Juaʉ̃ 10:1-42
10 Maʉ̃ ewariɗe Jesuba jarasia:
–Mʉ̃a wãrã arada jaraya: bariduada oveja corraɗe eɗa wãbadaɗe eɗa wãẽ́bʉrʉ, ãtebʉrʉ ãyã areba eɗa wãibʉrʉ, maʉ̃gʉba ovejara drʉabaria idjaɓa biẽ́ obaria.
2 Baribʉrʉ dji corraɗe eɗa wãbadama eɗa wãbaridrʉ oveja wagabari araa.
3 Maʉ̃ iteabʉrʉ corra wagabariba dji eɗa wãbadara ewabaria. Ovejaba ãdji wagabari beɗeara cawa panʉa. Ãdjiza trʉ̃cuapeɗa dajadaa edebaria.*
4 Jũma dajadaa edepeɗa ãdji na wãbaria. Ovejara idji caiɗu wãbadaa idji beɗeara cawa panʉ bẽrã.
5 Baribʉrʉ ãdjia ununacara ẽpẽnacaa, ãtebʉrʉ mĩrũbadaa idji beɗeada adua panʉ bẽrã.–
6 Jesura ne jara ɓʉɗeba mãwã beɗeasia baribʉrʉ judiorãba cawaɗaẽ́ basía cãrẽda jara ɓʉda.
7 Maʉ̃ bẽrã Jesuba nãwã jarasia:
–Mʉ̃a wãrã arada jaraya, oveja eɗa wãbadara mʉ̃́a.
8 Mʉ̃ zei naẽna zocãrã ne drʉabadarã quĩrãca zebadjiɗaa idjaɓa purura biẽ́ obadjiɗaa. Baribʉrʉ ãdjirã beɗeara Ãcõrẽ ẽpẽ ɓeaba ĩjãnaẽ́ basía.*
9 Eɗa wãbadara mʉ̃́a. Mʉ̃neba eɗa wãbʉrʉra minijĩchiaɗebemada ẽdrʉya. Bio necai ɓaya idjia neẽ́ ɓʉra Ãcõrẽba jũma diai bẽrã.*
10 Ne drʉabarira zebaria oveja drʉai carea, beai carea idjaɓa aduabi carea. Baribʉrʉ mʉ̃ra zesia ẽberãrãba zocai ɓai arada aɗuba eroɓeaɗamãrẽã.
11 Mʉ̃ra oveja wagabari dji biaa. Oveja wagabari biara idji oveja carea beuida ɓʉa.
12 Baribʉrʉ aɓaʉba parata carea ovejada waga ɓaibʉrʉ, usa cadrʉa zebʉrʉɗe ovejara amecuapeɗa mĩrũ wãya. Ovejara idjiɗeẽ́ bẽrã wãrãda wagacaa. Maʉ̃ne usa cadrʉaba oveja aɓa ca edabʉrʉɗe dewararãda jãrãzoabadaa.
13 Maʉ̃ ẽberãra mĩrũ wãbaria aɓabe parata careabʉrʉ ovejara wagabari bẽrã. Idjia oveja bia pananamãrẽã crĩchacaa.
14 Mʉ̃ra oveja wagabari dji biaa. Mʉ̃djiɗerãra cawa ɓʉa oveja wagabariba idji oveja cawa ɓʉ quĩrãca. Idjaɓa mʉ̃reba mʉ̃ra cawa panʉa.
15 Ara maʉ̃ quĩrãca mʉ̃ Zezaba mʉ̃ra cawa ɓʉa idjaɓa mʉ̃a mʉ̃ Zezara cawa ɓʉa. Mʉ̃ra mʉ̃dji oveja carea beuida ɓʉa.
16 Mʉ̃a eroɓʉa dewara oveja naʉ̃ corraɗe ɓeaẽ́da.* Maʉ̃gʉrã siɗa mʉ̃a eɗa eneya. Ãdjirãba mʉ̃ beɗeara ĩjãnia. Mãwã jũmarãda ãbaa panania. Maʉ̃ne ãdjirã wagabarira aɓa ɓaya.
17 Mʉ̃ Zezaba mʉ̃ra quĩrĩã ɓʉa, ara mʉ̃djida idu beabi bẽrã. Maʉ̃be wayacusa zocai ɓeya.
18 Mʉ̃a iduaribiẽ́bʉrʉ ni aɓaʉba mʉ̃ra poya beaɗaẽ́a, baribʉrʉ mʉ̃ra beuya mãwã quĩrĩã ɓʉ bẽrã. Mʉ̃ra beupeɗa poya ʉ̃rẽbaya. Mʉ̃ Zezaba mʉ̃́a mãwã obisia.–
19 Maʉ̃ beɗea ũrĩbʉdaɗe judiorãra wayacusa wariwaria beɗea duanasiɗaa.
20 Zocãrãba jarasiɗaa:
–Jãʉ̃ ẽberãra jai bara ɓʉa. Idjira quĩrãẽ́ ɓʉa. ¿Cãrẽ cãrẽã idji beɗeada ũrĩni?–
21 Baribʉrʉ dewararãba jarasiɗaa:
–Idjia jara ɓʉra jai bara ɓʉ beɗeaẽ́a. ¿Jaiba dauɓerrea ɓeara biabibarica?–
Judiorãba Jesu igarapeɗaɗa
22 Maʉ̃ ewariɗe judiorãba Jerusaleʉ̃ne ewari dromada o panasiɗaa. Ãdjirãba quĩrãneba panasiɗaa Ãcõrẽ de dromara idji quĩrãpita biẽ́ ɓaɗada waya bia ɓʉpeɗaɗada. Maʉ̃ ewari dromara dji cũrãsaara ɓʉ jeɗecoɗe obadjiɗaa.*
23 Ãcõrẽ de droma mõgaraba auɗu jũrã ca ɓʉ eɗaare Jesura nĩbasia. Idji nĩbaɗama Salomoʉ̃ abadaa.
24 Mãwã ɓʉɗe ʉ̃cʉrʉ judiorãba Jesura auɗu jũrã edaɗapeɗa iwiɗisiɗaa:
–Aɓa ¿sãʉ̃be bʉa dairã crĩchara cawaẽ́ pe eroɓai? Bʉda Ãcõrẽba ẽdrʉ edabari diai jaraɗabʉrʉ, dairãa ebuɗa jaradua.–
25 Jesuba panusia:
–Mʉ̃a bãrãa jarasia baribʉrʉ ĩjãnaẽ́ duanʉa. Jũma mʉ̃ Zeza trʉ̃neba o ɓʉba mʉ̃nebemada ebuɗa cawabi ɓʉa.
26 Baribʉrʉ bãrãba ĩjãnacaa, mʉ̃ ovejarãẽ́ bẽrã.
27 Mʉ̃ ovejarãba mʉ̃ beɗeara cawa panʉa. Mʉ̃a ãdjirãra cawa ɓʉa. Maʉ̃ bẽrã ãdjirãba mʉ̃ra ẽpẽbadaa.
28 Mʉ̃a ãdjirãa Ãcõrẽ ume ewariza zocai ɓaida dia ɓʉa. Maʉ̃ carea ãdjirãra aduaɗaẽ́a idjaɓa ni aɓaʉba ãdjirãra mʉ̃ jʉwaɗebemada poya jãrĩnaẽ́a.
29 Mʉ̃ Zezaba ãdjirãra mʉ̃́a diasia. Idjira jũmarã cãyãbara dji dromaara ɓʉa.* Ni aɓaʉba ãdjirãra mʉ̃ Zeza jʉwaɗebemada poya jãrĩnaẽ́a.
30 Mʉ̃ra mʉ̃ Zeza ume aɓarida mãwã ɓʉa.–
31 Maʉ̃ carea arima ɓea judiorãba wayacusa mõgarada edasiɗaa idji taɓari beaɗi carea.
32 Maʉ̃ne Jesuba jarasia:
–Mʉ̃ Zezaɗeba ne zocãrã biada bãrãa unubisia. ¿Sãʉ̃gʉ ne bia oɗa carea mʉ̃ra mõgaraba taɓari beaɗi?–
33 Judiorãba panusiɗaa:
–Dairãba bʉra mõgaraba taɓariɗaẽ́a ne bia o ɓʉ carea, ãtebʉrʉ taɓariɗia bʉ naʉ̃ djaraɗe ɓʉba ara bʉdjida Ãcõrẽana a ɓʉ carea. Maʉ̃ba bʉa Ãcõrẽra biẽ́ jara ɓʉa.–*
34 Jesuba jarasia:
–Bãrã leyɗe nãwã ɓʉ́ ɓʉa: “Mʉ̃a jarasia bãrãra ãcõrẽrãda.”*
35 Dadjirãba cawa panʉa Ãcõrẽ Beɗeara ewariza wãrãda. Ãcõrẽba maʉ̃ ẽberãrãa beɗeasiɗe jarasia: “Bãrãra ãcõrẽrãa.”
36 Maʉ̃ne mʉ̃a aɓabe idji Warraaɗa a ɓʉa Ãcõrẽba mʉ̃ra ara idji itea ɓʉɗa bẽrã idjaɓa naʉ̃ ẽjũãnaa diabueɗa bẽrã. ¿Bãrãba maʉ̃ carea jara panʉca mʉ̃a idjiɗebemada biẽ́ beɗeasida?
37 Mʉ̃ Zezaba o ɓʉda mʉ̃a oẽ́ ɓʉbʉrʉ, mʉ̃ beɗeara ĩjãrãnadua.
38 Baribʉrʉ idjia o ɓʉda mʉ̃a o ɓʉbʉrʉ, mʉ̃a jara ɓʉ carea bãrãba ĩjãnaẽ́ panʉmĩna mʉ̃a o ɓʉ carea ĩjãnadua. Mãwã bãrãba wãrãda cawaɗia mʉ̃ Zezara mʉ̃ ume ɓʉda idjaɓa mʉ̃ra mʉ̃ Zeza ume ɓʉda.–
39 Maʉ̃ne ãdjirãba wayacusa Jesura jida quĩrĩã panasiɗaa, baribʉrʉ ẽdrʉ wãsia.
40 Mãwãnacarea Jesura wayacusa Jordaʉ̃ do quĩrãrã wãsia Borocuebari Juaʉ̃ba naãrã ẽberãrã borocue ɓaɗamaa.* Jesura mama ɓesia.
41 Mãwã ɓʉɗe zocãrã ẽberãrãda idjimaa wãbadjiɗaa. Ãduɓa nãwã jarabadjiɗaa:
–Juaʉ̃ba ne ununacada oẽ́ basía baribʉrʉ jũma idjia naʉ̃ Jesuɗebema jaraɗara wãrã araa.–
42 Mama zocãrãba Jesura ĩjãsiɗaa.
Beɗea eɗaare
^ 10:3. Ezequiel 34:11-31.
^ 10:8. Ãcõrẽ ẽpẽ ɓeaba. Griego beɗeaɗe ɓʉ́ ɓʉa “ovejaba.”
^ 10:9. Griego beɗeaɗe nãwã ɓʉ́ ɓʉa: “Idjira eɗa wãya, dajadaa wãya idjaɓa põãjãrãda unuya.”
^ 10:16. Mʉ̃a eroɓʉa dewara oveja naʉ̃ corraɗe ɓeaẽ́da. Maʉ̃ beɗeaɗeba Jesuba jara ɓasia judiorãẽ́ biɗa idjida ĩjãnia.
^ 10:22. Judiorãba maʉ̃ ewari Janucá abadada poa zebʉrʉza obadaa diciembre jeɗecoɗe. Quĩrãnebabadaa Juda Macabeo abadaba Ãcõrẽ de dromara waya bia ɓʉɗada. Maʉ̃gʉra mãwãsia poa 164ɗe Jesu toɗi naẽna. Maʉ̃ naẽna griego Antioco Epipane abadaba Ãcõrẽ de dromara biẽ́ ɓʉsia.
^ 10:29. Maʉ̃ra griego beɗeaɗe ebuɗa ɓʉẽ́a. Ʉ̃cʉrʉmaarã nãwã jara ɓʉa: “Mʉ̃ Zezaba mʉ̃́a diaɗara ne jũma cãyãbara dji dromaara ɓʉa.”
^ 10:33. Levitico 24:14-16.
^ 10:34. Salmo 82:6.
^ 10:40. Juaʉ̃ 1:28.
