2 Tesalonica 2:1-16
2 2:1-2 Maʉ̃ awara djabarã, daiba bãrãa beɗea djuburiaɗia dadjirã Boro Jesucrito zeiɗebemada idjaɓa dadjirã idji ume ãbaa dji jʉreɗiɗebemada ãĩ crĩcharãnamãrẽã. Aɓaʉba dadjirã Boroba cawa oi ewarira jũẽsiaɗa aibʉrʉ, dauperarãnadua. Bariduaba Ãcõrẽneba beɗea ɓʉ quĩrãca mãwã jaraibʉrʉ, wa mãwã jaradiaibʉrʉ, wa daiba cartaɗe mãwã ɓʉsiɗaaɗa aibʉrʉ, ĩjãrãnadua.
2 –
3 Ni maãrĩ biɗa aɓaʉa idu cũrũgabirãnadua. Dadjirã Boroba cawa oi ewari zei naẽna zocãrã ẽberãrãba Ãcõrẽra igaraɗia. Maʉ̃ne cadjiruaɗebema ẽberãda odjaya. Maʉ̃ ẽberãra Ãcõrẽba tʉbʉ uruaɗe ɓatabueya.
4 Idjia Ãcõrẽra idjaɓa ne jũma ẽberãrãba ãcõrẽ abada siɗa quĩrĩãca baya. Idjida jũma maʉ̃gʉ cãyãbara dji dromaara ɓʉaɗa aya. Maʉ̃ bẽrã Ãcõrẽ de dromane chũmepeɗa jaraya idjidrʉ Ãcõrẽda.
5 Bãrãma ɓasiɗe mʉ̃a ¿maʉ̃gʉra jaraẽ́ basica? ¿Quĩrãnebaɗaẽ́ca?
6 Maʉ̃ bẽrã cawa panʉa cãrẽba maʉ̃ ẽberãra idu odjabiẽ́ ɓʉda. Baribʉrʉ idji ewari jũẽbʉrʉɗe odjaya.
7 Nawena cadjiruara mẽrã o nĩnaa, baribʉrʉ dji iduaribiẽ́ ɓʉba maʉ̃ cadjiruaɗebema ẽberãra idu odjabiẽ́ ɓʉa. Mãwã ɓaya aɓa Ãcõrẽba dji iduaribiẽ́ ɓʉra ãyã edebʉrʉɗaa.
8 Maʉ̃bebʉrʉ cadjiruaɗebema ẽberãra odjaya. Baribʉrʉ dadjirã Boro Jesu quĩrãwãrẽã dorrodorroa zebʉrʉɗe ara beɗeabʉrʉba maʉ̃ ẽberãra beaya.
9 Cadjiruaɗebema ẽberãra diauruba zebiya. Diauru ʉɓʉaba ne ununacada quĩrãtanoa ocuaya ẽberãrãba Ãcõrẽba mãwã o ɓʉda crĩchaɗamãrẽã.
10 Ne quĩrãtanoa cadjirua o ɓʉɗeba ẽberãrã tʉbʉ uruaɗe bia mĩgaɗida panʉra cũrũgaya. Ãdjirãba wãrã beɗeada quĩrĩãnaca bẽrã Ãcõrẽba ẽdrʉ edaẽ́a.
11 Ãtebʉrʉ idu sewada ĩjãbiya. Mãwã ara ãdjiduɓa bio cũrũga ɓeaɗia.
12 Maʉ̃ ẽberãrã wãrã beɗea ĩjãẽ́ ɓeaba cadjiruada ɓʉsriɗaa obada bẽrã Ãcõrẽba biẽ́ ɓʉya.
Ãcõrẽba idji ĩjã ɓea ẽdrʉ edaɗa
13 Djabarã, daiba ewariza bãrã carea Ãcõrẽa bia ɓʉaɗa abadaa. Dadjirã Boroba bãrãra quĩrĩã ɓʉa. Idjia bãrãra ẽdrʉ edai carea naẽnaeɗa edasia. Bãrãba idji wãrã beɗea ĩjã panʉ bẽrã idjaɓa idji Jaureba bãrãra idji itea bia ɓʉɗa bẽrã ẽdrʉ edaya.
14 Daiba beɗea bia Critoɗebema jaradia panʉneba Ãcõrẽba bãrãra trʉ̃sia dadjirã Boro Jesucrito bia quiruɗebemada edaɗamãrẽã.
15 Maʉ̃ bẽrã djabarã, zarea ɓeaɗadua. Daiba jaradiapeɗaɗara, cartaɗe ɓʉpeɗaɗa siɗa quĩrãdoarãnadua.
16 2:16-17 Ãcõrẽba dadjirãra quĩrĩãsia. Idji biaɗeba sobiabicuasia ewariza mãwã ɓeaɗamãrẽã. Idjaɓa cawabisia wãrãda idjiɗeba nebiada edaɗida. Daiba quĩrĩã panʉa dadjirã Boro Jesucritoba, dadjirã Zeza Ãcõrẽ biɗa bãrãra sobiabiɗida idjaɓa zarea ɓʉɗida. Mãwã bãrãba beɗea panʉra, o panʉ siɗa jũma bia ɓaya.
