2 Reye 6:1-7
6 Ewari aɓa Ãcõrẽneba beɗeabadarãba Eliseoa nãwã jarasiɗaa:
–Dadjirã panʉ dera jũmawãyã caibe quirua.
2 ¿Dairãra Jordaʉ̃ doɗaa wãnida panʉca? Mama daiza bacuruda tutaɗapeɗa de waiɓʉada oɗia ãbaa panani carea.–
Eliseoba panusia:
–Bia ɓʉa. Wãnadua.–
3 Maʉ̃ne aɓaʉba Eliseoa jarasia:
–¿Dai, bʉ nezocarã ume wãẽ́ca? Dai djuburia wãna.–
Eliseoba panusia:
–Bia ɓʉa. Mʉ̃ siɗa wãya.–
4 Ara maʉ̃da ãdjirãra Jordaʉ̃ doɗaa wãnapeɗa bacuruda tuta panasiɗaa.
5 Mãwã panʉne zagarada aɓa daiɗu ɓaeɗe wãsia. Dji zagara eroɓaɗaba Eliseoa jĩgua jarasia:
–¡Mʉ̃ boro, jãʉ̃ zagarara djãrãne basía!–
6 Ãcõrẽneba beɗeabari Eliseoba nãwã iwiɗisia:
–¿Sãma daiɗu ɓaeɗe wãsi?–
Dji zagara eroɓaɗaba acʉbisia sãma ɓaeɗe wãsida. Eliseoba bacuru zaqueda ɓʉá edapeɗa araa ɓatabuesia. Ara maʉ̃da zagarara dojãneba ʉ̃taa ũmane zesia.
7 Maʉ̃ne Eliseoba jarasia:
–Jidadua.–
Ara maʉ̃da dji zagara eroɓaɗaba jidasia.
