2 Timoteo 2:1-26
2 Mʉ̃ warra, Jesucrito biaɗeba zarea ɓadua.
2 Mʉ̃a zocãrã ẽberãrã quĩrãpita jaradia ɓaɗada bʉa ũrĩsia. Ara maʉ̃ jaradia ɓaɗara bʉa biɗa djabarã jipa ɓeaa jaradia ɓadua ãdjirãba aɓari quĩrãca dewararãa jaradiaɗamãrẽã.
3 Bʉra Jesucrito sordao bia bẽrã mʉ̃ quĩrãca bia mĩgai carea ɓadua.
4 Sordaoba ne baridua ocaa, ãtebʉrʉ idji boroba quĩrĩã ɓʉdrʉ obaria bia unumãrẽã.
5 Idjaɓa dji jemenebarida idji jemeneida ɓʉ quĩrãca jemeneẽ́bʉrʉ, idjia poyabʉrʉ siɗa idjia edaida ɓaɗara edaẽ́a.
6 Ẽjũã o ɓʉra bia mĩgabaria. Maʉ̃ bẽrã idjiabʉrʉ néu zauɗaɗebemada naãrã edaida ɓʉa.
7 Mʉ̃a jara ɓʉra bio crĩchadua. Dadji Boro Jesuba bʉ́a jũma maʉ̃gʉra cawabiya.
8 Jesucritoɗebemada quĩrãnebadua. Idjira Daviɗeba zeɗaa. Idjira beu ɓaɗada Ãcõrẽba ʉ̃rẽbabisia. Maʉ̃ beɗea bia idjiɗebemada mʉ̃a jaradia ɓʉa.
9 Maʉ̃ carea mʉ̃ra bia mĩga ɓʉa. Mʉ̃ra ẽberã cadjirua quĩrãca carenaba jʉ̃ eropanʉa. Baribʉrʉ Ãcõrẽ beɗeara jʉ̃ eropanʉẽ́a.
10 Maʉ̃ carea mʉ̃a jũma droa ɓʉa Ãcõrẽba edaɗa ẽberãrã carebai carea. Mãwã Ãcõrẽba ãdjirã siɗa Jesucritoɗeba ẽdrʉ edaya ewariza idji bia quiruɗebemada eroɓeaɗamãrẽã.
11 Naʉ̃ beɗeara wãrã araa:
Dadjirãda Crito ume beusiɗabʉrʉ, idji ume zocai panania.
12 Dadjirã bia mĩga panʉda droaɗibʉrʉ, idji ume dji bororãda ɓeaɗia.
Dadjirãba Critoda adua panʉana aɗibʉrʉ, idjia biɗa dadjirãra adua ɓʉaɗa aya.
13 Dadjirãda idji ume jipa nĩbaɗaẽ́bʉrʉ, idjida jipa ɓabaria ara idjia jaraɗara o ama ɓaca bẽrã.
Ãcõrẽ nezoca sãwã ɓaida ɓʉ
14 Jũma maʉ̃gʉra djabarãa quĩrãnebabi ɓadua. Dadjirã Boro quĩrãpita jaradua ãdjirãra baridua beɗea carea caicaya ɓeaɗiẽ́ panʉda. Maʉ̃ caicayaba biada diacaa, ãtebʉrʉ dji ũrĩ ɓea crĩchara ãrĩbaria.
15 Ãcõrẽ wãrã beɗeara jipa jaradia ɓʉda unubi ɓadua. Ne obari bia quĩrãca quĩrãcuita o ɓadua Ãcõrẽba bʉra quĩrã pera neẽ́ bia unumãrẽã.
16 Ãcõrẽ quĩrãpita biẽ́ ɓea nẽbʉrʉbadara igaradua. Maʉ̃ ẽpẽ ɓeara Ãcõrẽnebemada tʉmʉara wãbadaa.
17 Ãdjia jaradia panʉba ẽberãrãra ãrĩ wãbaria aiɗaba pea co wãbari quĩrãca. Mãwã jaradiabadarã tãẽna Himeneoda, Pileto siɗa panʉa.
18 Ãdjira wãrã beɗeaɗebemada ãĩ wãsiɗaa. Ãdjia jaradiabadaa ẽberãrã jaiɗapeɗaɗara ʉ̃rẽbacuasiɗada. Maʉ̃gʉɗeba ʉ̃cʉrʉba Crito ĩjã panʉra ãdjia ãrĩbʉdaa.
19 Baribʉrʉ Ãcõrẽ ẽberãrãba Critora bio ĩjã panʉa de jĩrũba dera zarea eroɓabari quĩrãca. Ãcõrẽba idjiɗerãda cawabi carea nãwã jarasia: “Dadjirã Boroba jũma idjiɗerãra cawa ɓʉa.” Idjaɓa jarasia: “Dadjirã Boro ĩjã panʉana a ɓeaba jũma cadjiruara igaraɗida panʉa.”
20 De waiɓʉaɗe aɓabe oro oɗada, parata oɗa siɗa ɓeaẽ́a, ãtebʉrʉ bacuru oɗada, egoro caɗa siɗa ɓeaa. Ʉ̃cʉrʉra dji biara ɓea bẽrã baridua ewari carea ɓeaẽ́a, baribʉrʉ waabemara baridua ewari carea ɓeaa.
21 Dadjirã siɗa ara maʉ̃ quĩrãca panʉa. Dadjirãba cadjiruara igaraɗibʉrʉ, dadjirã Boro itea dji biara ɓeada panania. Mãwã dadjirãneba idjia ne poya oya idjaɓa ne jũma biada oɗi carea ɓeaɗia.
22 Cũdrarãba cadjirua awua panʉnebemada ãĩ ɓadua. Jipa oida ẽpẽ ɓadua. Jesura ĩjã ɓadua. Jũmarãda quĩrĩã ɓadua. Jũmarã ume necai ɓadua. Dadjirã Boro Ãcõrẽa iwiɗibadarã ume so jipa ɓʉɗeba jũma maʉ̃gʉra ẽpẽ ɓadua.
23 Ẽberãrãba crĩcha siriẽ́ ɓea beɗea panʉne eɗa beɗearãdua. Bʉa cawa ɓʉa maʉ̃gʉɗeba caicayabadada.
24 Dadjirã Boro nezocara ijara ɓaiẽ́ ɓʉa, ãtebʉrʉ jũmarã ume aduá ɓaida ɓʉa. Jaradia cawa ɓaida ɓʉa. Jũmarã ume droa ɓaida ɓʉa.
25 Idjia jaradia ɓʉ quĩrĩãnaca ẽberãrãa beɗea biaɗeba Ãcõrẽ beɗeara cawabida ɓʉa. Mãwãra Ãcõrẽba ãdjirãra carebaisicada idjimaa jẽda zeɗapeɗa wãrã beɗeada cawaɗamãrẽã.
26 Quĩrãipa crĩchasiɗara ãdjirãra diauruba jida eroɓʉɗebemada ẽdrʉɗia. Ara nawena diauruba jida pe eroɓʉa idjia quĩrĩã ɓʉra oɗamãrẽã.
