2 Reye 13:14-21
14 Eliseora cacua biẽ́ ɓepeɗa jaiɗabʉrʉ basía. Mãwã ɓʉɗe Israelɗebema boro Joasaba idjira acʉɗe wãsia. Idji carea jĩã ɓʉɗe Joasaba nãwã jarasia:
–Zeza, zeza, carretaɗeba djõbadarã idjaɓa cawayoɗeba djõbadarã quĩrãca bʉa israelerãra bio carebabaria.–*
15 Eliseoba idjía jarasia:
–Enedrʉmada cha bara namaa enedua.–
Ara maʉ̃da Joasaba edesia.
16 Maʉ̃ne Eliseoba nãwã jarasia:
–Enedrʉmara jidadua.–
Joasaba jidabʉrʉɗe Eliseoba idji jʉwara Israelɗebema boro Joasa jʉwa ʉ̃rʉ̃ ɓʉsia.
17 Maʉ̃ne jarasia:
–Ʉ̃mãdau odjabariare dajadaa acʉbadada ewadua.–
Joasaba ewaɗacarea Eliseoba idjía jarasia:
–Chada aɓa dajadaa drʉtadua.–
Ara maʉ̃da Joasaba dajadaa drʉtasia. Maʉ̃ne Eliseoba jarasia:
–Jãʉ̃ chaba jara ɓʉa: Siriaɗebemarãra Ãcõrẽba bãrãa poyabiya. Apec ẽjũãne bãrãba quenania.–
18 Maʉ̃be Eliseoba jarasia:
–Chara pedua.–
Ara maʉ̃da Israelɗebema boro Joasaba pesia. Maʉ̃ne Eliseoba jarasia:
–Jãʉ̃ chaba dejãda ucuadua.–
Ara maʉ̃da Joasaba ɓarima ũbea upeɗa waa uẽ́ basía.
19 Maʉ̃ carea Ãcõrẽ nezoca Eliseora idji ume bio quĩrũpeɗa jarasia:
–Bʉa dejãra ɓarima juesuma wa ɓarima sei uɗabara, bãrãba Siriaɗebemarãra poyaɗapeɗa jũma quenacasiɗaa. Baribʉrʉ ɓarima ũbeabe uɗa bẽrã ɓarima ũbeabe poyaɗia.–
Eliseo jaiɗaɗa
20 Eliseora jaiɗapeɗa tʉɓarisiɗaa. Poaza moabitarãba Israel druaɗe ne jãrĩcuaɗe wãbadjiɗaa.
21 Ewari aɓa ʉ̃cʉrʉ israelerãba ẽberã jaiɗaɗada jouɗe edebʉda basía. Maʉ̃ne unusiɗaa moabitarãba ne jãrĩcuaɗe zebʉdada. Isabe mĩrũni carea bẽwãrãra Eliseo tʉɓaripeɗaɗaɗe eɗa ɓʉtasiɗaa. Dji bẽwãrãba Eliseo ɓʉwʉrʉ warasiɗe ʉ̃rẽbapeɗa piradrʉsia.
Beɗea eɗaare
^ 13:14 Hebreo beɗeaɗe nãwã ɓʉ́ ɓʉa: “Mʉ̃ zeza, mʉ̃ zeza, Israelɗebema carretaɗeba djõbadarãa idjaɓa cawayoɗeba djõbadarãa.”
