2 Reye 24:8-20
8 Joaquiʉ̃ 18 poa ɓasiɗe Juda druaɗebema boroda ɓesia. Jeɗeco ũbea Juda druaɗebemarãra pe eroɓasia. Idjira Jerusaleʉ̃ne ɓabadjia. Idji papara Jerusaleʉ̃nebema Elnataʉ̃ cau Nehusta basía.
9 Joaquiʉ̃ba Ãcõrẽ quĩrãpita cadjiruada o ɓabadjia idji zeza ɓasiba o ɓaɗa quĩrãca.
10 Maʉ̃ ewariɗe Babilonianebema boro Nabucodonosó sordaorãda Jerusaleʉ̃nebemarã ume djõne wãnapeɗa purura auɗu jũrã eropanesiɗaa.
11 Mãwã auɗu jũrã eropanʉne Nabucodonosóra jũẽsia.
12 Maʉ̃ne Juda druaɗebema boro Joaquiʉ̃ba, dji papaba, idjiare ɓeaba, idji sordao bororãba, dji dromarã biɗa jarasiɗaa Nabucodonosó jʉwaeɗa panenida. Nabucodonosó ocho poa idji druaɗebema boroda ɓeɗacarea Juda druaɗebema boro Joaquiʉ̃ra preso jidasia.
13 Maʉ̃be Ãcõrẽba jaraɗa quĩrãca Nabucodonosóba ne bia queɗea Ãcõrẽ de dromane ɓeaɗada jũma pe edesia. Ne bia queɗea Juda druaɗebema boro de dromane ɓeaɗa siɗa jũma pe edesia. Idjaɓa Israelɗebema boro Salomoʉ̃ba Ãcõrẽ de dromane oro ocuaɗa siɗa toapecuapeɗa pe edesia.
14 Maʉ̃ awara Nabucodonosóba Jerusaleʉ̃nebemarãda idji druaɗaa jida edesia: dji dromarãda, sordaorãda, ne o cawa ɓeada, jiorroba ne o cawa ɓea siɗa. Jũma ãbaa die mil jida edesia. Aɓabe dji ne neẽ́ queɗeadrʉ Juda druaɗe panesiɗaa.
15 Nabucodonosóba Juda druaɗebema boro Joaquiʉ̃da, idji papada, idji quimarãda, idjiare ɓeada, dji dromarã siɗa Babilonianaa jida edesia.
16 Sordaorãda siete mil, ne o cawa ɓeada idjaɓa jiorroba ne o cawa ɓeada mil jida edesia. Dji mẽsrã ɓeara Babilonianaa jũma jida edesia.
17 Maʉ̃be Nabucodonosóba Joaquiʉ̃ djabadrõã Mataníada Juda druaɗebema boroda ɓʉsia. Maʉ̃ Mataníara trʉ̃ ɓʉsia Sedequía.
18 Sedequía 21 poa ɓasiɗe Juda druaɗebema boroda ɓesia. Idjira Jerusaleʉ̃ne ɓabadjia. Once poa Judaɗebemarãda pe eroɓasia. Idji papara Libna puruɗebema Jeremia cau Hamutal basía.
19 Sedequíaba Ãcõrẽ quĩrãpita cadjiruada o ɓabadjia idji djaba Joaciʉ̃ba o ɓaɗa quĩrãca.
20 Maʉ̃ carea Ãcõrẽra Jerusaleʉ̃nebemarã ume idjaɓa Juda druaɗebemarã ume bio quĩrũsia. Maʉ̃ bẽrã ãdjirãra idji quĩrãpitabemada ãyã jʉretasia.
Nabucodonosóba Jerusaleʉ̃ babueɗa
Maʉ̃ ewariɗe Sedequíaba Babilonia druaɗebema borora igarasia.
