2 Samuel 7:1-29
7 Ãcõrẽba israelerã boro Davira dji quĩrũ ume necai ɓʉsia. Maʉ̃ awara Davira idji de dromane ɓesia.
2 Ewari aɓa Daviba Ãcõrẽneba beɗeabari Nataʉ̃a nãwã jarasia:
–Acʉdua. Mʉ̃ de dromara dji biara ɓʉ bacuru oɗaa baribʉrʉ Ãcõrẽ baurudera wua deɗe ɓʉa.* Maʉ̃ carea mʉ̃a Ãcõrẽ itea de dromada o quĩrĩã ɓʉa.–
3 Nataʉ̃ba panusia:
–Ãcõrẽra bʉ ume ɓʉ bẽrã bʉa crĩcha ɓʉra jũma odua.–
4 Baribʉrʉ maʉ̃ diamasi Ãcõrẽba Nataʉ̃a nãwã jarasia:
5 –Mʉ̃ nezoca Davia nãwã jaraɗe wãdua: “Ãcõrẽba nãwã jara ɓʉa: bʉa mʉ̃ itea de dromada oiẽ́ ɓʉa.
6 Mʉ̃a bãrã israelerã Egiptoɗeba ẽdrʉ enena ewariɗeba mʉ̃ra de araɗe ɓacaa. Ãtebʉrʉ bãrã wãbʉdaza mʉ̃ wua deda edeɗapeɗa maʉ̃ne eɗa ɓabaria.
7 Mʉ̃ bãrã drõã naẽnabemarã ume nĩbasiɗe mʉ̃ puru Israel pe eronĩbapeɗaɗarãa jaraca basía mʉ̃ itea dji biara ɓʉ bacuru deda oɗamãrẽã.”
8 Maʉ̃ carea Nataʉ̃, mʉ̃ nezoca Davia nãwã jaradua: “Ãcõrẽ jũma poya ɓʉba nãwã jara ɓʉa: mʉ̃a bʉra oveja wagabari baɗada edasia mʉ̃ puru Israel boroda ɓamãrẽã.
9 Bʉ wãbʉrʉza mʉ̃ra bʉ ume ɓasia. Mʉ̃a bʉ dji quĩrũda poyabisia, idjaɓa mʉ̃a bʉra trʉ̃ ɓʉga ɓʉsia naʉ̃ ẽjũãne dewara trʉ̃ ɓʉga ɓea quĩrãca.
10 7:10-11 Maʉ̃ awara mʉ̃a ẽjũãda mʉ̃ puru Israel itea edasia ewariza mama ɓeaɗamãrẽã. Ni aɓaʉba ãdjirãra mamaʉba ãyã ɓʉɗaẽ́a.* Ẽberã cadjiruarãba ãdjirãra waa biẽ́ oɗaẽ́a mʉ̃a ãdji ẽdrʉ ɓʉbadarã diabuesi ewariɗe biẽ́ o panana quĩrãca. Iɗira mʉ̃a bʉra dji quĩrũ ume necai ɓʉya.
Maʉ̃ awara mʉ̃a jaraya iɗiba ʉ̃taa bʉɗeba yõbʉdara israelerã boroda ɓʉya.
12 Maʉ̃ bẽrã bʉ jaiɗaɗacarea mʉ̃a bʉ warrada aɓa ɓʉya dji boroda ɓamãrẽã. Mʉ̃a idjira carebaya mʉ̃ purura bia pe eroɓamãrẽã.
13 Idjiabʉrʉ mʉ̃ itea de dromada oya. Idjiɗeba mʉ̃a israelerã boroda jũma yõbigaya.
14 Mʉ̃ra idji zeza baya maʉ̃ne idjira mʉ̃ warra baya. Idjia cadjiruada osira mʉ̃a uya dji zezaba idji warra soaba ubari quĩrãca.
15 Baribʉrʉ mʉ̃a idjira quĩrĩã ɓaya. Idjira igaraẽ́a Saul igaraɗa quĩrãca. Mʉ̃a Saulora igarasia bʉda dji boroda ɓʉi carea.
16 Mʉ̃a bʉɗeba yõbʉdara idu jõbiẽ́a. Iɗiba ʉ̃taa mʉ̃a ãdjirãra israelerã boroda ɓʉya.”–
17 Ãcõrẽba cawabiɗara Nataʉ̃ba Davia jũma nẽbʉrʉsia.
18 Maʉ̃be Daviba Ãcõrẽ quĩrãpita nãwã jarasia:
–Mʉ̃ Boro Ãcõrẽ, mʉ̃ra dji dromaẽ́a. Mʉ̃ ẽberãrã siɗa dji dromarãẽ́a. ¿Cãrẽ cãrẽã mʉ̃ra israelerã boroda ɓʉsi?
19 Maʉ̃ awara bʉa jara ɓʉa mʉ̃, bʉ nezocaɗeba yõbʉdara ewariza israelerã boroda ɓeaɗida. ¿Caiba bʉ quĩrãca bia obari?*
20 Mʉ̃ Boro Ãcõrẽ, bʉa mʉ̃ crĩchara cawa ɓʉa. Maʉ̃ bẽrã za quiru nezocaba ¿cãrẽda poya jarai?
21 Bʉa maʉ̃ biara oyaɗa aɗa bẽrã idjaɓa o quĩrĩãna bẽrã wãrãda jũma opeɗa za quirúa cawabisia.
22 Mʉ̃ Boro Ãcõrẽ, bʉra dji dromaara ɓʉa. Bʉ quĩrãca dewara neẽ́a. Dairãba ũrĩbadjiɗaa wãrã ãcõrẽda bʉ awara neẽ́da.
23 Maʉ̃ awara bʉ puru Israel quĩrãca naʉ̃ ẽjũãne dewara puruda neẽ́a. Ãcõrẽ, bʉa dairãra Egiptoɗebemada ẽdrʉ edasia bʉ puruda ɓamãrẽã. Mãwã bʉra trʉ̃ ɓʉgasia. Ne ununaca waiɓʉa ɓea o ɓʉɗeba bʉa dewara ẽberãrãda, ãdji ãcõrẽ ɓea siɗa dairã quĩrãpita ãyã jʉrecuasia.
24 Bʉa dai israelerãra ɓʉsia ewariza bʉ puruda ɓamãrẽã. Maʉ̃ne bʉra dai Ãcõrẽda ɓesia.
25 Ãcõrẽ, bʉa za quiru nezoca itea idjaɓa mʉ̃ warrarã itea iɗiba ʉ̃taa oi jaraɗara wãrãda odua.
26 Mãwã ewariza bʉra dji dromaana aɗia. Maʉ̃ awara nãwã jaraɗia: “Ãcõrẽ jũma poya ɓʉra dai israelerã Ãcõrẽa.” Maʉ̃ne bʉa mʉ̃ra, mʉ̃ warrarã siɗa waga eroɓadua ewariza israelerã boroda ɓeaɗamãrẽã.
27 Ãcõrẽ ne jũma poya ɓʉ, dai israelerã Ãcõrẽ, bʉabʉrʉ cawabisia mʉ̃ra, mʉ̃ warrarã siɗa ewariza israelerã boroda ɓeaɗida. Maʉ̃ carea mʉ̃ra bʉ nezocamĩna ne wayaa neẽ́ nãwã beɗea ɓʉa.
28 Mʉ̃ Boro Ãcõrẽ, bʉra wãrãda Ãcõrẽa. Bʉra beɗea aɓa ɓʉa. Bʉa za quiru nezocaa maʉ̃ ne biara oi jarasia.
29 Maʉ̃ carea mʉ̃ra, mʉ̃ warrarã siɗa careba ɓadua ewariza bʉ quĩrãpita bia panani carea. Bʉa jaraɗa quĩrãca oya. Bʉa carebayaɗa aɗa bẽrã wãrãda ewariza bia panania.–
