Juaʉ̃ 11:1-57
11 11:1-2 Maʉ̃ ewariɗe ẽberã Lazaro abadada jũãcãyã nũmasia. Maʉ̃ Lazarora Betanianebema basía. Aɓari puruɗe idji djabawẽrãrã Mariada, Marta siɗa panasiɗaa. Maʉ̃gʉ Mariaba dadjirã Boro jĩrũne querada weapeɗa idji buɗaba põãsa jareɗa basía.*
2 –
3 Maʉ̃ne Lazaro djabawẽrãrãba Jesua beɗeada diabuesiɗaa:
–Dai Boro, bʉ dji biara jũãcãyã nũmʉa.–
4 Maʉ̃ beɗea ũrĩsiɗe Jesuba jarasia:
–Lazarora beuẽ́a, baribʉrʉ jũãcãyã nũmʉa ẽberãrãba cawaɗamãrẽã Ãcõrẽra idji Warra siɗa dji dromarãda.–
5 Jesuba Lazarora, dji djabawẽrãrã siɗa bio quĩrĩã ɓasia.
6 Baribʉrʉ Lazaro bio jũãcãyã ɓʉda cawaɗacarea waɗi ewari umé ɓesia idji ɓaɗama.
7 Mãwãnacarea idji ume nĩbabadarãa nãwã jarasia:
–Wãnadrʉ wayacusa Judeaɗaa.–
8 Maʉ̃ bẽrã idji ume nĩbabadarãba jarasiɗaa:
–Jaradiabari, dãrãẽ́ ɓʉa Judeaɗebemarãba bʉra mõgaraba taɓari bea quĩrĩã pananada. ¿Bʉra wayacusa jãmaa wãica?–
9 Jesuba jarasia:
–¿Ewarira doce hora ɓʉẽ́ca? Ãsa nĩra tenedrʉcaa, idjia ʉ̃naa naʉ̃ ẽjũãne ɓʉda unu ɓʉ bẽrã.
10 Baribʉrʉ diamasi nĩra tenedrʉbaria, ʉ̃naa neẽ́ ɓʉ bẽrã.–
11 Mãwã jaraɗacarea Jesuba jarasia:
–Dadjirã dji bia Lazarora cãĩ ɓʉa baribʉrʉ mʉ̃a idjira ʉ̃rʉ̃mane wãya.–
12 Maʉ̃ne Jesu ume nĩbabadarãba idjía jarasiɗaa:
–Dai Boro, idjira cãĩ ɓʉbʉrʉ biabʉrʉa.–
13 Jesuba maʉ̃ jaraɗaɗeba Lazaro beuɗaɗebemada beɗea ɓasia, baribʉrʉ idji ume nĩbabadarãba crĩchasiɗaa Lazaro cãĩ ɓʉɗebemada beɗea ɓʉda.
14 Maʉ̃be Jesuba ebuɗa jarasia:
–Lazarora jaiɗasia.
15 Arima ɓaɗaẽ́ bẽrã mʉ̃ra ɓʉsriɗa ɓʉa maʉ̃neba bãrãba mʉ̃ra biara ĩjãni bẽrã. Waya idjimaa wãnadrʉ.–
16 Maʉ̃ne Tomá, Mĩguiso abadada ɓasia.* Maʉ̃gʉba Jesu ume nĩbabadarã waabemarãa jarasia:
–Judeaɗaa wãnadrʉ dadjirã siɗa beaɗamãrẽã.–
Beuɗarã Jesuba ʉ̃rẽbabiɗebema
17 Betania puruɗe jũẽsiɗe Jesuba cawasia Lazaro tʉɓaripeɗaɗara ewari quĩmãrẽ ɓʉda.
18 Betaniara Jerusaleʉ̃neba mãcua tʉmʉẽ́ ɓasia.*
19 Maʉ̃ bẽrã zocãrã judiorãda zesiɗaa Marta, Maria sobiabiɗe ãdji djaba jaiɗaɗa carea.
20 Mãwã panʉne Martaba cawasia Jesura jũẽbʉrʉda. Ara maʉ̃da idji audiaɓariɗe wãsia. Maʉ̃ne Mariara diguiɗa ɓesia.
21 Martaba Jesu unusiɗe idjía jarasia:
–Mʉ̃ Boro, bʉda nama ɓaɗabara mʉ̃ djabara jaiɗaẽ́ bacasia.
22 Baribʉrʉ mʉ̃a cawa ɓʉa jũma bʉa Ãcõrẽa iwiɗibʉrʉra idjia oida.–
23 Jesuba idjía jarasia:
–Bʉ djabara ʉ̃rẽbaya.–
24 Maʉ̃ne Martaba jarasia:
–Mãẽ, mʉ̃a cawa ɓʉa idjira jĩrũarebema ewariɗe ʉ̃rẽbaida beuɗarã ʉ̃rẽbabʉdaɗe.–*
25 Jesuba jarasia:
–Mʉ̃drʉ beuɗarã ʉ̃rẽbabibaria idjaɓa zocai ɓai diabaria. Bariduaba mʉ̃da ĩjãibʉrʉ, naʉ̃ djaraɗe beubʉrʉ siɗa ewariza Ãcõrẽ ume zocai ɓaya.
26 Mʉ̃ ĩjã ɓʉra mʉ̃neba zocai ɓʉ bẽrã ewariza zocai ɓaya. ¿Bʉa maʉ̃gʉra ĩjã ɓʉca?–
27 Maʉ̃ne Martaba panusia:
–Mãẽ mʉ̃ Boro, mʉ̃a ĩjã ɓʉa bʉra Ãcõrẽ Warrada, Ãcõrẽba ẽdrʉ edabari diai jaraɗada, naʉ̃ ẽjũãne zeida ɓaɗada.–
Jesu Lazaro carea jĩãna
28 Mãwã jaraɗacarea Martara wãsia idji djabawẽrãmaa. Maʉ̃be iwidrʉa jarasia:
–Dji Jaradiabarira nama ɓʉa. Idjia bʉ́a ne jara quĩrĩã ɓʉa.–
29 Maʉ̃ ũrĩpeɗa Mariara piradrʉpeɗa Jesu ɓʉmaa isabe wãsia.
30 Jesura puruɗe eɗa wãẽ́ ɓasia. Waɗibiɗa Martaba idji ununama ɓasia.
31 Maʉ̃ne judiorã Maria sobiabiɗi carea idji diguiɗa panʉba unusiɗaa idjira isabe piradrʉpeɗa dajadaa wãbʉrʉda. Maʉ̃ carea idji caiɗu wãbʉdaba jarasiɗaa:
–Idjira Lazaro tʉɓaripeɗaɗamaa jĩãne wãbʉrʉa.–
32 Mariara Jesu ɓʉma jũẽsiɗe ara idji unubʉrʉda idji jĩrũ caita ɓarru coɓesia. Maʉ̃ne jarasia:
–Mʉ̃ Boro, bʉda nama ɓaɗabara, mʉ̃ djabara jaiɗaẽ́ bacasia.–
33 Jesuba Maria jĩgua jĩãbʉrʉda idjaɓa judiorã idji ume zepeɗaɗa siɗa jĩãbʉdada unusiɗe ãdjirã carea bio sopua nũmepeɗa jĩgua ʉ̃gasia.*
34 Maʉ̃be iwiɗisia:
–Idjira ¿sãma tʉɓarisiɗa?–
Ãdjirãba panusiɗaa:
–Dai Boro, acʉɗe wãna.–
35 Jesura jĩãsia.
36 Mãwã ɓʉɗe judiorã arima duanʉba jarasiɗaa:
–Acʉɗadua idjia sãcua Lazarora quĩrĩã ɓasida.–
37 Baribʉrʉ ʉ̃cʉrʉ ãdjirãnebemaba jarasiɗaa:
–Dauɓerrea ɓʉ biabiɗaba ¿sãwãẽrã poya carebaẽ́ basi Lazaro beurãmãrẽã?–
Jesuba Lazaro ʉ̃rẽbabiɗa
38 Jesura wayacusa jĩgua ʉ̃gasia. Maʉ̃be Lazaro tʉɓaripeɗaɗama jũẽsia. Maʉ̃gʉra eya uria basía. Dji eɗa wãbadara mõgaraba jũãtrʉ ɓasia.
39 Maʉ̃ne Jesuba jarasia:
–Jãʉ̃ mõgarara ãyã ɓʉɗadua.–
Marta, dji jaiɗaɗa djabawẽrãba Jesua jarasia:
–Mʉ̃ Boro, idji jaiɗaɗara ewari quĩmãrẽ ɓʉ bẽrã cõbusia cadjirua ɓʉa.–
40 Baribʉrʉ Jesuba jarasia:
–¿Mʉ̃a jaraẽ́ basica bʉa wãrãda ĩjãibʉrʉ, Ãcõrẽra dji droma ɓʉda unuida?–
41 Mãwã ɓʉɗe ẽberãrãba mõgarara ãyã ɓʉsiɗaa. Maʉ̃be Jesuba ʉ̃taa acʉpeɗa jarasia:
–Zeza, mʉ̃a bʉ́a bia jaraya mʉ̃a iwiɗiɗara ũrĩna bẽrã.
42 Mʉ̃a cawa ɓʉa bʉa mʉ̃ beɗeara ũrĩ ɓabarida, baribʉrʉ mʉ̃a maʉ̃gʉra jarasia naʉ̃gʉrã ẽberãrãba cawaɗamãrẽã bʉabʉrʉ mʉ̃ra diabuesida.–
43 Mãwã jaraɗacarea Jesuba jĩgua trʉ̃ jarasia:
–¡Lazaro, dajadaa zedua!–
44 Ara maʉ̃da Lazaro beu ɓaɗada dajadaa zesia. Idji jʉwara, idji jĩrũ siɗa waɗi wuaba bʉrá ɓeasia. Idjaɓa idji quĩrãra wuaba ãnẽɓari ɓasia. Maʉ̃ne Jesuba jarasia:
–Ẽrãnadua bia tʉgamãrẽã.–
Judiorã bororãba Jesu beaɗi carea beɗea aupeɗaɗa
Mateo 26:1-5; Marco 14:1-2; Luca 22:1-2
45 Zocãrã judiorã Maria acʉɗe wãpeɗaɗaba unusiɗaa Jesuba oɗara. Maʉ̃ bẽrã ãdjirãba ĩjãsiɗaa.
46 Ʉ̃cʉrʉra pariseorãmaa wãsiɗaa Jesuba oɗa jaraɗe.
47 Maʉ̃ carea pariseorãra, sacerdote bororã siɗa jũma judiorã dji dromarã ume ãbaa dji jʉresiɗaa. Nãwã jarasiɗaa:
–Dadjirãba ¿sãwã oɗi? Maʉ̃ ẽberãba ne ununacada zocãrã o ɓʉa.
48 Idjida idu ɓʉɗibʉrʉ jũmarãba crĩchaɗia idjira dadjirã boroda. Idjida ẽpẽnibʉrʉ romanorãra zeɗapeɗa dadji Ãcõrẽ de dromara babueɗia idjaɓa jũma dadji judiorã siɗa quenania.–
49 Mama aɓa ɓasia Caipá abadada. Idjira maʉ̃ poaɗe dji dromaara ɓʉ sacerdote basía. Maʉ̃ Caipába jarasia:
–¡Bãrãra crĩcha neẽ́ panʉa!
50 Romanorãba jũma dadjirã beaɗi cãyãbara biara ɓʉa ẽberã aɓa dadji judiorã carea beuida.–
51 Caipába ara idji crĩchaɗeba mãwã jaraẽ́ basía. Ãtebʉrʉ idjira maʉ̃ poaɗe dji dromaara ɓʉ sacerdote bẽrã Ãcõrẽbʉrʉ idjía jarabisia Jesura jũma judiorã carea beuida ɓʉda.
52 Baribʉrʉ aɓabe judiorã carea beuẽ́ basía, ãtebʉrʉ beusia jũma Ãcõrẽ warrarã naʉ̃ ẽjũãne ɓeara puru aɓa ɓʉi carea.*
53 Judiorã dji dromarãba beɗea ɓʉsiɗaa mamaʉba ʉ̃taa crĩcha jʉrʉɗida Jesu beaɗi carea.
54 Maʉ̃ bẽrã Jesura judiorã tãẽna ebuɗa nĩbaca basía, ãtebʉrʉ Judeaɗebemada ãyã wãsia. Epraiʉ̃ puruɗe idji ume nĩbabadarã ume ɓaɗe wãsia. Maʉ̃ purura ẽjũã põãsa ewaraga ɓʉ caita ɓʉa.*
55 Judiorã Egiptoɗeba ẽdrʉpeɗaɗa quĩrãnebabada ewarira caita ɓasia. Maʉ̃ra ewari droma bẽrã puruzabemarãda Jerusaleʉ̃naa wãsiɗaa ãdjia obada quĩrãca o panʉneba Ãcõrẽ quĩrãpita bia ɓeaɗi carea.*
56 Maʉ̃ ewariɗe ẽberãrãba Jesura jʉrʉ nĩbasiɗaa. Ãcõrẽ de droma dajada ãbaa duanʉne iwiɗibadjiɗaa:
–Bãrãmaarã ¿idjira naʉ̃ ewari droma obadaɗe zebá?–
57 Baribʉrʉ sacerdote bororãba pariseorã biɗa jarasiɗaa bariduaba Jesuda jũẽsida cawasiɗara jaraida ɓʉda idji jidaɗamãrẽã.
Beɗea eɗaare
^ 11:1-2. Juaʉ̃ 12:3.
^ 11:16. Mĩguiso. Griego trʉ̃ Dídimoba jara ɓʉa mĩguisoda.
^ 11:18. Tʉmʉẽ́ ɓasia. Griego beɗeaɗe ɓʉ́ ɓʉa “quince estadia.” Maʉ̃ra kilómetro ũbeaca ɓʉa.
^ 11:24. Isaía 26:19; Daniel 12:1-3.
^ 11:33. Ãdjirã carea. Ʉ̃cʉrʉmaarã Jesura sopuasia ãdjirãba ĩjãnaẽ́ basi bẽrã idjia Lazarora ʉ̃rẽbabida. Dewararãmaarã Jesura sopuasia naʉ̃ ẽjũãne ẽberãrãra beubada, cacua biẽ́ ɓeabada, idjaɓa cadjirua obada bẽrã.
^ 11:52. Isaía 11:12; Jeremia 23:3; Miquea 2:12.
^ 11:54. Epraiʉ̃ purura Jerusaleʉ̃neba ewari aɓa ɓasia.
^ 11:55. Ewari droma oɗi naẽna judiorãra Ãcõrẽ quĩrãpita bia ɓeaɗida panasiɗaa. Aɓaʉba ẽberã beuɗada tãibʉrʉ wa waraibʉrʉ, siete ewari Ãcõrẽ quĩrãpita biẽ́ ɓebadjia. Maʉ̃ carea ne oida ɓasia: acʉdua Numero 19:16-22; 2 Cronica 30:13-21. Mãwã oẽ́bʉrʉ ewari dromara ocara ɓasia. Jesu ewariɗe judiorãba jaradiabadjiɗaa judiorã Israel drua ãĩ ɓeara Ãcõrẽ quĩrãpita biẽ́ ɓeada. Maʉ̃ carea Jerusaleʉ̃ puruɗaa zeɗapeɗa siete ewari dãrãbadjiɗaa Ãcõrẽ quĩrãpita bia panani carea.
