2 Reye 4:1-44
4 Pẽdra wẽrãda ɓasia. Idji quimara Ãcõrẽneba beɗeabari basía. Maʉ̃ pẽdra wẽrãba Eliseoa jarasia:
–Mʉ̃ quima querasira bʉ nezoca basía. Bʉa cawa ɓʉa idjia Ãcõrẽra bio waya ɓasida. Baribʉrʉ idji jaiɗasiɗe paratada diai bara ɓasia. Maʉ̃da jẽda diaẽ́ ɓʉ bẽrã iɗi maʉ̃ parata djibariba mʉ̃ warrarãda umena edaɗe zeya idji nezocarãda ɓeaɗamãrẽã.–
2 Maʉ̃ne Eliseoba idjía iwiɗisia:
–¿Mʉ̃a bʉra sãwã carebai? Mʉ̃́a jaradua: ¿cãrẽda diguiɗa eroɓʉ nẽdobuei carea?–
Pẽdra wẽrãba panusia:
–Nẽdobuei carea mʉ̃ diguiɗa ni cãrẽ siɗa neẽ́ quirua. Aɓabe zoco zaqueɗe nedragada maãrĩ eroquirua.–
3 Maʉ̃ne Eliseoba jarasia:
–Bʉ de caita ɓea ẽberãrãmaa wãpeɗa zoco ne neẽ́ ɓeada zocãrã iwiɗidua.
4 Edapeɗa bʉra, bʉ warrarã siɗa diguiɗa wãnapeɗa bʉ deɗe eɗa wãbadara jũãtrʉɗadua. Maʉ̃be bʉa eroɓʉ nedragara maʉ̃ zoco ɓeaɗe bira weadua. Birasira ãyã ɓʉ wãnadua.–
5 Ara maʉ̃da pẽdra wẽrãra wãsia. Zocoda zocãrã iwiɗipeɗa idjira, idji warrarã siɗa diguiɗa wãnapeɗa dji eɗa wãbadara jũãtrʉsiɗaa. Maʉ̃be dji warrarãba maʉ̃ zoco ɓeara aɓa aɓa dji papamaa edesiɗaa nedragaba bira tʉcuamãrẽã.
6 Jũma bira tʉɗacarea pẽdra wẽrãba idji warraa jarasia dewara zocoda enemãrẽã. Baribʉrʉ warraba jarasia zocora waa neẽ́da. Ara maʉ̃da nedraga idji zocoɗe eroɓʉra waa piaẽ́ basía.
7 Pẽdra wẽrãba Ãcõrẽneba beɗeabari Eliseomaa jaraɗe wãsia. Maʉ̃ne Eliseoba jarasia:
–Maʉ̃ nedragara nẽdobueɗe wãdua. Nẽdobuepeɗa bʉ quima querasiba parata diaida ɓaɗara diadua. Dji parata ɓeɗaba bʉra, bʉ warrarã siɗa necai panania.–
Eliseoba warra ʉ̃rẽbabiɗa
8 Ewari aɓa Eliseora Suneʉ̃ puruɗaa wãsia. Mama wẽrã parata bara ɓʉba idjía jarasia ne coɗe zemãrẽã. Maʉ̃ carea Suneʉ̃naa wãbʉrʉza Eliseora maʉ̃ wẽrãma ne cobadjia.
9 Maʉ̃ wẽrãba idji quimaa jarasia:
–Mʉ̃a cawa ɓʉa jãʉ̃ ẽberã dadjimaa ne coɗe zebarira wãrãda Ãcõrẽneba beɗeabarida.
10 Maʉ̃ bẽrã dadji de ʉ̃rʉ̃ de zaqueda idji itea oɗia. Maʉ̃ne eɗa cʉɗada, mesada, bugueda, ĩbĩrã siɗa ɓʉɗia idji zebʉrʉɗe mama cãĩmãrẽã.–
11 Mãwã opeɗaɗacarea ewari aɓa Eliseora jũẽpeɗa de zaqueɗe cãĩne wãsia.
12 Mama Eliseoba idji nezoca Guiezia nãwã jarasia:
–Naʉ̃ de djibari wẽrãda trʉ̃ne wãdua.–
Ara maʉ̃da Guieziba trʉ̃ne wãpeɗa wẽrãra idjimaa zesia.
13 Maʉ̃be Eliseoba Guiezia jarasia:
–Idjía jaradua: “Bʉa dai itea bio bia osia. ¿Daiba bʉ itea cãrẽda oɗi? ¿Bʉa quĩrĩã ɓʉca daira bʉare Israelɗebema boro ume wa idji sordaorã boro ume beɗeaɗida?”–
Wẽrãba panusia:
–Mʉ̃a ni cãrẽ siɗa quĩrĩãẽ́a. Mʉ̃ ẽberãrã tãẽna ɓʉ bẽrã necai ɓabaria.–
14 Maʉ̃ne Eliseoba idji nezoca Guiezia iwiɗisia:
–¿Idji itea cãrẽda oɗi?–
Guieziba panusia:
–Cawaẽ́a, baribʉrʉ idjira warra neẽ́ ɓʉa idjaɓa idji quimara drõãda quirua.–
15 Maʉ̃ne Eliseoba jarasia:
–Idjira wayacusa trʉ̃ne wãdua.–
Ara maʉ̃da Guieziba trʉ̃ne wãsia. Wẽrãra zepeɗa de zaqueɗe eɗa wãbada caita nũmesia.
16 Maʉ̃be Eliseoba idjía jarasia:
–Za uru poaɗe ara naʉ̃ jeɗecoɗe bʉa warrada topeɗa bara eroɓaya.–
Wẽrãba panusia:
–Mãwã jararãdua, mʉ̃ boro. Ãcõrẽneba beɗeabari, mʉ̃ra cũrũgarãdua.–*
17 Eliseoba jaraɗa quĩrãca dewarabema poaɗe wẽrãra ɓiogoa ɓepeɗa warra tosia.
18 Maʉ̃ warra wariɗacarea ewari aɓa dji zezamaa wãsia. Dji zezaba dewararã ume néuda ewa panasiɗaa.
19 Cawaẽ́ne warrara nãwã ɓia nũmesia:
–¡Aguiɗii, mʉ̃ borora pua nũmʉa! ¡Mʉ̃ borora pua nũmʉa!–
Maʉ̃ carea dji zezaba idji nezocaa jarasia:
–Mʉ̃ warrara dji papamaa ededua.–
20 Ara maʉ̃da idji nezocaba dji warrara bara edapeɗa dji papamaa edesia. Maʉ̃be dji papaba warrara ɓacaraɗe eroɓasia aɓa umatipa. Maʉ̃ne warrara jaiɗasia.
21 Ara maʉ̃da dji papaba idjira ʉ̃taa Eliseo de zaqueɗaa edepeɗa Eliseo cʉɗaɗe ɓʉsia. Maʉ̃be ẽdrʉpeɗa dji eɗa wãbadara jũãtrʉsia.
22 Idji quimada trʉ̃peɗa nãwã jarasia:
–Mʉ̃ djuburia burroda aɓa idjaɓa nezocada aɓa mʉ̃maa diabuedua. Mʉ̃ra isabe Eliseomaa wãya. Jũẽpeɗa ara maʉ̃da jẽda zeya.–
23 Dji quimaba iwiɗisia:
–¿Bʉra cãrẽ cãrẽã iɗi idjimaa wãbʉrʉ? Ʉ̃nãũbada ewariẽ́a ni jeɗeco djiwiɗiẽ́a idji ume ãbaa Ãcõrẽa iwiɗiɗi carea.–
Wẽrãba panusia:
–Jũmawãyã crĩcharãdua.–
24 Maʉ̃be wẽrãba idji chũmeira burro ʉ̃rʉ̃ jʉ̃bipeɗa dji nezocaa nãwã jarasia:
–Isabe wãnia. Mʉ̃a jaraẽ́bʉrʉ ni maãrĩ biɗa ʉ̃nãũnaẽ́a.–
25 Ara maʉ̃da wãnapeɗa Carmelo eyaɗe Eliseo ɓʉma jũẽsiɗaa. Eliseoba tʉmʉba ãdji zebʉdada unusiɗe idji nezoca Guiezia jarasia:
–Acʉdua, Suneʉ̃ puruɗebema wẽrãra zebʉrʉa.
26 Idji audiaɓariɗe pira wãdua. Iwiɗidua idjida, dji quimada, dji warra siɗa bia panʉ cawaya.–
Ara maʉ̃da idji nezocara pira wãsia. Maʉ̃ne wẽrãba panusia:
–Daira jũmaena bia panʉa.–
27 Eyaɗe Eliseo ɓʉma jũẽsiɗe wẽrãba Eliseo jĩrũne jida coɓesia beɗea djuburiai carea. Maʉ̃ bẽrã Guiezira araa dogosia wẽrã ãyã ɓʉi carea. Baribʉrʉ Eliseoba jarasia:
–Idu ɓʉdua. Naʉ̃ wẽrãra bio sopua ɓʉa. Baribʉrʉ Ãcõrẽba mʉ̃́a cawabiẽ́ ɓʉa cãrẽ cãrẽã jãwã sopua ɓʉda.–
28 Maʉ̃ne wẽrãba jarasia:
–Mʉ̃ boro, mʉ̃ra sopua ɓʉa mʉ̃ warrada jaiɗaɗa bẽrã. ¿Mʉ̃a warrada bʉ́a iwiɗisica? ¿Mʉ̃a jarasiẽ́ca mʉ̃ra cũrũgarãmãrẽã?–
29 Ara maʉ̃da Eliseoba Guiezia jarasia:
–Bʉa cacuaɗe jʉ̃ ɓʉra bio trãjʉ̃ coɓʉpeɗa naʉ̃ wẽrã deɗaa isabe wãdua. Mʉ̃ bacuruda ededua. Isabe wãida ɓʉ bẽrã ẽberãda unusira beɗearãdua. Ẽberãba bʉ́a beɗeaibʉrʉ, panurãdua. Naʉ̃ wẽrã deɗe jũẽpeɗa mʉ̃ bacurura idji warra quĩrãdarra ʉ̃rʉ̃ coɓʉdua.–
30 Maʉ̃ne dji warra papaba Eliseoa jarasia:
–Ãcõrẽ zocai ɓʉ quĩrãpita, bʉ quĩrãpita biɗa wãrãneba jaraya: bʉda wãẽ́bʉrʉ, mʉ̃ siɗa wãẽ́a.–
Maʉ̃ bẽrã Eliseora idji ume wãsia.
31 Guiezira ãdji na wãsia. Jũẽpeɗa Eliseo bacurura dji warra quĩrãdarra ʉ̃rʉ̃ coɓʉsia. Mãwãmĩna cãrẽ siɗa sãwãẽ́ basía. Ara maʉ̃da Guiezi jẽda wãbʉrʉɗe Eliseora ota unusia. Maʉ̃ne Guieziba nãwã jarasia:
–Warrara ʉ̃rẽbaẽ́ basía.–
32 Eliseo jũẽsiɗe dji warra jaiɗaɗara idji cʉɗaɗe urraju nũmasia.
33 Ara maʉ̃da iduɓa eɗa wãpeɗa dji eɗa wãbadara jũãtrʉ nũmʉsia. Maʉ̃be Ãcõrẽa iwiɗisia.
34 Iwiɗipeɗa idji cʉɗaɗe dji warra ʉ̃rʉ̃ ɓarruɓari coɓesia. Idji iteda dji warra itema ɓʉsia. Idji dauda dji warra dauma ɓʉsia. Idjaɓa idji jʉwada dji warra jʉwa ʉ̃rʉ̃ ɓʉsia. Mãwã coɓʉɗe warra jaiɗaɗara jʉ̃wʉ̃rʉ̃ãsia.
35 Maʉ̃be Eliseora piradrʉpeɗa arima pʉrrʉa nĩbapeɗa wayacusa dji warra ʉ̃rʉ̃ ɓarruɓari coɓesia. Maʉ̃ne warrara ɓarima siete jaisapeɗa dau ogasia.*
36 Eliseoba Guiezira trʉ̃peɗa nãwã jarasia:
–Dji warra papara trʉ̃ne wãdua.–
Ara maʉ̃da trʉ̃ne wãsia. Dji papa zesiɗe Eliseoba jarasia:
–Bʉ warrara edadua.–
37 Ara maʉ̃da dji papara eɗa wãpeɗa Eliseo jĩrũ caita chĩrãboroɗe ɓarru coɓesia. Maʉ̃be idji warrara edapeɗa ẽdrʉsia.
Eliseoba ẽberãrã ne cobiɗa
38 Ewari aɓa Eliseora Gilgalɗaa wãsia. Maʉ̃ druaɗe jarrabada baraasia. Mama Eliseora Ãcõrẽneba beɗeabadarã ume ãbaa dji jʉre panʉne idji nezocaa nãwã jarasia:
–Cuguru waiɓʉaɗe Ãcõrẽneba beɗeabadarã itea ne djudua.–
39 Maʉ̃ne cobada chiruada aɓaʉba mẽã jʉrʉɗe wãsia. Jʉrʉ ɓʉɗe jʉ̃cara zau ɓʉda unusia. Maʉ̃ tada idjia cacuaɗe jʉ̃ ɓʉɗe pe edapeɗa jẽda wãsia. Maʉ̃gʉra pichia toacuapeɗa dji cuguru waiɓʉa dju nũmʉne eɗa ɓʉsia. Baribʉrʉ idjia adua ɓasia maʉ̃gʉra coɗacada.
40 Wiɗacarea maʉ̃ djicora jeɗecasia. Baribʉrʉ cobʉdaɗe ãdjirãba ɓia jarasiɗaa:
–¡Ãcõrẽneba beɗeabari Eliseo, naʉ̃ djicora dadji beabari bara ɓʉa!–
Maʉ̃ carea ãdjirãba coɗaẽ́ basía.
41 Eliseoba jarasia:
–Harinada maãrĩ enenadua.–
Eliseoba maʉ̃ harinara dji cuguru waiɓʉaɗe eɗa ɓʉpeɗa nãwã jarasia:
–Iɗibʉrʉ jeɗecaɗadua coɗi carea.–
Cobʉdaɗe maʉ̃ djicora dadji beabari neẽ́ ɓasia.
42 Mãwãnacarea Baal-salisa puruɗeba ẽberãda Eliseomaa zesia. Maʉ̃ ẽberãba idji néu naãrã ewaɗaɗebemada Eliseo itea enesia. Paʉ̃ cebada oɗada veinte, trigo djiwiɗi ewaɗa siɗa cʉmʉne enesia. Maʉ̃be Eliseoba idji nezocaa jarasia:
–Naʉ̃da Ãcõrẽneba beɗeabadarãa cobidua.–
43 Idji nezocaba jarasia:
–Naʉ̃ maãrĩ quiruba ¿mʉ̃a sãwã cien ẽberãrãda ne cobi?–
Eliseoba panusia:
–Naʉ̃da Ãcõrẽneba beɗeabadarãa cobidua. Ãcõrẽba nãwã jara ɓʉa: “Ãdjirãba coɗapeɗa aɗubaya.”–
44 Mãwã jaraɗa bẽrã Eliseo nezocaba maʉ̃ra jeɗecasia maʉ̃ cien ẽberãrãba coɗamãrẽã. Coɗapeɗa aɗubasia Ãcõrẽba jaraɗa quĩrãca.
