2 Samuel 11:1-27
11 Poaɗe naʉ̃ ẽjũãnebema bororãba ãdji sordaorãda djõne edebadjiɗaa. Maʉ̃ne Daviba jũma idji sordaorãda, ãdji boro Joáda, idjiare ɓea siɗa amonitarã ume djõne diabuesia. Amonitarãda zocãrã quenanapeɗa ãdji puru Rabáda jũrã edasiɗaa. Mãwã djõ panʉmisa Davira Jerusaleʉ̃ne ɓasia.
2 11:2-4 Ewari aɓa quewara Davira cãĩ edapeɗa piradrʉsia. Maʉ̃be idji de ʉ̃rʉ̃ wãsia. Mamaʉba eɗaa acʉbʉrʉɗe wẽrã biya quiruda unusia. Maʉ̃ wẽrãra idji jeɗeco ununa carea cui ɓasia Ãcõrẽ quĩrãpita bia ɓai carea.* Daviba ʉ̃cʉrʉ diabuesia idjira caida cawai carea. Jẽda zeɗapeɗa Davia jarasiɗaa Eliaʉ̃ cau Betsabéda mãwã ɓʉda. Idji quimara Uría abadjiɗaa. Maʉ̃ Uríara hititarãnebema basía. Maʉ̃be Daviba ʉ̃cʉrʉ diabuesia Betsabéra idjimaa enenamãrẽã. Betsabéra idjimaa zepeɗa ãbaa cãĩsiɗaa. Mãwãnacarea diguiɗaa wãsia.
5 Betsabéra ɓiogoa ɓeɗa bẽrã Davia cawabisia.
6 Maʉ̃ carea Daviba idji sordaorã boro Joámaa beɗeada diabuesia hititaɗebema Uría abadara idjimaa zebimãrẽã. Ara maʉ̃da Joába Uríara diabuesia.
7 Uría jũẽsiɗe Daviba idjía iwiɗisia Joára, idji sordaorã siɗa sãwã panʉ cawaya. Idjaɓa iwiɗisia ãdjirã djõ panʉne sãwã wãnada.
8 Mãwã nẽbʉrʉɗapeɗa Daviba Uríaa jarasia diguiɗaa ʉ̃nãũne wãmãrẽã.* Uría Davi deɗeba wãnacarea Daviba djico dji biara ɓʉda Uríamaa diabuesia comãrẽã.
9 Baribʉrʉ Uríara idji diguiɗaa wãẽ́ basía. Ãtebʉrʉ Davi wagabada sordaorã cãĩbadama Davi deɗe eɗa wãbada caita cãĩsia.
10 Daviba ũrĩsia Uríara diguiɗaa wãẽ́ basida. Maʉ̃ carea trʉ̃peɗa nãwã iwiɗisia:
–Bʉ tʉmʉba zeɗada ¿sãwãẽrã diguiɗaa wãẽ́ basi?–
11 Maʉ̃ne Uríaba panusia:
–Ãcõrẽ baurudera, Judaɗebema sordaorãra, waabema israelerã sordaorã siɗa ãdji wua de zaqueɗe cãĩ panʉa. Mʉ̃ boro Joára, idjiare ɓea siɗa puru tʉmʉ cãĩ panʉa. Maʉ̃ bẽrã biẽ́ ɓʉa mʉ̃ra diguiɗaa wãpeɗa ne coida idjaɓa mʉ̃ quima ume cãĩda. Mʉ̃ boro, wãrãneba mʉ̃a jaraya: mãwã oẽ́a.–
12 Maʉ̃ne Daviba idjía jarasia:
–Iɗi biɗa nama ɓedua. Nubʉrʉ jẽda djõne wãbiya.–
Daviba mãwã jaraɗa bẽrã Uríara Jerusaleʉ̃ne ɓesia.
13 Maʉ̃ne Daviba idjira ne coɗe trʉ̃bisia. Ne co panʉne Daviba itua dawapeɗa Uríara beu nũmesia. Queuɗacarea Uríara dajadaa Davi wagabada sordaorãmaa cãĩne wãsia. Diguiɗaa wãẽ́ basía.
14 Uríara idji quima ume cãĩnaẽ́ bẽrã nurẽma Daviba cartada Joá itea ɓʉsia. Maʉ̃ cartara Uría ume diabuesia.
15 Dji cartaɗe nãwã ɓʉ́ ɓasia: “Dadjirã dji quĩrũ mẽsrãara ɓea djõ panʉma Uríara djõbidua. Maʉ̃be iduɓa ametaɗadua beaɗamãrẽã.”
16 Joába idji sordaorã ume amonitarã purura jũrã eropanasiɗaa uracaɗi carea. Maʉ̃ bẽrã idjia cawa ɓasia sãma amonitarã dji mẽsrãara ɓeara djõ panʉda. Uríara mama djõbisia.
17 Mãwã ɓʉɗe amonitarãra Joá sordaorã ume djõni carea ãdji puruɗeba dajadaa zeɗapeɗa Davi sordaorãda ʉ̃cʉrʉ beasiɗaa. Hititaɗebema Uría abada siɗa beasiɗaa.
18 Maʉ̃be Joába ãdji djõ panʉnebemada aɓa Davia jũma jaraɗe diabuesia.
19 Wãi naẽna nãwã jarasia:
–Dadji djõ panʉnebemara dadjirã boro Davia jũma nẽbʉrʉdua.
20 Dadjiɗebemada ʉ̃cʉrʉ beasiɗada ũrĩbʉrʉɗe idjira quĩrũpeɗa ãĩbẽrã nãwã jaraisicada: “Bãrã djõ panʉne ¿cãrẽ cãrẽã dji puru auɗu jũrã ca ɓʉ caita wãsiɗa? ¿Mamaʉba ãdjirãba ne bariduaba taɓaribadada adua panasiɗaca?
21 ¿Quĩrãdoasiɗaca sãwã wẽrãba Jerobaal warra Abimelera Tebé puruɗe beasida? Dji puru auɗu jũrã ca ɓʉɗeba yu waiɓʉada Abimele ʉ̃rʉ̃ ɓaebisia.* Maʉ̃da bãrãra ¿cãrẽ cãrẽã dji puru auɗu jũrã ca ɓʉ caita wãsiɗa?” Dadji boro Davida mãwã quĩrũibʉrʉ nãwã jaradua: “Mʉ̃ boro, bʉ sordao hititaɗebema Uría siɗa beasiɗaa.”–
22 Ara maʉ̃da Joába diabueɗaba jaraɗe wãsia. Davima jũẽpeɗa Joába jarabiɗada jũma nẽbʉrʉsia.*
23 Nãwã jarasia:
–Amonitarãra ãdji puruɗeba dajadaa djõne zeɗapeɗa daira poyabʉda basía. Baribʉrʉ daiba ãdjirãra jẽda ãdji puruɗe eɗa wãbadamaa mĩrũ wãbisiɗaa.
24 Maʉ̃ne cha drʉbadaba dji puru auɗu jũrã ca ɓʉɗeba daimaa drʉ panesiɗaa. Maʉ̃ba bʉ sordaorãra ʉ̃cʉrʉ beasiɗaa. Hititaɗebema Uría abada siɗa beasiɗaa.–
25 Maʉ̃ ũrĩpeɗa Daviba dji jaraɗe zeɗaa nãwã jarasia:
–Joáa jaradua jũmawãyã crĩcharãmãrẽã. Djõ panʉne ʉ̃cʉrʉ beubadaa. Baribʉrʉ jaradua jãʉ̃ puru ume wetara djõnamãrẽã aɓa poyabʉdaɗaa. Maʉ̃ beɗeaba idjira sobiaya.–
26 Uría beapeɗaɗa cawasiɗe dji quimaba sopua ewarida wagasia.
27 Idji sopua ewari jõnacarea Daviba idji deɗaa enebipeɗa edasia. Maʉ̃be wẽrãba Davi warrada tosia. Baribʉrʉ Daviba oɗara Ãcõrẽba biẽ́ unusia.
Beɗea eɗaare
^ 11:2-4 Levitico 15:19-24
^ 11:8 Ʉ̃nãũne wãmãrẽã. Hebreo beɗeaɗe ɓʉ́ ɓʉa: “Jĩrũ sʉgʉɗe wãmãrẽã.”
^ 11:21 Juece 9:50-54
^ 11:22 Griego beɗeaɗe idjaɓa nãwã ɓʉ́ ɓʉa: “Maʉ̃ne Davira Joá ume quĩrũpeɗa dji jaraɗe wãnaa nãwã jarasia: Bãrã djõsiɗaɗe ¿cãrẽ cãrẽã dji puru jũrã ca ɓʉ caita wãsiɗa? ¿Mamaʉba ãdjirãba ne bariduaba taɓaribadada adua panasiɗaca? ¿Quĩrãdoasiɗaca sãwã wẽrãba Jerobaal warra Abimelera Tebé puruɗe beasida? Dji puru auɗu jũrã ca ɓʉɗeba yu waiɓʉada Abimele ʉ̃rʉ̃ ɓaebisia. Maʉ̃da bãrãra ¿cãrẽ cãrẽã dji puru auɗu jũrã ca ɓʉ caita wãsiɗa?”
