2 Samuel 12:1-31
12 Mãwãnacarea Ãcõrẽba Nataʉ̃da Davimaa wãbisia. Jũẽpeɗa Davia nãwã nẽbʉrʉsia:
–Puru aɓaʉɗe ẽberãda umé panasiɗaa.
2 Aɓa ne bara ɓasia. Idjia ovejada, paca siɗa zocãrã eroɓasia. Dewarabemara ne neẽ́ querasia.
3 Idjia nẽdoɗa oveja wẽrã zaqueda aɓabe eroɓasia. Maʉ̃ oveja zaquera daupẽsia. Ovejara dji ẽberã ume idjaɓa idji warrarã ume ãbaa warisia. Dji ẽberãba coi carea eroɓʉɗebemada ovejaa cobibadjia. Idji tazaɗe baidoda dobibadjia. Idjaɓa ovejara idji caita cãĩbadjia. ¡Maʉ̃ ẽberãba dji oveja zaquera idji cau quĩrãca bio quĩrĩã ɓasia!
4 Ewari aɓa ẽberãda dji ne bara ɓʉmaa zesia. Ne bara ɓʉba maʉ̃ ẽberãa ne cobida crĩchasia baribʉrʉ idji animarãnebemada bea quĩrĩãẽ́ basía. Ãtebʉrʉ ne neẽ́ quiru oveja zaqueda jãrĩpeɗa beasia. Maʉ̃be djusia idjimaa zeɗaba comãrẽã.–
5 Maʉ̃ ũrĩbʉrʉɗe ẽberãba oveja zaque jãrĩna carea Davira bio quĩrũpeɗa Nataʉ̃a nãwã jarasia:
–¡Ãcõrẽ quĩrãpita wãrãneba mʉ̃a jaraya: mãwã oɗa ẽberãra beuida ɓʉa!
6 Ne neẽ́ quirura quĩrã djuburiaɗaẽ́ bẽrã dji oveja zaque nẽbʉara ɓarima quĩmãrẽ jẽda diaida ɓʉa.–
7 Maʉ̃ne Nataʉ̃ba Davia jarasia:
–¡Bʉdrʉ jãʉ̃ ẽberãa! Maʉ̃ carea dadji israelerã Ãcõrẽba nãwã jara ɓʉa: “Mʉ̃a bʉra ɓʉsia israelerã boroda ɓamãrẽã. Idjaɓa Saulba bea quĩrĩã ɓaɗaɗebemada ẽdrʉ ɓʉsia.
8 Maʉ̃ awara mʉ̃a Saul israelerã boro baɗada jãrĩpeɗa bʉ́a diasia. Idji wẽrãrã siɗa diasia. Mʉ̃a bʉra Judaɗebemarã, waabema israelerã boroda ɓʉsia. Mʉ̃a bʉ́a diaɗada cʉrebaeɗabara auɗuara diacasia.
9 12:9-10 Bʉa ¿cãrẽ cãrẽã mʉ̃ beɗeara igarasi? ¿Cãrẽ cãrẽã osi mʉ̃a cadjirua unu ɓʉda? Bʉra mĩã beasia. Bʉa hititaɗebema Uría abadada amonitarãa beabisia. Maʉ̃be idji quimara edasia. Bʉa mʉ̃ra mãwã igaraɗa bẽrã iɗiba ʉ̃taa bãrã djõbʉdaɗe bʉ warrarãra ãdjiɗeba yõbʉdarã siɗa ʉ̃cʉrʉ beuɗia.
11 Mʉ̃a nãwã jaraya: bʉ ẽberãrãnebema aɓaʉba bʉra biẽ́ oya. Bʉ quĩrãpita mʉ̃a bʉ wẽrãrãda jãrĩpeɗa aɓaʉa diaya. Maʉ̃ ẽberãra israelerã quĩrãpita bʉ wẽrãrã ume cãĩya.
12 Bʉa cadjirua oɗara mẽrã osia baribʉrʉ maʉ̃ ẽberã bʉ wẽrãrã ume cãĩbʉrʉɗe mʉ̃a jũma israelerãa unubiya.”–
13 Daviba Nataʉ̃a jarasia:
–Wãrãda mʉ̃a Ãcõrẽ quĩrãpita cadjiruada osia.–
Nataʉ̃ba panusia:
–Bʉa cadjirua oɗara Ãcõrẽba quĩrãdoaya. Maʉ̃ bẽrã bʉra beuẽ́a.
14 Baribʉrʉ bʉa Ãcõrẽ quĩrãpita bio cadjirua oɗa bẽrã bʉ warra zaqueda jaiɗaya.–*
15 Nataʉ̃ diguiɗaa wãnacarea Uría quimaba Davia to diaɗa warrara Ãcõrẽba bio cacua biẽ́ ɓʉsia.
16 Maʉ̃ne Daviba idji warra carea Ãcõrẽa beɗea djuburiasia. Ne coẽ́ ɓasia idjaɓa egode cãĩbadjia.
17 Dji dromarã idji deɗe panabadaba jarabadjiɗaa piradrʉmãrẽã. Mãwãmĩna ĩjãca basía. Idjaɓa ãdjirã ume ne co quĩrĩãca basía.
18 Mãwã ɓʉɗe siete ewariɗe dji warrara jaiɗasia. Maʉ̃ne dji dromarãba Davia jaraɗida waya panasiɗaa. Nãwã crĩcha panasiɗaa:
–Idji warra waɗi zocai ɓasiɗe sobiamãrẽã idji ume beɗeabadjiɗamĩna dadji beɗeara ĩjãca basía. Maʉ̃da ¿sãwãbʉrʉ idjía jaraɗi dji warrara jaiɗasida? Sopuaba ara iduɓa biẽ́ oisicada.–
19 Daviba unusia dji dromarãra ãdjiduɓa beɗea panʉda. Maʉ̃gʉɗeba cawasia idji warrara jaiɗasida. Maʉ̃ bẽrã iwiɗisia:
–¿Mʉ̃ warrara jaiɗasica?–
Ãdjia panusiɗaa:
–Mãẽ, jaiɗasia.–
20 Ara maʉ̃da Davira egodeba piradrʉpeɗa cuiɗe wãsia. Cuipeɗa querada pãpeɗa djiopeɗa Ãcõrẽ deɗe eɗa wãsia bia beɗeai carea. Mãwãnacarea diguiɗaa wãpeɗa jarasia idjira ne cobiɗamãrẽã. Maʉ̃be ne cosia.
21 Ne co ɓʉɗe dji dromarãba iwiɗisiɗaa:
–Dai boro, ¿cãrẽã jãwã o ɓʉ? Bʉ warra waɗi zocai ɓasiɗe bʉra ne coca basía idjaɓa idji carea jĩã ɓabadjia. Baribʉrʉ bʉ warra jaiɗaɗacarea ¡bʉra piradrʉpeɗa ne co ɓʉa!–
22 Daviba panusia:
–Mʉ̃ warra zocai ɓasiɗe mʉ̃ra ne coẽ́ jĩã ɓasia. Mʉ̃a crĩcha ɓasia ãĩbẽrã Ãcõrẽba mʉ̃ra quĩrã djuburiapeɗa mʉ̃ warrara zocai ɓʉisicada.
23 Baribʉrʉ jaiɗaɗa bẽrã mʉ̃a idjira poya waya zocai ɓʉẽ́a. Maʉ̃da ¿cãrẽ cãrẽã ne coẽ́ ɓai? Mʉ̃a idjira unune wãya baribʉrʉ idjira mʉ̃maa waa zeẽ́a.–
Salomoʉ̃ toɗa
24 Idji warra jaiɗaɗa carea Daviba idji quima Betsabéra sobiabipeɗa idji ume cãĩsia. Betsabéra ɓiogoa ɓepeɗa warrada tosia. Maʉ̃ warrara Daviba trʉ̃ ɓʉsia Salomoʉ̃.* Ãcõrẽba maʉ̃ warrara bio quĩrĩãsia.
25 Bio quĩrĩãna bẽrã idjiɗeba beɗeabari Nataʉ̃ra Davimaa diabuesia. Idjia jarabisia maʉ̃ warrara Jedidía trʉ̃ ɓʉmãrẽã.*
Daviba Rabá puru poyaɗa
26 Maʉ̃misa Joára idji sordaorã bara amonitarã ume Rabá puruɗe djõ panasiɗaa. Maʉ̃ne purura poyabʉda basía.
27 Maʉ̃ bẽrã idjia ʉ̃cʉrʉ Davimaa nãwã jaraɗe diabuesia: “Mʉ̃ra Rabá puru ume djõpeɗa ãdji baido juebadara mʉ̃ jʉwaeɗa eroɓʉa.
28 Waabema sordaorãda isabe enepeɗa purura jũrã edaɗadua. Mãwã bʉabʉrʉ purura poyaya. Bʉda zeẽ́bʉrʉ, mʉ̃a poyapeɗa purura mʉ̃ trʉ̃da ɓʉɗia.”
29 Ara maʉ̃da Daviba idji sordaorãda jũma jʉresia. Maʉ̃be Rabá puruɗaa djõne edepeɗa poyasia.
30 Daviba Rabá puruɗebema boro nepe oro oɗada edasia. Dji zʉgʉara 75 libra ɓasia.* Mõgara nẽbʉa biya queɗeada maʉ̃ nepeɗaa cara ɓeasia. Maʉ̃ra Davi boro ʉ̃rʉ̃ jira ɓʉsiɗaa. Maʉ̃ awara Daviba Rabá puruɗebema ne bia queɗeada zocãrã edasia.
31 Rabáɗebemarãra Daviba jidapeɗa õgo trajabisia. Ʉ̃cʉrʉa bacuruda ʉrrabisia, ʉ̃cʉrʉa egoroɗe corobisia, ʉ̃cʉrʉa zagaraba bacuruda tutabisia, idjaɓa ʉ̃cʉrʉa de obada mõgarada obisia.* Amonitarã puruza Daviba mãwã obisia. Mãwãnacarea Davira jũma idji sordaorã ume jẽda Jerusaleʉ̃naa wãsiɗaa.
Beɗea eɗaare
^ 12:14 Bʉa Ãcõrẽ quĩrãpita bio cadjirua oɗa bẽrã. Hebreo beɗea ʉ̃cʉrʉ cartaɗe nãwã ɓʉ́ ɓʉa: “Bʉa Ãcõrẽ dji quĩrũa idjiɗebemada biẽ́ beɗeabiɗa bẽrã.”
^ 12:24 Hebreo beɗeaɗe ebuɗa ɓʉẽ́a caiba dji warrara trʉ̃ ɓʉsida. Ʉ̃cʉrʉmaarã Betsabéba trʉ̃ ɓʉsia.
^ 12:25 Hebreo beɗeaɗe Jedidía trʉ̃ba jara ɓʉa: “Ãcõrẽba quĩrĩã ɓʉ.”
^ 12:30 75 libra. Hebreo beɗeaɗe ɓʉ́ ɓʉa “talento aɓa.” Rabá puruɗebema boro. Hebreo beɗeaɗe ɓʉ́ ɓʉa “Milcoʉ̃.” Ʉ̃cʉrʉmaarã Milcoʉ̃ra ãdji jʉwaba oɗa ãcõrẽ basía.
^ 12:31 De obada mõgarada obisia. Hebreo beɗeaɗe ebuɗa ɓʉẽ́a cãrẽda obisida.
