2 Pedro 1:1-21
1 Mʉ̃ra Simoʉ̃ Pedroa, Jesucrito nezocaa idjaɓa idjia diabueɗaa. Mʉ̃a naʉ̃ cartara ɓʉbʉrʉa dai quĩrãca Jesucrito ĩjã ɓearã itea. Dadjirãba ĩjã panʉra bio biya quirua. Jesucritora dadjirã Ãcõrẽa idjaɓa Ẽdrʉ Edabaria. Idjira jipa ɓʉ bẽrã dadjirãra carebasia ĩjãnamãrẽã.
2 Bãrãba Ãcõrẽra, dadjirã Boro Jesu siɗa cawa panʉ bẽrã, mʉ̃a quĩrĩã ɓʉa ãdji biaɗeba bãrãra bio careba pananida idjaɓa necai ɓai siɗa aɗuba dia pananida.
Ãcõrẽba trʉ̃narã sãwã ɓeaɗida panʉ
3 1:3-4 Ãcõrẽda cawa panʉ bẽrã, idji ʉɓʉaɗeba dadjirãa ne jũma diasia idjia quĩrĩã ɓʉ quĩrãca nĩbaɗamãrẽã idjaɓa ewariza idji ume zocai ɓeaɗamãrẽã. Idjira dji droma bẽrã idjaɓa jipa ɓʉ bẽrã dadjirãra trʉ̃peɗa ne waiɓʉa bio bia ɓʉda dadjirã itea oyaɗa asia. Mãwã o ɓʉ bẽrã naʉ̃ ẽjũãnebemarãba cadjirua o quĩrĩã panʉra bãrãba igaraɗapeɗa poya idji quĩrãca jipa ɓeaɗia.
4 –
5 Maʉ̃ba bãrãba nãwã oɗida panʉa: Critoda ĩjã panʉ bẽrã bio jʉrʉɗadua jipa nĩbaɗi carea; jipa nĩnane jʉrʉɗadua crĩcha cawaada eroɓeaɗi carea;
6 crĩcha cawaa eropanʉne jʉrʉɗadua bãrã cacuara jipa eroɓeaɗi carea; bãrã cacua jipa eropanʉne jʉrʉɗadua jũma droaɗi carea; jũma droa panʉne jʉrʉɗadua Ãcõrẽba quĩrĩã ɓʉ quĩrãca ɓeaɗi carea;
7 Ãcõrẽba quĩrĩã ɓʉ quĩrãca panʉne jʉrʉɗadua djabarã cʉ̃ãgaɗi carea; djabarã cʉ̃ãga panʉne jʉrʉɗadua jũmarãda quĩrĩãni carea.
8 Bãrãba maʉ̃da jũma biara o wãnibʉrʉ, dadjirã Boro Jesucritoda cawa panʉ bẽrã ne bia oɗi carea zoquea ɓeaɗia.
9 Baribʉrʉ mãwã oẽ́ ɓʉra dau towa ɓʉ quĩrãca ɓʉa, dauɓerrea ɓʉ quĩrãca ɓʉa. Idjia quĩrãdoasia naẽna cadjirua o ɓaɗara Ãcõrẽba jũma sʉgʉsida.
10 Djabarã, Ãcõrẽba bãrãra trʉ̃peɗa edasia. Wãrãda mãwã ɓeada unubiɗi carea zoquea ɓeaɗadua. Mãwã oɗibʉrʉ ɓaeɗaẽ́a.
11 Maʉ̃be Ãcõrẽba bãrãra dadjirã Boro Jesucrito puruɗe bio bia edaya. Mama dadjirã Ẽdrʉ Edabariba ewariza bia pe eroɓaya.
12 Jũma maʉ̃gʉra cawa panʉmĩna idjaɓa wãrã beɗea bãrãa jaradiapeɗaɗara bio ĩjã panʉmĩna, mʉ̃a jũma maʉ̃gʉra bãrãa quĩrãnebabi ɓaya.
13 Mʉ̃maarã jipa ɓʉa waɗi zocai ɓʉmisa maʉ̃ra quĩrãnebabi ɓaida.
14 Dadjirã Boro Jesucritoba mʉ̃́a ebuɗa cawabisia dãrãẽ́ne mʉ̃ra beuida.
15 Maʉ̃ bẽrã mʉ̃a jũma oya mʉ̃ beuɗacarea bãrãba jũma maʉ̃gʉra ewariza quĩrãnebaɗamãrẽã.
Jesuɗebema jarapeɗaɗara wãrãa
16 Dadjirã Boro Jesucrito ʉɓʉaɗebemada, idji waya zeiɗebema siɗa daiba bãrãa jaradiasiɗaɗe ẽberãba ara ãdji crĩchaɗeba jarapeɗaɗada jaradiaɗaẽ́ basía. Ãtebʉrʉ dadjirã Boro Jesu quĩrãwãrẽã dorrodorroada unupeɗaɗa bẽrã mãwã jaradiasiɗaa.
17 Dadjirã Zeza Ãcõrẽba idjiɗebema bia jarasiɗe idjaɓa dji dromada unubisiɗe daira aria panasiɗaa. Maʉ̃ne Ãcõrẽ dji droma bio quĩrãwãrẽã ɓʉba nãwã jarasia: “Naʉ̃drʉ mʉ̃ Warraa. Mʉ̃a idjira bio quĩrĩã ɓʉa. Mʉ̃ra idji carea ɓʉsriɗa ɓʉa.”*
18 Daiba maʉ̃ beɗeara wãrãda bajãnaa ũrĩsiɗaa Jesu ume Ãcõrẽ eyaɗe panasiɗaɗe.
19 Maʉ̃ awara cawa panʉa Ãcõrẽneba beɗeabadarãba jarapeɗaɗara wãrãda. Maʉ̃ beɗeara ĩbĩrã pãĩmane urua ɓʉ quĩrãca ɓʉ bẽrã bãrãba bio quĩrãcuita ũrĩnida panʉa. Ĩbĩrãra urua ɓabaria aɓa ʉ̃nadrʉbʉrʉɗaa, aɓa diapeɗabema chĩdau odjabʉrʉɗaa. Ara maʉ̃ quĩrãca dadjirã naʉ̃ ẽjũã cadjiruaɗe panʉmisa maʉ̃ beɗeaba dadjirã soɗe cawabi ɓʉa sãwã nĩbaɗida panʉda aɓa Crito zebʉrʉɗaa.
20 Naʉ̃da bio cawaɗadua: Ãcõrẽneba beɗeabadarãba Idji Beɗeaɗe ɓʉpeɗaɗara ara ãdji crĩchaɗeba ni maãrĩ biɗa ɓʉɗaẽ́ basía.
21 Jũma ãdjia jarapeɗaɗara ẽberã crĩchaɗeba zeẽ́ basía. Ãtebʉrʉ Ãcõrẽ Jaureɗeba beɗeasiɗaa.*
Beɗea eɗaare
^ 1:17. Mateo 17:5; Marco 9:7; Luca 9:35.
^ 1:21. Versículo 20-21 idjaɓa nãwã traducida ɓʉa: “Baribʉrʉ naʉ̃da bio cawaɗadua: Ãcõrẽneba beɗeabadarãba Idji Beɗeaɗe ɓʉpeɗaɗara ni aɓaʉba ara idji crĩchaɗeba poya cawaɗaẽ́a, maʉ̃gʉra ẽberã crĩchaɗeba zeẽ́ basi bẽrã. Ãtebʉrʉ Ãcõrẽ Jaureɗeba beɗeasiɗaa.”
