2 Pedro 2:1-22
2 Israelerã tãẽna ʉ̃cʉrʉba sewaɗeba jarabadjiɗaa Ãcõrẽneba beɗeabadada. Bãrã tãẽna biɗa sewa jaradiabadarãda baraya. Sewaɗeba ãdjirãba dadji ãrĩbari crĩchada Ãcõrẽ beɗea quĩrãca jaradiaɗia. Dadjirã Boro Jesuba ãdjirã ẽdrʉ ɓʉɗada igaraɗia. Maʉ̃ carea Ãcõrẽba isabe cawa oya.
2 Ãdjia mĩã pera obadara zocãrãba bio ẽpẽnia. Ãdjirã carea ẽberãrãba wãrã beɗea ẽpẽbadaɗebemada biẽ́ beɗeaɗia.
3 Ãdjirãba paratada awua panʉ bẽrã, bãrã parata edaɗi carea ara ãdji crĩchaɗeba sewada jaradiaɗia. Maʉ̃ carea dãrãẽ́ne Ãcõrẽba wãrãda cawa oya. Dãrãbʉrʉa Ãcõrẽba ãdjirã cawa oi carea ɓʉda.
4 Bajãnebema nezocarãba cadjirua osiɗaɗe Ãcõrẽba quĩrã djuburiaẽ́ basía. Ãtebʉrʉ preso ɓʉbada uria pãĩsosoa ɓʉɗe ɓatacuasia.* Mama carenaba jʉ̃ ɓeaa aɓa Ãcõrẽba cawa oi ewariɗaa.
5 Idjaɓa drõã naẽnabemarãba Ãcõrẽ igarasiɗaɗe idjia quĩrã djuburiaẽ́ basía. Ãtebʉrʉ dopapada zebisia maʉ̃ ẽberãrã jũma nãbʉrʉ quininamãrẽã. Baribʉrʉ Noéba dadji jipa nĩbaiɗebemada jaradiabadjia. Idjida, idji ẽberãrã siete panʉ siɗa Ãcõrẽba ẽdrʉ edasia.*
6 Idjaɓa Ãcõrẽba Sodoma puru, Gomorra puru siɗa cawa osiɗe jũma babuesia. Aɓeɗa jũma pora babisia. Maʉ̃gʉɗeba idjia cawabisia idji quĩrĩãnacara sãwãnida.
7 Baribʉrʉ ẽberã jipa ɓʉ Lo abadara Ãcõrẽba Sodoma babueiɗebemada ẽdrʉ edasia.* Lora sopua ɓabadjia maʉ̃ puruɗebemarãba ne jũma cadjirua o panʉ carea.
8 Maʉ̃ ẽberã jipa ɓʉra Sodomanebemarã tãẽna ɓabadjia. Jipa ɓʉ bẽrã ãdjia cadjirua o panʉ unubʉrʉɗe idjaɓa ũrĩbʉrʉɗe ewariza sopua ɓabadjia.
9 Maʉ̃ba ebuɗa ɓʉa jipa o ɓeara dadjirã Boro Ãcõrẽba bia mĩga panʉnebemada ẽdrʉ eda cawa ɓʉda. Idjaɓa jipa oẽ́ ɓeara sãwã eroɓaida cawa ɓʉa aɓa idjia cawa oi ewariɗaa.
10 Naʉ̃ cacuaba cadjirua o quĩrĩã ɓʉ obadara idjaɓa Ãcõrẽ ãdji Boro bai quĩrĩãnaca siɗa wetara cawa oya.
Sewa jaradiabadara cadjirua oɗi carea peraɗacaa. Cawaara ɓea quĩrãca panabadaa. Jairã dji droma ɓea biẽ́ jaraɗi carea wayaɗacaa.
11 Bajãnebema nezocarãda ãdji cãyãbara ʉɓʉara ɓeamĩna idjaɓa ne waiɓʉara obadamĩna, dadjirã Boro Ãcõrẽ quĩrãpita jairã dji droma ɓeara biẽ́ jaraɗacaa.
12 Baribʉrʉ sewa jaradiabadaba ãdjia adua panʉnebemada biẽ́ beɗeabadaa. Animarã quĩrãca crĩcha neẽ́ ɓeaa. Aɓabe ãdji cacuaba quĩrĩã ɓʉdrʉ obadaa. Animarãda tobaria ẽberãba jidaɗapeɗa beaɗamãrẽã. Ara maʉ̃ quĩrãca sewa jaradiabadara jũma beuɗia.
13 Ãcõrẽba ãdjirãra bio biẽ́ ɓʉya ara ãdjia opeɗaɗa quĩrãca. Ãdjirãra ne co awua ɓeaa idjaɓa itua awua ɓeaa. Maʉ̃drʉ ãdji ɓʉsriɗaa. Diamasi, ãsa biɗa mãwã obadaa. Djabarã ume ãbaa ne co panʉne biɗa mãwã obadaa. Mãwã bãrã tãẽna wua jaigua mititia quĩrãca ɓeaa.
14 Ãdjirãra daunemaya ɓeaa. Ne jũma cadjirua o panʉba sẽnacaa. Bio ĩjãẽ́ ɓeada cũrũgabadaa. Ne jũmada awuabadaa. Maʉ̃ carea Ãcõrẽba ãdjirãra biẽ́ ɓʉya.
15 Ãcõrẽ o jipa ɓʉda igaraɗapeɗa ãĩ wãsiɗaa. Beor warra Balaaʉ̃ba oɗa quĩrãca obadaa.* Balaaʉ̃ra parata awua ɓaɗa bẽrã parata carea cadjiruada oida crĩchasia.
16 Baribʉrʉ cadjirua oɗe wãbʉrʉɗe burroba idjira quẽãsia. Maʉ̃ animarã beɗeacada ẽberã quĩrãca beɗeasia. Ãcõrẽneba beɗeabari Balaaʉ̃ba crĩcha neẽ́ ɓʉ quĩrãca biẽ́ oɗe wãida crĩcha ɓʉmĩna burroba idu wãbiẽ́ basía.
17 Sewa jaradiabadara do zaque baido neẽ́ ɓʉ quĩrãca ɓeaa.* Ãdjirãra jʉ̃rãrã nãũrãba ãyã edebʉrʉ quĩrãca ɓeaa. Nãũrãba jʉ̃rãrã ãyã edebʉrʉɗe cue zecaa. Ara maʉ̃ quĩrãca ãdjia jaradia panʉba carebacaa. Ãcõrẽba uria bio pãĩsosoa ɓʉda o ɓʉsia ãdjirã biẽ́ ɓʉi carea.
18 Ãdjirãba beɗea biya quiruɗeba jaradiabadaa. Baribʉrʉ maʉ̃ba carebacaa. Ãdjirãba jaradiabadaa naʉ̃ cacuaba cadjirua o quĩrĩã ɓʉra oɗida panʉda. Mãwã cadjiruaɗeba ẽdrʉpeɗaɗa dãrãẽ́ ɓeara ãdjirãba cũrũgabadaa wayacusa cadjiruada oɗamãrẽã.
19 Jarabadaa ãdjida ẽpẽnibʉrʉ, nezoca ẽdrʉ ɓʉpeɗaɗa quĩrãca biara ɓeaɗida. Mãwãmĩna cadjiruada poya igaraɗaca bẽrã biara ɓeaẽ́a. Maʉ̃ba ãdjirãda cadjirua nezocarãa. Wãrãda baridua cadjiruada poya igaraɗaẽ́bʉrʉ, dadjirãra maʉ̃gʉ nezocaa.
20 Jesucrito dadjirã Boro, dadji Ẽdrʉ Edabarira cawasiɗa bẽrã naʉ̃ ẽjũãne ɓʉ cadjiruaɗebemada ẽdrʉsiɗaa. Baribʉrʉ jʉ̃caraɗe bʉrá panebʉda quĩrãca wayacusa cadjiruada oɗibʉrʉ, naãrã panana cãyãbara biẽ́ara panenia.
21 Maʉ̃ bẽrã Ãcõrẽ beɗea cawapeɗaɗa igaraɗi cãyãbara biara ɓacasia Ãcõrẽ o jipa ɓʉɗebemada adua ɓeaɗida.
22 Ãdjirãra ẽberãba jarabada quĩrãca ɓeaa. Nãwã jarabadaa: “Usaba weɗara wayacusa cobaria.”* Idjaɓa nãwã jarabadaa: “Chinara cuipeɗa wayacusa egoro ɓa susuaɗe taɓebaria.”
Beɗea eɗaare
^ 2:4. Preso ɓʉbada uria pãĩsosoa ɓʉ. Griego beɗeaɗe ɓʉ́ ɓʉa “Tártaro.”
^ 2:5. Genesi capítulo 6–8.
^ 2:7. Genesi 19:1-29.
^ 2:15. Numero 22:1-41.
^ 2:17. Do zaque baido neẽ́ ɓʉ quĩrãca ɓeaa. Griego beɗeaɗe nãwã ɓʉ́ ɓʉa: “Baido egoroɗeba ʉ̃taa bogadrʉ ɓaɗa jõna quĩrãca ɓeaa.”
^ 2:22. Proverbio 26:11.
