2 Timoteo 3:1-17
3 Bʉa naʉ̃gʉda cawa ɓaida ɓʉa. Jĩrũarebema ewariɗe minijĩchiada zeya.
2 Ẽberãrãba ne jũmada ãdji itea quĩrĩãnia, parata awua ɓeaɗia, ãdjida biara ɓeaɗa aɗia, dji dromada crĩchaɗia, djãrãda biẽ́ jaraɗia, ãdji djibarirã beɗeara ĩjãnaca baya, ãdji carebabʉrʉ ẽberãa bia ɓʉaɗa aɗaca baya, idjaɓa Ãcõrẽra wayaɗaca baya.
3 Ãdjirãba djãrãda quĩrĩãnaca baya, quĩrã djuburiaɗaca baya, nẽbʉra oya ɓeaɗia, cadjirua oɗira poya igaraɗaca baya, jʉwaichia ɓeaɗia, idjaɓa ne jũma biada igaraɗia.
4 Ãdji dji bia quĩrãca eropanʉra cũrũga ɓʉɗeba biẽ́ oɗia. Bio crĩchaɗaẽ́ne ne bariduada o ɓeaɗia. Jũmarã cãyãbara ne cawaara ɓeaɗa aɗia. Ãcõrẽ cãyãbara ɓʉsriɗada biara quĩrĩã ɓeaɗia.
5 Ãcõrẽ ĩjã ɓeaca ɓeaɗia baribʉrʉ iduaribiɗaẽ́a Ãcõrẽba idji ʉɓʉaɗeba ãdjira jipa ɓʉmãrẽã. Maʉ̃gʉrã ume ãbaa ɓarãdua.
6 Mãwã ɓeara djãrã deza wãbadaa wẽrã crĩcha neẽ́ ɓea, cadjiruaba bira ɓeada cũrũgaɗi carea. Maʉ̃gʉ wẽrãrãba ne jũma cadjirua o quĩrĩã ɓʉɗeba bariduada ĩjãbadaa.
7 Ãdjirãra ewariza ne cawa wãnaa, baribʉrʉ wãrã beɗeara poya cawaɗacaa.
8 Janéba, Jambre biɗa Moise beɗea igarapeɗaɗa quĩrãca ãĩ jaradia ɓea biɗa wãrã beɗeara igarabadaa.* Ãdji crĩchara cadjiruaba jũma ãrĩ ɓeaa. Wãrã beɗeara cawaɗacaa.
9 Baribʉrʉ ãdjia o panʉra bia odjaẽ́a. Jũmarãba ãdjira crĩcha neẽ́ ɓeada ebuɗa cawaɗia Moise ewariɗe Jané, Jambre mãwãpeɗaɗa quĩrãca.*
Pauloba Timoteoa obiɗa
10 3:10-11 Baribʉrʉ bʉabʉrʉ jũma mʉ̃a jaradia ɓʉra bio cawa ɓʉa. Mʉ̃ nĩbada, mʉ̃a o quĩrĩã ɓʉda, mʉ̃a Crito ĩjã ɓʉda, mʉ̃a jũmarã ume droa ɓʉda, mʉ̃a quĩrĩã eroɓʉda, mʉ̃ biẽ́ oɗi carea ẽpẽbʉda jũma droa ɓʉda, mʉ̃ bia mĩga ɓʉ siɗa bʉa cawa ɓʉa. Antioquíaɗe, Iconione, Listraɗe biɗa mʉ̃ biẽ́ oɗi carea ẽpẽpeɗaɗada bʉa bio cawa ɓʉa.* Mʉ̃ra bio bia mĩgasia. Baribʉrʉ dadji Boroba jũma maʉ̃gʉɗebemada ẽdrʉ ɓʉsia.
12 Wãrãda jũma Jesucrito ĩjã ɓea Ãcõrẽ quĩrãpita bia nĩnada ẽberãrãba biẽ́ oɗi carea ẽpẽnia.
13 Baribʉrʉ ẽberã cadjiruarãba, djãrã cũrũgabada biɗa wetara cadjiruara o wãnia. Djãrãra cũrũga ɓeaɗia idjaɓa dewararãba ãdjira cũrũgaɗia.
14 Baribʉrʉ bʉa cawaɗara wãrã arada cawa ɓʉ bẽrã maʉ̃ra ẽpẽ wãdua. Bʉa cawa ɓʉa bʉ́a jaradiapeɗaɗaba jipa jaradiasiɗada.
15 Caibe eɗa Ãcõrẽ Beɗeara cawasia. Maʉ̃ beɗeaba bʉ́a cawabi ɓaya aɓaʉba Critoda ĩjãsira Ãcõrẽba ẽdrʉ edaida.
16 Ãcõrẽbʉrʉ jũma Idji Beɗeara ɓʉbisia. Jũma maʉ̃gʉra bia ɓʉa jaradiai carea, cadjirua o ɓeara quẽãi carea, ãĩ o ɓeara jipa o cawabi carea, idjaɓa sãwã quĩrãipa nĩbaɗida cawabi carea.
17 Mãwã Ãcõrẽ ẽberãrãba ne jũma biada o cawaɗapeɗa poya o panania.
