3 Juaʉ̃ 1:1-14
1 Mʉ̃ra djabarã wagabari drõãa.* Mʉ̃a naʉ̃ cartara ɓʉbʉrʉa mʉ̃ djaba Gayo itea. Mʉ̃a bʉra wãrãda quĩrĩã ɓʉa.
2 Djaba, mʉ̃a Ãcõrẽa iwiɗi ɓʉa bʉra idji ume bia ɓʉ bẽrã ne jũmane bia ɓamãrẽã idjaɓa cacua bia ɓamãrẽã.
3 Mʉ̃ra bio ɓʉsriɗasia, ʉ̃cʉrʉ djabarã mʉ̃ma jũẽpeɗaɗaba nẽbʉrʉsiɗa bẽrã bʉa wãrã beɗeada ẽpẽ ɓʉda.
4 Mʉ̃ djabarãba wãrã beɗeara ẽpẽ panʉda ũrĩbʉrʉɗe mʉ̃ra biara ɓʉsriɗa ɓabaria.*
5 Djaba, bʉa djabarã careba ɓʉɗeba bia o ɓʉa. Bʉa unuca djabarã siɗa carebabari bẽrã wãrãda bio bia o ɓʉa.
6 Maʉ̃gʉrãba bʉ quĩrĩãnebemada namabema djabarãa nẽbʉrʉsiɗaa ãbaa dji jʉre panasiɗaɗe. Mʉ̃ quĩrã djuburia, ãdjirãra carebadua bia wãnamãrẽã Ãcõrẽba idji traju o ɓea carebabibari quĩrãca.
7 Ãdjirãba Jesucritoɗebemada jaradia nĩnaa. Maʉ̃ne ãdjia Ãcõrẽ adua ɓeaa iwiɗiɗacaa carebaɗamãrẽã.
8 Maʉ̃ carea dadjirãba maʉ̃ djabarãra bia edaɗida panʉa. Mãwã ãdjirã ume ãbaa traja panʉa Ãcõrẽ wãrã beɗeada cawabiɗi carea.
Djaba Diotrepeba biẽ́ oɗa
9 Mʉ̃a cartada jũma djabarã jãmabema itea naẽna ɓʉsia. Baribʉrʉ djaba Diotrepeba dai beɗeara ĩjãẽ́ ɓʉa. Idjira djabarã tãẽna dji dromaara ɓa quĩrĩã ɓʉa.
10 Maʉ̃ carea jãmaa wãbʉrʉɗe mʉ̃a jũmarãa cawabiya idjia biẽ́ o ɓʉda. Idjia daida sewaɗeba biẽ́ jarabaria. Maʉ̃ awara djabarã jãmaa wãbʉdara idjia bia edacaa idjaɓa djabarãba ãdji deɗe eda quĩrĩã panʉne iduaribicaa. Bia edasiɗara maʉ̃ djabarãra ãyã jʉretabaria.
Djaba Demetrioɗebema bia beɗeapeɗaɗa
11 Djaba, cadjiruara ẽpẽrãdua ãtebʉrʉ biadrʉ ẽpẽdua. Bia obarira Ãcõrẽnea, baribʉrʉ cadjirua obariba Ãcõrẽra adua ɓʉa.
12 Djaba Demetrioɗebemada jũmarãba bia beɗea panʉa. Wãrã beɗea ẽpẽ ɓʉɗeba unubi ɓʉa idjira jipa ɓʉda. Dai biɗa idjiɗebemada bia beɗea panʉa. Bãrãba cawa panʉa daiba jara panʉra wãrãda.
Juaʉ̃ba naʉ̃ cartaɗe jĩrũare ɓʉɗa
13 Mʉ̃a ne quĩrãtanoa bʉ́a jara quĩrĩã ɓʉa baribʉrʉ cartaɗe ɓʉẽ́a.
14 1:14-15 Dãrãẽ́ne bʉ acʉɗe wã quĩrĩã ɓʉa. Maʉ̃be ãbaa beɗeaɗia. Mʉ̃a quĩrĩã ɓʉa Ãcõrẽba idji necai ɓaira bʉ soɗe dia ɓaida. Namabema djabarãba quĩrĩã panʉa bʉra bia ɓaida. Jãmabema djabarãza jaradua mʉ̃a quĩrĩã ɓʉda ãdjirãra bia duananida.
