2 Reye 25:1-12
25 Maʉ̃ carea nueve poa Sedequía Judaɗebema boroda ɓeɗacarea diebema jeɗecoɗe ewari dieɗe Babilonianebema boro Nabucodonosóra idji sordaorã bara Jerusaleʉ̃nebemarã ume djõne wãsiɗaa. Maʉ̃ne poa umé Jerusaleʉ̃ra auɗu jũrã eropanasiɗaa. Puru dajadaare acʉbadada ʉ̃tʉ drasoa ocuasiɗaa.*
2 Once poa Sedequía Juda druaɗebema boroda ɓeɗacarea babiloniarãba waɗibiɗa Jerusaleʉ̃ purura auɗu jũrã eropanasiɗaa.
3 Ara maʉ̃ poaɗe quĩmãrẽbema jeɗecoɗe ewari nueveɗe Jerusaleʉ̃ puruɗe coɗira ni cãrẽ siɗa neẽ́ basía. Maʉ̃ba jũmarãda jarra duanasiɗaa.
4 Mãwã panʉne puru auɗu jũrã ca ɓʉra uyapetasiɗaa. Babiloniarãba purura auɗu jũrã eropanʉmĩna Juda druaɗebema boro Sedequíara, idji sordaorã siɗa diamasi mĩrũ wãsiɗaa. Dji boro néu caita ɓʉ eɗa wãbadaare ẽdrʉsiɗaa. Mama puru auɗu jũrã ca ɓʉra umé panasiɗaa. Maʉ̃ne Arabáɗaa wãbada oɗe pira wãbʉrʉsiɗaa.
5 Maʉ̃ cawasiɗaɗe Babilonianebema sordaorãda Sedequía caiɗu wãsiɗaa. Idjira Jerico puru caita ɓʉ jeweɗaɗe jidaɗe wãsiɗaa. Maʉ̃ne Sedequía sordaorãba idjira amenapeɗa memenesiɗaa.
6 Babiloniarãba Sedequíara jidaɗapeɗa Ribla puruɗaa edesiɗaa. Mama Babilonianebema boroba idjira cawa osia.
7 Sedequíaba acʉ ɓʉɗe Nabucodonosóba idji warrarãda quenabisia. Jũma quenanapeɗa Sedequía daura umena nuẽtabisia. Maʉ̃be bronce oɗa carenaba jʉ̃napeɗa Babilonia druaɗaa jida edesiɗaa.
8 Nabucodonosó 19 poa Babilonianebema boroda ɓeɗacarea jeɗeco juesumane ewari sieteɗe idji sordaorã boro Nabuzaradaʉ̃da Jerusaleʉ̃ puruɗaa wãsia.
9 Maʉ̃ne Ãcõrẽ de dromada, Juda druaɗebema boro de dromada, idjaɓa de Jerusaleʉ̃ne ɓea siɗa jũma bácuasia. Dji droma ɓeaba eropanana deda aɓeɗa jũma bácuasia.
10 Maʉ̃be idjia Babilonianebema sordaorãa Jerusaleʉ̃ puru auɗu jũrã ca ɓʉra jũma ãrĩbisia.
11 Maʉ̃be Nabuzaradaʉ̃ba ẽberãrã Jerusaleʉ̃ne waɗi panʉda, Nabucodonosóare panʉana apeɗaɗarãda, dewara ẽberãrã siɗa Babilonia druaɗaa jũma jida edesia.
12 Aɓabe dji ne neẽ́ queɗeadrʉ amesia ẽjũã o ɓeaɗamãrẽã idjaɓa uva ẽjũãda wagaɗamãrẽã.
Beɗea eɗaare
^ 25:1 Acʉbadada ʉ̃tʉ drasoa ocuasiɗaa. Ebuɗa ɓʉẽ́a cãrẽda osiɗada.
