2 Tesalonica 3:1-18
3 Maʉ̃ awara djabarã, dai carea Ãcõrẽa iwiɗiɗadua dadjirã Boro beɗeara druaza isabe jũẽmãrẽã idjaɓa ẽberãrãba maʉ̃nebemada bia jaraɗamãrẽã bãrã tãẽna mãwãna quĩrãca.
2 Ãcõrẽa iwiɗiɗadua daira ẽberã cadjiruarãba biẽ́ o quĩrĩã panʉnebemada wagamãrẽã. Ãcõrẽ ĩjã quĩrĩãẽ́ ɓeada baraa.
3 Baribʉrʉ dadjirã Borora beɗea aɓa ɓʉa. Idjia bãrãra careba ɓaya zarea ɓeaɗamãrẽã idjaɓa cadjiruaɗebemada waga ɓaya.
4 Dadjirã Boroɗeba cawa panʉa daiba jaradiapeɗaɗara bãrãba wãrãda o panʉda idjaɓa o pananida.
5 Quĩrĩã panʉa dadjirã Boro Ãcõrẽba cawabida bãrãra bio quĩrĩã ɓʉda. Idjaɓa quĩrĩã panʉa idjia carebaida Critoba droaɗa quĩrãca droaɗamãrẽã.
Coa neẽ́ trajaɗida panʉ
6 Djabarã, dadjirã Boro Jesucrito trʉ̃neba daiba bãrãa jaraɗia djabarã coaiɗa ɓea ume ãbaa ɓearãnamãrẽã. Daiba jaradiapeɗaɗa quĩrãca oɗacaa.
7 Bãrãba cawa panʉa dai nĩbapeɗaɗa quĩrãca bãrãra nĩbaɗida panʉda. Bãrã tãẽna panasiɗaɗe daira bari pananaca basía.
8 Daiba bãrãneda bari coɗaẽ́ basía, ãtebʉrʉ ãsa, diamasi biɗa ʉ̃nãũnaẽ́ dewara traju siɗa o panasiɗaa bãrãba daia õgo ne diarãnamãrẽã.
9 Wãrãda bãrãba carebaɗamãrẽã iwiɗiɗida pananamĩna iwiɗiɗaẽ́ basía. Ãtebʉrʉ daira trajasiɗaa cawabiɗi carea bãrãba aɓari quĩrãca oɗida panʉda.
10 Bãrã tãẽna panasiɗaɗe daiba naʉ̃da jarasiɗaa: dji traja quĩrĩãẽ́ ɓʉra ne cobirãnadua.
11 Daiba ũrĩ panʉa ʉ̃cʉrʉ bãrãnebemada coaiɗa ɓeada. Ãdjirãra trajaɗacaa ãtebʉrʉ djãrã nẽbʉraɗe panabadaa.
12 Maʉ̃ djabarãa daiba dadjirã Boro Jesucritoɗeba beɗea djuburiaɗia necai trajaɗamãrẽã coɗira eroɓeaɗamãrẽã.
13 Baribʉrʉ djabarã, bia o panʉneba sẽrãnadua.
14 Daiba naʉ̃ cartaɗe jaradiapeɗaɗada aɓaʉba ĩjãẽ́bʉrʉ, jũmarãa cawabiɗadua biẽ́ o ɓʉda. Idji ume ãbaa ɓearãnadua peramãrẽã.
15 Baribʉrʉ idjira bãrã ume dji quĩrũ quĩrãca eroɓearãnadua, ãtebʉrʉ bãrã djaba bẽrã jaraɗadua jipa omãrẽã.
Pauloba jĩrũare ɓʉɗa
16 Daiba quĩrĩã panʉa dadjirã Boro necai ɓai diabariba idji necai ɓaira bãrãa ewariza ne jũmane dia ɓaida. Quĩrĩã panʉa dadjirã Borora bãrã ume ɓaida.
17 Mʉ̃ra Pauloa. Naʉ̃gʉ beɗeada mʉ̃ jʉwaba ɓʉbʉrʉa. Jũma mʉ̃ cartaɗe nãwã ɓʉbaria cawabi carea mʉ̃abʉrʉ ɓʉbʉrʉda. Nãwã ɓʉ́ ɓabaria.
18 Mʉ̃a quĩrĩã ɓʉa dadjirã Boro Jesucritoba idji biaɗeba bãrãra careba ɓaida.
