Juaʉ̃ 13:1-38
13 Egiptoɗeba ẽdrʉpeɗaɗa quĩrãnebabada ewari bai naẽna Jesuba cawa ɓasia idji ewarira jũẽbʉrʉda. Cawasia naʉ̃ ẽjũãra amepeɗa idji Zezamaa wãida. Jesuba jũma idjiɗerã naʉ̃ ẽjũãne ɓeara bio quĩrĩã ɓaɗa bẽrã idjia maʉ̃ quĩrĩãra unubisia aɓa idji beubʉrʉ ewariɗaa.
2 Quewara pãĩmabʉrʉɗe ne co panasiɗaa. Baribʉrʉ maʉ̃ naẽna diauruba Simoʉ̃ warra Juda Iscariote soɗe crĩchada diaɗoasia Jesu jidabimãrẽã.
3 Jesuba cawa ɓasia idji Zezaba ne jũmada idji jʉwaɗe ɓʉsida, idjaɓa cawa ɓasia idjira Ãcõrẽmaʉba zepeɗa waya Ãcõrẽmaa wãida.
4 Baribʉrʉ Jesuba osia nezocaba obari quĩrãca. Ãdjirãra quewara ne co panʉne piraɓaripeɗa idjia ʉ̃rʉ̃ jʉ̃ ɓabarida ẽrãsia. Maʉ̃be cacua jarebadada edapeɗa cʉrrʉ bʉrá jʉ̃sia.
5 Epeɗeco jũguruaɗe baidoda jue edapeɗa idji ume nĩbabadarã jĩrũra sʉgʉsia. Ãdjiza sʉgʉpeɗa ãdji jĩrũra cacua jarebadaba põãsa jaresia.
6 Jesuba Simoʉ̃ Pedro jĩrũ sʉgʉbʉrʉɗe Pedroba jarasia:
–Mʉ̃ Boro, ¿bʉa mʉ̃ jĩrũda sʉgʉica?–
7 Jesuba panusia:
–Mʉ̃a o ɓʉra bʉa nawena cawaẽ́ ɓʉa baribʉrʉ nocoare ebuɗa cawaya.–
8 Baribʉrʉ Pedroba jarasia:
–Mʉ̃ jĩrũra bʉa sʉgʉcara ɓʉa.–
Jesuba jarasia:
–Mʉ̃a bʉ jĩrũda sʉgʉẽ́bʉrʉ, bʉra mʉ̃reẽ́a.–
9 Maʉ̃ bẽrã Simoʉ̃ Pedroba jarasia:
–Mãwã baibʉrʉ, mʉ̃ Boro, mʉ̃ jĩrũ awa sʉgʉrãdua, ¡ãtebʉrʉ mʉ̃ jʉwara, mʉ̃ boro siɗa sʉgʉdua!–
10 Maʉ̃ carea Jesuba jarasia:
–Ẽberã cuiɗacarea aɓabe idji jĩrũ awa sʉgʉida ɓʉa idji cacuara jũma bia sʉgʉ ɓʉ bẽrã. Bãrãra jũmaena sʉgʉ ɓeaa, mãwãmĩna aɓa nama ɓʉa sʉgʉẽ́ ɓʉda.–
11 Jesuba cawa ɓasia caiba idjira jidabida. Maʉ̃ carea jarasia: “Aɓa nama ɓʉa sʉgʉẽ́ ɓʉda.”
12 Ãdjirã jĩrũ sʉgʉcuaɗacarea Jesuba wayacusa idjia ʉ̃rʉ̃ jʉ̃ ɓabarira jʉ̃sia. Maʉ̃be ne cobadama wayacusa chũmepeɗa jarasia:
–¿Cawasiɗaca cãrẽã mʉ̃a bãrã jĩrũra sʉgʉsida?
13 Bãrãba mʉ̃ra Jaradiabariaɗa abadaa idjaɓa bãrã Boroaɗa abadaa. Wãrãda ariɗe jara panʉa, mãwã ɓʉ bẽrã.
14 Maʉ̃ba mʉ̃, bãrã Boroba idjaɓa Jaradiabariba nezoca quĩrãca bãrã jĩrũra sʉgʉɗa bẽrã bãrã biɗa nezoca quĩrãca bãdjiza jĩrũ sʉgʉɗida panʉa.
15 Mʉ̃a jãwã unubisia bãdjiza dji carebaɗamãrẽã.
16 Mʉ̃a wãrã arada jaraya: ni aɓaʉ nezocada idji boro cãyãbara auɗuara ɓʉẽ́a. Diabueɗara idji diabueɗa cãyãbara auɗuara ɓʉẽ́a. Nezocaba obari quĩrãca mʉ̃a oɗa bẽrã, bãrã biɗa aɓari quĩrãca oɗida panʉa.
17 ¿Cawasiɗaca? Mãwã ĩjã oɗibʉrʉ wãrãda bia panania.
18 Mʉ̃a jaraẽ́ ɓʉa jũma bãrãra bia ɓeaɗida, mʉ̃a edaɗarã sãwã ɓeada cawa ɓʉ bẽrã. Ãcõrẽ Beɗeaɗe ɓʉ́ ɓʉ quĩrãca wãrãda mãwãmãrẽã mʉ̃a jarabʉrʉa: “Aɓa mʉ̃ ume ne co ɓaɗada mʉ̃ ume dji quĩrũda ɓesia.”*
19 Mʉ̃a ara nawena maʉ̃gʉra jarabʉrʉa waɗi mãwãi naẽna, wãrãda mãwãbʉrʉɗe bãrãba Mʉ̃ra Mʉ̃da ĩjãnamãrẽã.*
20 Wãrã arada mʉ̃a jaraya: mʉ̃a diabuebʉrʉda aɓaʉba bia edaibʉrʉ mʉ̃da bia edabʉrʉa. Idjaɓa mʉ̃ bia edabʉrʉba mʉ̃ Diabueɗara bia edabʉrʉa.–
Jesuba Judaɗebema jaraɗa
Mateo 26:20-25; Marco 14:17-21; Luca 22:21-23
21 Mãwã jarapeɗa Jesura bio sopua ɓesia. Mãwã ɓʉɗe ebuɗa jarasia:
–Wãrã arada mʉ̃a jaraya: aɓa bãrãnebemaba mʉ̃ra jidabiya.–
22 Idji ume nĩbabadarãra aɓarica dji acʉ duanesiɗaa Jesuba jaraɗara cawaɗaẽ́ baɗa bẽrã.
23 Maʉ̃ne aɓa ɓasia Jesuare chũmʉda.* Maʉ̃gʉba ara idjida “Jesuba bio quĩrĩã ɓʉ” abadjia.
24 Simoʉ̃ Pedroba idjía boroba jarasia caiɗebemada beɗea ɓʉda Jesua iwiɗimãrẽã.
25 Maʉ̃be Jesuare chũmʉba iwiɗisia:
–Dai Boro, ¿caiba bʉra jidabi?–
26 Jesuba panusia:
–Mʉ̃a paʉ̃da sõberapeɗa aɓaʉa diaya. Maʉ̃ ẽberãra idjía.–
Ara maʉ̃da paʉ̃ra sõberapeɗa Jesuba Simoʉ̃ Iscariote warra Judaa diasia.
27 Judaba maʉ̃ coɗacarea Satana jʉwaeɗa ɓesia. Maʉ̃ne Jesuba Judaa jarasia:
–Bʉa oya ɓʉra isabe odua.–
28 Baribʉrʉ ne co duanʉba ni aɓaʉba cawaɗaẽ́ basía Jesuba cãrẽ cãrẽã mãwã jarasida.
29 Judaba ãdji parata wagabada buchacara eroɓabadjia. Maʉ̃ bẽrã ʉ̃cʉrʉba crĩchasiɗaa Jesuba dji ewari droma careabemada nẽdomãrẽã jarasida wa parata neẽ́ queɗeaa diabi ɓʉda.
30 Judaba paʉ̃ra copeɗa ara maʉ̃da dajadaa wãsia. Maʉ̃ra pãĩmanacarea basía.
Jesuba obi ɓʉ beɗea djiwiɗi
31 Juda wãnacarea Jesuba jarasia:
–Ʉ̃rãbʉrʉ Ãcõrẽba unubiya mʉ̃, Naʉ̃ Djara Edaɗara dji dromada. Maʉ̃ awara mʉ̃neba Ãcõrẽba unubiya ara idjida dji dromada.
32 Mʉ̃, Naʉ̃ Djara Edaɗaba Ãcõrẽra dji dromada unubibʉrʉ, Ãcõrẽba mʉ̃ra aɓarica dji dromada unubiya. Idjia dãrãẽ́ne maʉ̃ra unubiya.
33 Bãrãra mʉ̃ dji biarã bẽrã mʉ̃a jaraya: mʉ̃ra bãrã ume dãrã ɓaẽ́a.* Mʉ̃a judiorã bororãa jaraɗa quĩrãca nawena bãrãa jaraya: bãrãba mʉ̃ra jʉrʉɗia, mãwãmĩna mʉ̃ wãbʉrʉmaa poya wãnaẽ́a.*
34 Mʉ̃a obi ɓʉ beɗea djiwiɗida bãrãa jaraya: bãrãra bio dji quĩrĩã ɓeaɗadua.* Mʉ̃a bãrã bio quĩrĩã ɓʉ quĩrãca bãrã siɗa aɓarica dji quĩrĩãnadua.
35 Bãrãda mãwã dji quĩrĩã pananibʉrʉ, jũmarãba cawaɗia bãrãra mʉ̃ ume nĩbabadarãda.–
Pedroba Jesu igaraẽ́ana aɗa
Mateo 26:31-35; Marco 14:27-31; Luca 22:31-34
36 Simoʉ̃ Pedroba Jesua iwiɗisia:
–Dai Boro, ¿bʉra sãmaa wãi?–
Maʉ̃ne Jesuba panusia:
–Mʉ̃ wãbʉrʉmaa bʉra nawena poya wãẽ́a, baribʉrʉ tẽãbe mʉ̃ caiɗu wãya.–
37 Pedroba iwiɗisia:
–Dai Boro, ¿sãwãẽrã mʉ̃ra bʉ ume poya wãẽ́? Mʉ̃ra bʉ carea beuida ɓʉa.–
38 Maʉ̃ne Jesuba jarasia:
–¿Bʉra mʉ̃ carea wãrãda beuida ɓʉca? Wãrã arada mʉ̃a jaraya: eterre berui naẽna bʉa ɓarima ũbea jaraya mʉ̃ra unucada.
Beɗea eɗaare
^ 13:18. Salmo 41:9.
^ 13:19. Isaía 43:10.
^ 13:23. Jesuare chũmʉda. Griego beɗeaɗe ɓʉ́ ɓʉa: “Jesumaa tũrĩ chũta ɓʉda.” Judiorã Egiptoɗeba ẽdrʉpeɗaɗa quĩrãnebada ewariɗe mãwã ne cobadjiɗaa. “Jesuba bio quĩrĩã ɓʉ” abadjia. Juaʉ̃ba ara idjida mãwã jarabadjia.
^ 13:33. Mʉ̃ dji biarã. Griego beɗeaɗe ɓʉ́ ɓʉa “mʉ̃ warra zaquerã.”
^ 13:33. Juaʉ̃ 7:33; 8:21.
^ 13:34. Mʉ̃a obi ɓʉ beɗea djiwiɗi. Ãcõrẽba obi ɓʉ beɗea dji drõãda Levitico 19:18ɗe, Deuteronomio 6:5ɗe unubadaa.
