2 Timoteo 1:1-18
1 Mʉ̃ra Pauloa. Ãcõrẽba quĩrĩãna bẽrã mʉ̃ra Jesucritoba diabueɗaa. Idjia mʉ̃ra diabuesia Ãcõrẽba diai jaraɗa zocai ɓaiɗebemada jaraɗe wãmãrẽã. Maʉ̃ zocai ɓaira Jesucritoɗeba ɓʉa.
2 Timoteo, naʉ̃ cartara bʉ itea ɓʉbʉrʉa. Mʉ̃a bʉra bio quĩrĩã ɓʉa mʉ̃ warra quĩrãca. Quĩrĩã ɓʉa dadji Zeza Ãcõrẽba, dadji Boro Jesucrito biɗa bʉra quĩrã djuburia pananida, ãdji biaɗeba careba pananida, necai ɓai siɗa dia pananida.
Timoteo carea Pauloba Ãcõrẽa bia ɓʉaɗa aɗa
3 Ãsa, diamasi biɗa mʉ̃a Ãcõrẽa iwiɗibʉrʉɗe bʉ carea bia ɓʉaɗa abaria. Ãcõrẽba jara ɓʉra crĩcha biaɗeba obaria mʉ̃ drõã naẽnabemarãba opeɗaɗa quĩrãca.
4 Mʉ̃ wãbʉrʉ carea bʉra jĩãsia. Maʉ̃ crĩchabʉrʉɗe acʉɗe wã quĩrĩã ɓabaria bio ɓʉsriɗa ɓai carea.
5 Mʉ̃a quĩrãneba ɓabaria bʉa Critora wãrãda ĩjã ɓʉda bʉ papadjora Loidaba, bʉ papa Eunice biɗa bʉ naẽna ĩjã panana quĩrãca. Mʉ̃a cawa ɓʉa bʉa biɗa aɓari quĩrãca Critora ĩjã ɓʉda.
6 Mʉ̃ jʉwara bʉ ʉ̃rʉ̃ ɓʉsiɗe Ãcõrẽba bʉ́a diasia idji itea ne omãrẽã. Maʉ̃ carea mʉ̃a jaraya: Ãcõrẽba diaɗara biara ẽpẽ odua.
7 Ãcõrẽba dadjía ne waya ɓai soda diaẽ́ basía, ãtebʉrʉ dadji soɗe diasia jũma poya oɗamãrẽã, quĩrĩãda eroɓeaɗamãrẽã, idjaɓa dadji cacuara jipa eroɓea cawaɗamãrẽã.
8 Maʉ̃ bẽrã dadji Boro Jesucritoɗebemada jarai carea perarãdua. Mʉ̃ra Jesucrito carea preso ɓʉmĩna perarãdua. Ãtebʉrʉ beɗea bia Jesucritoɗebema jaradiabʉrʉɗe Ãcõrẽ ʉɓʉaɗeba bʉ siɗa bia mĩgai carea ɓadua.
9 Ãcõrẽba dadjirãra ẽdrʉ edasia idjaɓa trʉ̃sia idji itea bia ɓeaɗamãrẽã. Dadjia bia o panʉ carea mãwã oẽ́ basía, ãtebʉrʉ idji biaɗeba oida crĩcha ɓaɗa bẽrã mãwã osia. Wãrãda naʉ̃ ẽjũã ɓai naẽna Ãcõrẽba idji biaɗeba crĩchasia Jesucritoɗeba dadjirãra carebaida.
10 Maʉ̃be Jesucrito dadji Ẽdrʉ Edabari zesiɗe unubisia sãwã idji biaɗeba carebabarida. Dadji beuida ɓaɗara Jesucritoba jõbipeɗa ewariza zocai ɓaida diasia. Beɗea bia idjiɗebemaba maʉ̃ra ebuɗa cawabi ɓʉa.
11 Ãcõrẽba mʉ̃ra ɓʉsia maʉ̃ beɗea bia jarabarida ɓamãrẽã, Jesucritoba diabueɗada ɓamãrẽã, idjaɓa judiorãẽ́a jaradiabarida ɓamãrẽã.*
12 Maʉ̃ carea mʉ̃ra bia mĩga ɓʉa. Baribʉrʉ peraẽ́ ɓʉa. Mʉ̃a cawa ɓʉa caida ĩjã ɓʉda. Idjaɓa cawa ɓʉa mʉ̃a idji jʉwaɗe wagamãrẽã ɓʉɗada idjia poya wagaida aɓa idjia cawa oi ewariɗaa.*
13 Mʉ̃a jipa jaradia ɓaɗa quĩrãca jaradia ɓadua. Jesucrito ĩjã ɓʉɗeba, quĩrĩãneba nĩbadua.
14 Ãcõrẽ Jaure dadji soɗe ɓʉba wãrã beɗea Ãcõrẽba bʉ́a diaɗara bio waga ɓadua.
15 Bʉa cawa ɓʉa berara jũma djabarã Asia druaɗebemaba mʉ̃ra igarasiɗada. Djaba Pigeloba, Hermogene biɗa mãwã osiɗaa.
16 Baribʉrʉ mʉ̃a quĩrĩã ɓʉa dadji Boroba djaba Onesiporo ẽberãrãra quĩrã djuburia ɓaida. Idjia mʉ̃ra ɓarima zocãrã carebasia. Mʉ̃ra carenaba jʉ̃ ɓʉmĩna mʉ̃ carea quĩrã peraẽ́ basía.
17 Ãtebʉrʉ Roma puruɗe jũẽpeɗa mʉ̃ra quĩrãcuita jʉrʉ nĩne unusia.
18 Mʉ̃a quĩrĩã ɓʉa dadji Boroba cawa oi ewariɗe idjira quĩrã djuburiaida. Bʉa cawa ɓʉa Onesiporoba Epesoɗe bio carebasida.
