2 Reye 5:1-27
5 Ẽberã Naamaʉ̃ abadada ɓasia. Idjira Siriaɗebema sordaorã boro basía. Ãcõrẽba careba ɓʉɗeba ãdji dji quĩrũra poyaɗa bẽrã Siriaɗebema boroba idjira dewararã cãyãbara biara unubadjia. Idjira bio sozarra ɓasia, baribʉrʉ aiɗa bara ɓasia.
2 Naẽna Siriaɗebema sordaorãba Israel druaɗe ne biada jãrĩne wãbadjiɗaa. Maʉ̃ne wẽrã zaqueda jẽda jida edesiɗaa. Maʉ̃ wẽrãcaura Naamaʉ̃ quima nezocada ɓesia.
3 Ewari aɓa wẽrãcauba idji boro Naamaʉ̃ quimaa nãwã jarasia:
–Ãcõrẽneba beɗeabari Eliseoda Samaria puruɗe ɓʉa. Mʉ̃ boro Naamaʉ̃ra idjimaa wãbʉrʉbara, idji aiɗara anicasia.–
4 Maʉ̃ wẽrãcau Israelɗebemaba jaraɗada Naamaʉ̃ba Siriaɗebema boroa jaraɗe wãsia.
5 Maʉ̃ne Siriaɗebema boroba jarasia:
–Bia ɓʉa. Wãdua. Mʉ̃a cartada Israelɗebema boro itea bʉ ume diabueya.–
Ara maʉ̃da Naamaʉ̃ra wãsia. Idjia paratada 750 libra, oroda 150 libra, idjaɓa cacuaɗe jʉ̃badada 10 edesia.
6 Carta Israelɗebema boro itea edeɗaɗe nãwã ɓʉ́ ɓasia: “Mʉ̃a naʉ̃ cartara mʉ̃ nezoca Naamaʉ̃ ume bʉ́a diabuebʉrʉa. Mʉ̃a quĩrĩã ɓʉa bʉa idji aiɗara anibida.”
7 Israelɗebema boroba maʉ̃ carta acʉsiɗe idjia cacuaɗe jʉ̃ ɓʉra sopuaba cõãtapeɗa nãwã jarasia:
–Mãwãra ¿mʉ̃ra Ãcõrẽca naʉ̃ ẽberã biabi carea? Mʉ̃ra Ãcõrẽẽ́a ẽberãrã zocai ɓʉi carea idjaɓa beubi carea. Mãwãmĩna Siriaɗebema boroba naʉ̃ ẽberãra mʉ̃maa diabuesia idji aiɗara anibimãrẽã. Idjira mʉ̃ ume djõbi jʉrʉ ɓʉa.–
8 Ãcõrẽneba beɗeabari Eliseoba ũrĩsia Israelɗebema boroba cacuaɗe jʉ̃ ɓʉra sopuaba cõãtasida. Maʉ̃ carea Eliseoba ẽberãda idjimaa nãwã jaraɗe diabuesia:
–¿Cãrẽ cãrẽã bʉa cacuaɗe jʉ̃ ɓʉra cõãtasi? Jãʉ̃ ẽberãra mʉ̃maa diabuedua. Mʉ̃a biabiya. Mãwã idjia cawaya wãrãda Israel druaɗe Ãcõrẽneba beɗeabarida aɓa ɓʉda.–
9 Ara maʉ̃da Naamaʉ̃ra cawayo carreta bara ɓʉɗe Eliseomaa wãpeɗa dji deɗe eɗa wãbada dajadaare jũẽsia.
10 Eliseoba ẽberãda dajadaa nãwã jaraɗe diabuesia: “Jordaʉ̃ doɗe cuiɗe wãdua. Ɓarima siete cuibʉrʉɗe bʉ cacuara biapeɗa Ãcõrẽ quĩrãpita bia ɓeya.”
11 Maʉ̃ ũrĩpeɗa Naamaʉ̃ra bio quĩrũ wãsia. Idjia jarasia:
–Mʉ̃a crĩcha ɓasia Eliseoba mʉ̃ra dajadaa acʉɗe zepeɗa idji Ãcõrẽa iwiɗida idjaɓa idji jʉwara mʉ̃ aiɗa ʉ̃rʉ̃ jãrẽwẽida animãrẽã.
12 Jũma Israel druaɗe ɓea do cãyãbara Damasco druaɗe Abaná doda, Parpar do siɗa biara panʉa. Aɓabe cuibʉrʉba biaida ɓʉbʉrʉ, biara ɓʉa jãma cuiɗe wãida.–
Mãwã jarapeɗa bio quĩrũ wãsia.
13 Maʉ̃ne Naamaʉ̃ nezocarãda idji caita wãnapeɗa nãwã jarasiɗaa:
–Dai boro,* jãʉ̃ Ãcõrẽneba beɗeabariba obi jaraɗara zarea ɓaɗabara bʉa ocasia. Idjia aɓabe jara ɓʉa bʉ biamãrẽã Jordaʉ̃ doɗe cuida ɓʉda. ¿Bʉa mãwã oiẽ́ ɓʉca?–
14 Mãwã jarapeɗaɗa bẽrã Naamaʉ̃ra Jordaʉ̃ doɗaa wãpeɗa ɓarima siete cuisia Ãcõrẽneba beɗeabari Eliseoba jaraɗa quĩrãca. Ara maʉ̃da biapeɗa idji cacuara cũdra quĩrãca dowa ɓesia. Ãcõrẽ quĩrãpita bia ɓesia.
15 Naamaʉ̃ra idji ume panʉ siɗa jẽda Eliseomaa wãnapeɗa Naamaʉ̃ba idji quĩrãpita nãwã jarasia:
–Iɗibʉrʉ cawasia wãrã Ãcõrẽda aɓabe naʉ̃ Israel druaɗe ɓʉda. Mʉ̃ djuburia, mʉ̃a ne diabʉrʉra edadua.–
16 Baribʉrʉ Eliseoba jarasia:
–Ãcõrẽ zocai ɓʉ quĩrãpita wãrãneba jaraya: bʉa dia ɓʉra edaẽ́a.–
Naamaʉ̃ba mĩã sẽ jara ɓʉmĩna Eliseoba edaẽ́ basía.
17 Maʉ̃ne Naamaʉ̃ba jarasia:
–Mãẽteara mʉ̃ boro, mʉ̃ djuburia naʉ̃ druaɗebema egoroda mʉ̃ druaɗaa idu edebidua. Burro uméba poyaɗi daucha mʉ̃a ede quĩrĩã ɓʉa. Mãwãra mʉ̃ druaɗe mʉ̃a bãrã Ãcõrẽa animarãda, dewara siɗa poya babue diaya. Dewara ãcõrẽ ɓeaa mʉ̃a waa ne babue diaẽ́a.
18 Baribʉrʉ mʉ̃a Ãcõrẽa beɗea djuburiaya naʉ̃ cadjirua obʉrʉɗe quĩrãdoamãrẽã: mʉ̃ druaɗebema boroda idji ãcõrẽ Rimoʉ̃ de dromane eɗa wãbʉrʉɗe ɓae amaaba mʉ̃ jʉwaɗe jida wãbaria. Maʉ̃ne idjira Rimoʉ̃ quĩrãpita chĩrãboroɗe coɓebʉrʉɗe mʉ̃ siɗa mãwã coɓeida ɓʉa. Mʉ̃a Ãcõrẽa beɗea djuburiaya maʉ̃ cadjirua quĩrãdoamãrẽã.–
19 5:19-20 Eliseoba panusia:
–Necai wãdua.–
Ara maʉ̃da Naamaʉ̃ra wãsia. Waɗi tʉmʉ wãẽ́ ɓʉɗe Ãcõrẽneba beɗeabari Eliseo nezoca Guieziba nãwã crĩchasia: “Mʉ̃ boroba Siriaɗebema Naamaʉ̃ra idu necai wãbisia. Idjia enenara ni cãrẽ siɗa edaẽ́ basía. Ãcõrẽ zocai ɓʉ quĩrãpita wãrãneba jaraya: Naamaʉ̃ caiɗu pira wãya ne edai carea.”
21 Ara maʉ̃da Guiezira Naamaʉ̃ caiɗu wãsia. Naamaʉ̃ba idji pira zebʉrʉda unusiɗe carretaɗeba uɗaa ɓadopeɗa nãwã iwiɗisia:
–¿Cãrẽda sãwãsi?–
22 Guieziba panusia:
–Ni cãrẽ siɗa sãwãnaẽ́ panʉa. Baribʉrʉ mʉ̃ boroba nãwã jara ɓʉa: “Aretewa Ãcõrẽneba beɗeabada cũdrarãda umé Epraiʉ̃ eyaiɗa ɓʉ ẽjũãneba jũẽsiɗaa. Mʉ̃ djuburia paratada 75 libra idjaɓa cacuaɗe jʉ̃bada siɗa umé diadua.”–*
23 Naamaʉ̃ba panusia:
–Bia ɓʉa. Baribʉrʉ paratada 150 libra edadua.–*
Mãwã jara ɓasia aɓa Guieziba edabʉrʉɗaa. Maʉ̃be Naamaʉ̃ba saco uméne paratada 150 libra eɗa ɓʉbisia. Cacuaɗe jʉ̃bada siɗa umé diasia. Maʉ̃be nezocada umé edapeɗa jũma maʉ̃gʉra Guiezi na edebisia.
24 Eya zaqueɗe jũẽnapeɗa Naamaʉ̃ nezocarãba edepeɗaɗara Guieziba edasia. Diguiɗa waga ɓʉpeɗa Naamaʉ̃ nezocarãra jẽda wãbisia.
25 Maʉ̃be eɗa wãpeɗa idji boro Eliseo quĩrãpita nũmesia. Maʉ̃ne Eliseoba idjía iwiɗisia:
–Guiezi, bʉra ¿sãma ɓasi?–
Guieziba panusia:
–Mʉ̃, bʉ nezocara ãyã wãẽ́ ɓʉa.–
26 Baribʉrʉ Eliseoba jarasia:
–Jãʉ̃ ẽberã idji carretaɗeba uɗa ɓadopeɗa bʉ audiaɓarisiɗe mʉ̃ sora bʉ ume ɓasia. Iɗi Ãcõrẽba ne ununacada oɗa bẽrã biẽ́ ɓʉa paratada, cacuaɗe jʉ̃badada, olivo ẽjũãda, uva ẽjũãda, ovejada, pacada, nezocarãda, nezoca wẽrãrã siɗa edaida.
27 Maʉ̃ carea aiɗaba Naamaʉ̃ jida ɓaɗa quĩrãca iɗiba ʉ̃taa bʉda, bʉɗeba yõbʉdarã siɗa aiɗa bara ɓeaɗia.–
Mamaʉba ẽdrʉbʉrʉɗe Guiezira aiɗaba bira nũmesia.*
