2 Reye 10:17-31
17 Jehúra Samaria puruɗaa wãpeɗa Acabo ẽberãrã waɗi panʉda jũma quenasia. Ãdjirãra aɓeɗa jũma jõbisia Ãcõrẽba Elíaɗeba jaraɗa quĩrãca.
18 Maʉ̃be Samariaɗebemarãda jũma ãbaa jʉrepeɗa nãwã jarasia:
–Acabo ɓasiba Baalera ẽpẽbadjia. Baribʉrʉ mʉ̃a biara ẽpẽya.
19 Maʉ̃ bẽrã Baalɗeba beɗeabadarãda, idji ẽpẽbadada, idji sacerdoterã siɗa jũma trʉ̃nadua. Ni aɓaʉda ãyã ɓecara ɓʉa. Mʉ̃a ewari dromada oya Baalea animarã babue diaɗi carea. Maʉ̃ bẽrã aɓaʉda zeẽ́bʉrʉ, beaɗia.–
Jehúba Baal ẽpẽbadara jũma quenai carea cũrũga ɓʉɗeba mãwã jarasia.
20 Maʉ̃be jarasia:
–Ewarida ɓʉɗadua ãbaa dji jʉreɗapeɗa Baalea bia beɗeaɗi carea.–
Ara maʉ̃da ewarida ɓʉsiɗaa.
21 Jehúba jũma Israel druaɗe jarabisia Baal ẽpẽbadara maʉ̃ ewariɗe zeɗamãrẽã. Maʉ̃ne ãdjirãra jũma zesiɗaa. Ni aɓa biɗa ãyã ɓeẽ́ basía. Maʉ̃ bẽrã Baal de dromara pẽsua coɓesia.
22 Mãwã panʉne Jehúba Baal ẽpẽbadarã djio wagabaría nãwã jarasia:
–Jũmarãa ãdji djiora diacuadua jʉ̃namãrẽã.–
Ara maʉ̃da ãdjirãa diacuasia.
23 Maʉ̃be Jehúra, Recab warra Jonadá siɗa Baal de dromane eɗa wãnapeɗa Jehúba Baal ẽpẽbadarãa nãwã jarasia:
–Quĩrãcuitaɗadua. Ni aɓaʉ Ãcõrẽ ẽpẽbarira bãrã ume ɓaiẽ́ ɓʉa. Aɓabe Baal ẽpẽbadadrʉ nama pananida panʉa.–
24 Maʉ̃be Baal ẽpẽbadaba animarãda, dewara siɗa Baalea babue diacuabʉda basía. Mãwã panʉne ochenta sordaorãba dajadaare jʉ̃ã panasiɗaa Jehúba jaraɗa quĩrãca. Maʉ̃ sordaorãa nãwã jarasia:
–Baal ẽpẽbadarãda mʉ̃a bãrã jʉwaɗe ɓʉya. Ãdjirãra jũma quenanadua. Bãrãba aɓa idu mĩrũ wãbiɗibʉrʉ, dji idu mĩrũ wãbiɗara beaɗia.–
25 Baal ẽpẽbadarãba animarã babue diapeɗaɗacarea Jehúba idji sordaorãa, ãdji bororãa biɗa nãwã jarasia:
–Eɗa quenane wãnadua. Ni aɓaʉda idu mĩrũ wãbirãnadua.–
Ara maʉ̃da sordaorãba, ãdji bororã biɗa necoba quenane wãsiɗaa. Ãdjia quenapeɗaɗara dajadaa ɓatacuaɗapeɗa Baal de dromane eɗaara ɓʉ dejãnaa wãsiɗaa.
26 Mamaʉba jʉwaba oɗa Baalera dajadaa pe enenapeɗa jũma babuesiɗaa.
27 Mõgara oɗa Baalera jũma toapecuaɗapeɗa idji de droma siɗa jũma ãrĩsiɗaa. Maʉ̃be ãgabada deda mama ocuasiɗaa. Iɗi biɗa mãwã ɓʉa.
28 Mãwã Jehúba Baal ẽpẽbadara Israel druaɗe jũma jõbisia.
29 Baribʉrʉ Nabat warra Jeroboaʉ̃ba cadjirua oɗara Jehúba igaraẽ́ basía. Oro oɗa paca zaquea idu bia beɗeabisia. Maʉ̃ paca zaquera Betel puruɗe idjaɓa Daʉ̃ puruɗe biɗa waɗi eropanasiɗaa. Naẽna maʉ̃neba Jeroboaʉ̃ba israelerãa cadjiruada obisia.*
30 Ãcõrẽba Jehúa nãwã jarasia:
–Mʉ̃a quĩrĩã ɓaɗa quĩrãca bʉa Acabo ẽberãrãra jũma quenana bẽrã mʉ̃ quĩrãpita bia osia. Maʉ̃ bẽrã bʉ beuɗacarea bʉ warrada Israelɗebema boroda ɓeya. Maʉ̃are idji warrada, idji wiuzaqueda, dji wiuzaque warra siɗa Israelɗebema boroda ɓeaɗia.–
31 Baribʉrʉ Jehúba israelerã Ãcõrẽ leyra soɗeba quĩrãcuita oẽ́ basía. Maʉ̃ awara naẽna Jeroboaʉ̃ba israelerãa cadjirua obiɗara Jehúba igaraẽ́ basía.
Beɗea eɗaare
^ 10:29 1 Reye 12:26-30
