Joná 3:1-10
3 Ãcõrẽra wayacusa Joná ume beɗeasia. Nãwã jarasia:
2 –Ninive puru dromanaa wãdua. Mʉ̃a bʉ́a jarabʉrʉda ãdjirãa jaradua.–
3 Ara maʉ̃da Jonára Niniveɗaa wãsia Ãcõrẽba jaraɗa quĩrãca. Maʉ̃ Ninivera puru droma basía. Maʉ̃ bẽrã puru jũma pʉrrʉai carea ewari ũbea edebadjia.
4 Jonára puruɗe eɗaa wãpeɗa nabema ewariɗe pʉrrʉa nĩbasia.* Nãwã jĩgua jara nĩbasia:
–¡Cuarenta ewari babʉrʉɗe Ãcõrẽba naʉ̃ Ninive purura jũma ãrĩya!–
5 Mãwã ɓʉɗe Niniveɗebemarãba, drõãrãba, warrarã biɗa Ãcõrẽ beɗeara ĩjãsiɗaa. Maʉ̃ carea ne coɗaca ewarida osiɗaa. Idjaɓa sopua careabema jʉ̃badara jʉ̃siɗaa.
6 Niniveɗebema boroba maʉ̃ra cawasia. Maʉ̃ carea idji bugue biya quiruɗebemada piraɓaripeɗa idji djio biya queɗeara ẽrãpeɗa sopua careabema jʉ̃barida jʉ̃sia. Maʉ̃be ne babueɗa pora ʉ̃rʉ̃ chũmesia idji cadjirua oɗa carea sopua ɓʉda acʉbi carea.
7 Maʉ̃ne dji boroba, idjiare dji droma ɓearã biɗa nãwã jarasiɗaa jũma idji puruɗebemarãba ĩjã oɗamãrẽã:
–Jũmarãba ne coɗaca ewarida oɗadua. Idjaɓa ni cãrẽ siɗa dorãnadua. Maʉ̃ awara bãrã pacada, bãrã oveja siɗa ne cobirãnadua. Baido siɗa dawarãnadua.
8 Maʉ̃ awara sopua careabema jʉ̃badada jʉ̃nadua. Idjaɓa sopua careabema wuada bãdji animarã ʉ̃rʉ̃ ɓʉcuaɗadua. Maʉ̃be Ãcõrẽa wãrã arada soɗeba quĩrã djuburia iwiɗiɗadua. Maʉ̃ awara bãrãba cadjirua obadara igaraɗadua. Idjaɓa bãrãba djãrã biẽ́ obadara idu ɓʉɗadua.
9 Mãwã o panʉneba Ãcõrẽba dadjirãra cawa oẽ́sicada ãtebʉrʉ idji quĩrũbira tumabiɗisicada. Mãwãra dadjirãra quininaẽ́sicada.–
10 Niniveɗebemarãba mãwã o panʉra Ãcõrẽba unusia. Idjaɓa sãwã ãdji cadjiruara idu ɓʉsiɗada unusia. Maʉ̃ carea idjia cawa oi jaraɗara oẽ́ basía.
Beɗea eɗaare
^ 3:4. Nabema ewariɗe pʉrrʉa nĩbasia. Maʉ̃ beɗeaba idjaɓa jara ɓʉa: “Ewari aɓa pʉrrʉa nĩbasia.”
