2 Timoteo 4:1-22
4 Jesucritora zeya jũmarã Boroda ɓai carea. Maʉ̃ne ẽberãrã zocai ɓeara, beupeɗaɗa siɗa cawa oya. Maʉ̃ bẽrã Jesucrito quĩrãpita, Ãcõrẽ quĩrãpita biɗa mʉ̃a naʉ̃ beɗeada jaraya bʉa omãrẽã.
2 Ãcõrẽ beɗeara jaradia ɓadua. Ẽberãrãba ũrĩ quĩrĩã panʉne, ũrĩ quĩrĩãẽ́ panʉne biɗa jaradiai carea ɓadua. Ãĩ o ɓeara jipa o cawabidua. Cadjirua o ɓeara quẽãdua. Idjaɓa djabarãra carebadua biara ĩjãnamãrẽã. Jũma droa ɓʉɗeba, quĩrãcuita jaradia ɓʉɗeba mãwã odua.
3 Ewari aɓa ẽberãrãba wãrã beɗeara ũrĩ quĩrĩãẽ́ panania. Ãtebʉrʉ ãdjia quĩrĩã panʉda ẽpẽnia. Maʉ̃ bẽrã jaradiabadada zocãrã jʉrʉɗia ãdjia ũrĩ quĩrĩã panʉra jaradiaɗamãrẽã.
4 Ãdjirãba wãrã beɗeara ũrĩ ama ɓeaɗia, maʉ̃ne naʉ̃ duɗabemaba nẽbʉrʉbadada ẽpẽnia.
5 Baribʉrʉ bʉra ne jũmane quĩrãipa ɓadua. Bia mĩga ɓʉɗe droa ɓadua. Beɗea bia Critoɗebemada jaradia ɓadua. Jũma bʉa Ãcõrẽ itea oida ɓʉra jipa o ɓadua.
6 Dãrãẽ́ne mʉ̃ra beaɗia.* Mʉ̃ beui ewarira caita ɓʉa.
7 Mʉ̃a Ãcõrẽ itea oida ɓaɗara jũma osia. Jũma jipa osia bia djõna quĩrãca. Mʉ̃a Critora igaraẽ́ ɓʉa.
8 Mʉ̃a jipa o ɓʉ carea dadji Boroba mʉ̃ itea nepeda waga eroɓʉa. Idjia jipa cawa obari bẽrã maʉ̃ nepera mʉ̃́a diaya idjia cawa obʉrʉɗe. Baribʉrʉ aɓabe mʉ̃́a diaẽ́a, ãtebʉrʉ jũma idji zei ewari unu quĩrĩã ɓearãa diaya.
Timoteo zemãrẽã Pauloba jaraɗa
9 Isabe mʉ̃ acʉɗe zedua.
10 Djaba Cresentera Galacia druaɗaa wã ɓʉa. Titora Dalmacia druaɗaa wã ɓʉa. Maʉ̃ awara djaba Demába naʉ̃ ẽjũãnebemada biara quĩrĩãna bẽrã mʉ̃ra igarapeɗa Tesalonica puruɗaa wãsia.
11 Aɓabe djaba Lucada mʉ̃ ume ɓʉa. Bʉ zebʉrʉɗe djaba Marcoda jʉrʉɗe wãpeɗa enedua.* Mʉ̃a Ãcõrẽ itea o ɓʉra idjia carebaida ɓʉa.
12 Djaba Tiquicora mʉ̃a Epesoɗaa wãbisia.
13 Bʉ zebʉrʉɗe mʉ̃a jĩsua carea jʉ̃barida enedua. Maʉ̃da Troa puruɗe, djaba Carpo deɗe ɓesia. Idjaɓa mʉ̃ carta ɓeara enedua. Mʉ̃a biara quĩrĩã ɓʉa mʉ̃ carta animarã eɗe ɓʉ́ ɓeada.
14 Jiorroɗeba ne obari Alejandroba mʉ̃ biẽ́ oɗa carea dadjirã Boroba cawa oya.
15 Idji ume quĩrãcuita ɓadua. Dadjia jaradia panʉnebemada idjia bio biẽ́ jara ɓʉa.
16 Ara mʉ̃dji carea dji dromarã quĩrãpita beɗeasiɗe ni aɓaʉda mʉ̃are beɗeaɗaẽ́ basía. Ãtebʉrʉ jũmarãba mʉ̃ra igarasiɗaa. Mʉ̃a quĩrĩãẽ́a ãdjira maʉ̃ carea Ãcõrẽ quĩrãpita beɗeaɗe ɓeaɗida.
17 Baribʉrʉ dadji Borora mʉ̃ ume ɓasia. Idji ʉɓʉada mʉ̃́a diasia idji beɗea jaramãrẽã. Mãwã jũma judiorãẽ́ arima duanʉba ũrĩsiɗaa. Maʉ̃ne dadjirã Boroba mʉ̃ra imama iteɗebemada ẽdrʉ edasia.
18 Maʉ̃ awara dadjirã Boroba jũma mʉ̃ biẽ́ obʉdaɗebemada ẽdrʉ edaya. Idjia mʉ̃ra waga edeya idji ẽberãra bajãne bia pe eroɓʉmaa. Ewariza idjía bio bia beɗeaɗida panʉa. Bia ɓʉa mãwã ɓaida.
Pauloba jĩrũare ɓʉɗa
19 Djaba Aquilaa, Priscaa biɗa jaradua mʉ̃a quĩrĩã ɓʉda ãdjira bia pananida. Ara maʉ̃ quĩrãca djaba Onesiporo ẽberãrãa jaradua.
20 Djaba Erastora Corinto puruɗe ɓesia. Djaba Tropimora cacua biẽ́ ɓeɗa bẽrã idjira Mileto puruɗe amesia.
21 Cue jara bai naẽna isabe zedua. Djabarã Eubuloba, Pudenteba, Linoba, Claudiaba, jũma djabarã biɗa quĩrĩã panʉa bʉra bia ɓaida.
22 Mʉ̃a quĩrĩã ɓʉa dadjirã Boro Jesucritora bʉ ume ɓaida idjaɓa Ãcõrẽba idji biaɗeba bãrãra careba ɓaida. Bia ɓʉa mãwã ɓaida.*
Beɗea eɗaare
^ 4:6. Dãrãẽ́ne mʉ̃ra beaɗia. Griego beɗeaɗe nãwã ɓʉ́ ɓʉa: “Mʉ̃ra uva ɓa Ãcõrẽa wea diabʉda quĩrãca ɓʉa.” Maʉ̃ beɗeaɗeba Pauloba cawabi ɓasia dãrãẽ́ne ẽberãrãba idjira Crito carea beaɗida.
^ 4:11. Marco. Hecho 13:5; 13:13; 15:36-40.
^ 4:22. Bia ɓʉa mãwã ɓaida. Griego beɗeaɗe ʉ̃cʉrʉ cartaɗe maʉ̃ra neẽ́a.
