2 Reye 17:1-24
17 Acá doce poa Juda druaɗebema boroda ɓeɗacarea Ela warra Oseara Israel druaɗebema boroda ɓesia. Idjira Samaria puruɗe ɓabadjia. Nueve poa israelerãra pe eroɓasia.
2 Oseaba Ãcõrẽ quĩrãpita cadjiruada obadjia. Baribʉrʉ Israelɗebema bororã idji naẽna ɓeaɗaba opeɗaɗa quĩrãca mãcua oca basía.
3 Osea Israelɗebema boroda ɓasiɗe Asiriaɗebema boro Salmanasada idji sordaorã bara israelerã ume djõne zesiɗaa. Poyaɗapeɗa Salmanasaba Oseara idji jʉwaeɗa eroɓesia. Maʉ̃ bẽrã Oseaba Salmanasaa paratada poaza diabadjia.
4 Mãwã ɓʉɗe Oseaba Egiptoɗebema boro So abadamaa ʉ̃cʉrʉ diabuesia idji carebaɗe zemãrẽã. Maʉ̃ awara Salmanasaba parata poaza diabi ɓaɗada waa diaẽ́ basía. Mãwã Salmanasaba cawasia Oseara idji jʉwaeɗabemada ẽdrʉi carea crĩcha jʉrʉ ɓʉda. Maʉ̃ carea idjia Oseara jidabipeɗa preso ɓʉbisia.
5 Asiriaɗebema boro Salmanasara idji sordaorã siɗa Israel druaɗaa wãnapeɗa Samaria purura poa ũbea auɗu jũrã eropanasiɗaa.
6 Osea nueve poa Israelɗebema boroda ɓeɗacarea Asiriaɗebema boroba Samaria purura poyasia. Maʉ̃be israelerãra Asiriaɗaa jida edepeɗa Halah druaɗe, Gozaʉ̃ druaɗe Habor do caita, idjaɓa medorã puru ɓeaza ɓʉbicuasia.
7 Maʉ̃ra jũma mãwãsia israelerãba ãdji Ãcõrẽ quĩrãpita cadjiruada o panana bẽrã. Ãcõrẽba ãdjirãra Egiptoɗebema boro jʉwaeɗabemada ẽdrʉ ɓʉɗamĩna idjaɓa mamaʉba ẽdrʉ enenamĩna dewara ãcõrẽ ɓeada ẽpẽbadjiɗaa.
8 Dewara puru ɓeaba cadjirua o panʉ carea Ãcõrẽba israelerã quĩrãpitabemada ãyã jʉretasia. Mãwãmĩna israelerãba aɓari cadjiruada o panesiɗaa. Maʉ̃ awara Israelɗebema bororãba cadjirua obibadara israelerãba ẽpẽsiɗaa.
9 Idjaɓa Ãcõrẽ quĩrãpita oiẽ́ ɓeada mẽrã obadjiɗaa.* Ãdji puru caita ɓea eya boroɗe de zaqueda ocuasiɗaa dewara ãcõrẽ ɓeaa bia beɗeaɗi carea. Puru zaque ɓeaza idjaɓa puru waiɓʉa mõgaraba auɗu jũrã ca ɓeaza mãwã ocuasiɗaa.
10 Eya boroza idjaɓa jũma bacuru waiɓʉa nũmea edre ãdjirãba jʉwaba oɗa ãcõrẽ ɓeada ɓʉcuasiɗaa. Mõgara waiɓʉada idjaɓa jʉwaba oɗa ãcõrẽ Aserá siɗa ʉ̃ta nũmʉcuasiɗaa.
11 Eya boroza incienso querada ãdji jʉwaba oɗa ãcõrẽa bá diabadjiɗaa dewara puruɗebemarãba naẽna opeɗaɗa quĩrãca. Maʉ̃ puru ɓeara Ãcõrẽba israelerã quĩrãpitabemada ãyã jʉretasia. Israelerãba cadjirua o panʉ carea Ãcõrẽra ãdjirã ume bio quĩrũsia.
12 Idjia jarasia jʉwaba oɗa ãcõrẽra ẽpẽnacara panʉda. Mãwãmĩna israelerãba ẽpẽsiɗaa.
13 Ãcõrẽba Juda druaɗaa, Israel druaɗaa biɗa idjiɗeba beɗeabadarãda diabuesia. Ãdjirãneba israelerãa nãwã jarasia:
–Mʉ̃ leyda bãrã drõã naẽnabemarãa jũma diasia idjaɓa mʉ̃neba beɗeabadaɗeba bãrãa biɗa diasia. Ãdjirãra mʉ̃ nezocarãa. Jãʉ̃be bãrãba cadjirua obadara igaraɗapeɗa mʉ̃ leyra jũma ĩjã oɗadua.–
14 Baribʉrʉ israelerãba ĩjã oɗaẽ́ basía, ãtebʉrʉ ãdji drõã naẽnabemarã quĩrãca cʉwʉrʉ zarea panesiɗaa. Ãcõrẽra ĩjãnaẽ́ basía.
15 Ãcõrẽba obi jaraɗara, ãdji drõã naẽnabemarã ume beɗea ɓʉɗa siɗa igarasiɗaa. Maʉ̃ awara Ãcõrẽba cawa oi jaraɗara ĩjãnaẽ́ basía. Jʉwaba oɗa ãcõrẽ siriẽ́ ɓeada ẽpẽ panʉ bẽrã ãdjirã siɗa siriẽ́ panesiɗaa. Ãdji caita ɓea puruba cadjirua obadara Ãcõrẽba orãnaduaɗa aɗamĩna o panesiɗaa.
16 Ãcõrẽba obi jaraɗara israelerãba jũma igarasiɗaa. Maʉ̃ bẽrã paca zaque zaca ɓʉda umé osiɗaa bia beɗeaɗi carea. Idjaɓa bacuruda ãcõrẽwẽrã Aserá quĩrãca ocuasiɗaa bia beɗeaɗi carea. Chĩdaúa, jeɗecoa, ʉ̃mãdaúa biɗa bia beɗeabadjiɗaa. Idjaɓa Baalea bia beɗeabadjiɗaa.
17 Maʉ̃ awara ãdji warrarãda, wẽrãcaurã siɗa jʉwaba oɗa ãcõrẽa babue diabadjiɗaa. Dau ẽsã ununi carea obadjiɗaa. Idjaɓa daubarada ẽpẽbadjiɗaa. Ãcõrẽ quĩrãpita jũmawãyã cadjirua o panʉ carea idjira bio quĩrũsia.
18 Ãcõrẽra israelerã ume bio quĩrũna bẽrã idji quĩrãpitabemada ãyã jʉretasia. Aɓabe Juda druaɗebemarãdrʉ ãdji druaɗe panesiɗaa.
19 Baribʉrʉ Juda druaɗebemarã biɗa Ãcõrẽba obi jaraɗara ĩjã oɗaẽ́ basía, ãtebʉrʉ Israel druaɗebemarãba cadjirua opeɗaɗa quĩrãca o panesiɗaa.
20 Maʉ̃ carea Ãcõrẽba israelerãra aɓeɗa jũma igarasia. Ãdjirãra bia mĩgabisia idjaɓa dewara druaɗebemarãa poyabipeɗa idji quĩrãpitabemada ãyã jʉretasia.
21 Naẽna Ãcõrẽba israelerãa ãdji boro Daviɗeba zeɗada igarabisia. Maʉ̃be ãdjirãba Nabat warra Jeroboaʉ̃da ãdji boroda ɓʉsiɗaa. Maʉ̃ Jeroboaʉ̃ba cadjirua waiɓʉada israelerãa obisia. Idjia Ãcõrẽra igarabisia.*
22 Jeroboaʉ̃ba cadjirua o ɓaɗara israelerãba o panesiɗaa. Ni maãrĩ biɗa igaraɗaẽ́ basía.
23 Mãwã cadjirua o panasiɗaa aɓa Ãcõrẽba idji quĩrãpitabemada ãyã jʉretabʉrʉɗaa. Idjiɗeba beɗeabadarã idji nezocarãneba mãwã oyaɗa asia. Maʉ̃ bẽrã asiriarãba israelerãra ãdji druaɗaa jida edesiɗaa. Waɗibiɗa mama panʉa.
24 Maʉ̃be israelerã pananama Asiriaɗebema boroba Babilonianebemarãda, Cutaɗebemarãda, Avaɗebemarãda, Hamánebemarãda, idjaɓa Saparvaiʉ̃nebemarã siɗa ɓʉcuasia. Maʉ̃ ẽberãrãra Samaria puruɗe, dewara puru ɓeaɗe biɗa panesiɗaa.
