗaɗe Ãcõrẽba ãdjirã ume beɗea ɓʉpeɗa maʉ̃ mõgarara diasia.
11 Baurudera Ãcõrẽ de dromane eɗa ɓʉɗapeɗa sacerdoterãra Ãcõrẽ itea ɓʉ dejãneba dajadaa wãsiɗaa. Jũma ãdjirã mama duanʉba naẽna osiɗaa ara ãdjida Ãcõrẽ quĩrãpita bia ɓeaɗi carea. Ʉ̃cʉrʉba mãwã osiɗaa ãdjia Ãcõrẽ deɗe ne oɗi careabema ewariẽ́mĩna.
12 Maʉ̃ne trʉ̃ãbi zá cawa panʉ levitarã Asára, Hemaʉ̃ra, Jedutuʉ̃ra, ãdji warrarãra, jũma ãdji ẽberãrã siɗa animarã babue diabada ʉ̃mãdau odjabariare ʉ̃ta duanasiɗaa. Dji biara ɓʉ lino wua oɗada jʉ̃ panasiɗaa. Trʉ̃ãbida zá panasiɗaa címbaloba, arpaba, idjaɓa salterioba. Ãdjirã ume 120 sacerdoterãba cachiruda zá panasiɗaa.
13 Cachiru zá panʉne dewararãda trʉ̃ã duanasiɗaa jũmarãba ãbaa Ãcõrẽa bia beɗeaɗi carea idjaɓa bia ɓʉaɗa aɗi carea. Cachiru zá panʉne, címbalo zá panʉne, dewarabema zá panʉne biɗa dji trʉ̃ã duanʉba Ãcõrẽda nãwã bia jarasiɗaa:
Ãcõrẽra bio biya quirua. Idjia ewariza dadjirãra quĩrĩã ɓʉa.
Mãwã panʉne cawaẽ́ne Ãcõrẽ de dromane eɗa jʉ̃rãrãba towaga nũmesia.
14 Maʉ̃ne sacerdoterãba Ãcõrẽ de dromane obadara poya oɗaẽ́ basía Ãcõrẽ quĩrãwãrẽã dorrodorroada idji de dromane eɗa ɓʉ bẽrã.
