2 Reye 9:1-37
9 Ewari aɓa Eliseoba Ãcõrẽneba beɗeabarida aɓa trʉ̃peɗa nãwã jarasia:
–Bʉa cacuaɗe jʉ̃ ɓʉra bio trãjʉ̃ coɓʉpeɗa Gala druaɗe Ramo puruɗaa isabe wãdua. Naʉ̃ zoco zaqueɗe nedragada ededua.
2 Mama jũẽpeɗa Josapa warra, Nimsi wiuzaque Jehúda acʉɗe wãdua.* Idjira dewararã ume ɓʉda ãyã trʉ̃peɗa dewara dejãare ededua.
3 Maʉ̃be naʉ̃ zoco zaqueɗe ɓʉ nedragara idji boro ʉ̃rʉ̃ weadua. Weabʉrʉɗe jaradua: “Ãcõrẽba nãwã jara ɓʉa: mʉ̃a bʉra Israelɗebema boroda ɓʉbʉrʉa.” Mãwã opeɗa dji deɗe eɗa wãbadara ewapeɗa isabe pira wãdua. Ni maãrĩ biɗa dãrãrãdua.–
4 Ara maʉ̃da Ãcõrẽneba beɗeabari cũdrara Gala druaɗe Ramo puruɗaa wãsia.
5 Mama jũẽsiɗe Israelɗebema sordao bororãda ãbaa dji jʉre duanʉda unupeɗa nãwã jarasia:
–Mʉ̃ boro, mʉ̃a bʉ́a ne jaraida eroɓʉa.–
Maʉ̃ne Jehúba iwiɗisia:
–¿Caia beɗea ɓʉ?–
Cũdraba panusia:
–Mʉ̃a bʉ́a beɗea ɓʉa, mʉ̃ boro.–
6 Maʉ̃be Jehúra piradrʉpeɗa cũdra ume dewara dejãare wãsia. Mama panʉne cũdraba nedraga Jehú boro ʉ̃rʉ̃ weabʉrʉɗe nãwã jarasia:
–Israelerã Ãcõrẽba nãwã jara ɓʉa: mʉ̃a bʉra mʉ̃ puru Israelɗebema boroda ɓʉbʉrʉa.
7 Bʉ boro ɓasi Acabo ẽberãrãra jũma quenadua. Idji quima Jezabelba mʉ̃ nezocarã, mʉ̃neba beɗeabadarã siɗa quenabiɗa carea mʉ̃a bʉɗeba cawa oya.*
8 Acabo ẽberãrãra jũma quininia. Ãdjirã dji umaquĩrãra mʉ̃a aɓeɗa jũma jõbiya: nezoca ɓeada, nezocaẽ́ ɓea siɗa.
9 Mʉ̃a Nabat warra Jeroboaʉ̃ ẽberãrã jõbiɗa quĩrãca idjaɓa Ahía warra Baasa ẽberãrã jõbiɗa quĩrãca Acabo ẽberãrã siɗa jõbiya.
10 Maʉ̃ awara Jezabel siɗa beaɗapeɗa Jezreel puru caita usaba coɗia. Idjira jouɗaẽ́a.–*
Cũdraba mãwã jarapeɗa dji deɗe eɗa wãbadara ewapeɗa pira wãsia.
11 Jehú wayacusa sordao bororã duanʉma jũẽbʉrʉɗe aɓaʉba iwiɗisia:
–Mẽrã, jãʉ̃ cũdra quĩrãẽ́ ɓʉra ¿cãrẽ cãrẽã ze ɓasi? ¿Cãrẽda sãwãsi?–
Jehúba panusia:
–Bãrãba cawa panʉa jãʉ̃gʉca ɓeara sãwã beɗeabadada.–
12 Maʉ̃ne ãdjirãba jarasiɗaa:
–Bʉa sewada o ɓʉa. Idjia jaraɗara dairãa nẽbʉrʉdua.–
Jehúba panusia:
–Idjia mʉ̃́a jarasia: “Ãcõrẽba nãwã jara ɓʉa: mʉ̃a bʉra Israelɗebema boroda ɓʉbʉrʉa.”–
13 Maʉ̃ ũrĩnapeɗa ãdjirãba cacuaɗe jʉ̃ panʉra dume quiɗaɗe isabe tõcuasiɗaa Jehúra maʉ̃ ʉ̃rʉ̃ nĩbamãrẽã.* Maʉ̃be cachiru zaɗapeɗa jĩgua jarasiɗaa:
–¡Jehúra dadjirã boroa!–
30 Mãwãnacarea Jehúra Jezreel puruɗaa wãsia. Jezabelba Jehú zebʉrʉda ũrĩsiɗe idji daura soacuasia idjaɓa idji buɗara biya erusia. Maʉ̃be dajadaa acʉbadaɗeba eɗaa acʉ nũmesia.
31 Jehú dji puruɗe eɗa wãbadama jũẽsiɗe Jezabelba idjía jarasia:
–Mẽrã, Zimri quĩrãca ɓʉ, bʉ boro beaɗa.–*
32 Maʉ̃ne Jehúba ʉ̃taa dji dajadaa acʉbadamaa acʉpeɗa jĩgua jarasia:
–¿Jãma eɗa caida mʉ̃are ɓʉ?–
Ara maʉ̃da nezoca dji droma ɓea umé wa ũbea panʉba eɗaa Jehúmaa acʉsiɗaa.
33 Maʉ̃ne Jehúba ãdjirãa jarasia:
–¡Jezabelera uɗu ɓatabueɗadua!–
Ara maʉ̃da idjira uɗu ɓatabuesiɗaa. Maʉ̃ne cawayoba idji ʉ̃rʉ̃ tʉgabʉdaɗe idji oaba cawayora, puru auɗu jũrã ca ɓʉ siɗa tãũcuasia.
34 Maʉ̃be Jehúra Jezabel deɗe eɗa ne coɗe wãsia. Ne coɗacarea nãwã jarasia:
–Jãʉ̃ wẽrã cadjiruara jouɗe wãnadua. Idjira Sidoʉ̃nebema boro cau bẽrã jouɗia.–
35 Baribʉrʉ jouɗi carea wãsiɗaɗe aɓabe dji boroda, dji jʉwada, dji jĩrũ siɗa unusiɗaa.
36 Ãdjirãba Jehúa jaraɗe wãsiɗaa. Maʉ̃ne Jehúba jarasia:
–Ãcõrẽba jaraɗa quĩrãca mãwãsia. Tisbéɗebema Elíaɗeba Ãcõrẽba jarasia: Jezreel puru caita Jezabelera beaɗapeɗa usaba coɗia.*
37 Idji cacua ãrĩcuaɗara ãcaca quĩrãca Jezreel ẽjũãne taɓeaɗia. Mãwã ni aɓaʉba poya jaraɗaẽ́a: naʉ̃gʉra Jezabel basía.–
