Juaʉ̃ 14:1-31
14 Sopua ɓearãnadua. Ãcõrẽba ariɗe o ɓʉda wãrãda ĩjãnadua. Idjaɓa mʉ̃a ariɗe o ɓʉ siɗa wãrãda ĩjãnadua.
2 Mʉ̃ Zeza ɓabarima dadjirã duananira baraa. Mʉ̃ra mamaa wãya bãrã ɓeaɗima bia oi carea. Mãwãẽ́bara mʉ̃a jaraẽ́ bacasia.
3 Mʉ̃ra bãrã ɓeaɗima bia oɗe wãya. Maʉ̃be wayacusa zeya bãrã edei carea mʉ̃ ume ɓeaɗamãrẽã.
4 Bãrãba cawa panʉa mʉ̃ra sãmaa wãida. Dji o siɗa cawa panʉa.–
5 Baribʉrʉ Tomába jarasia:
–Dai Boro, adua panʉa bʉra sãmaa wãida. ¿Sãwã maʉ̃ ora cawaɗi?–
6 Maʉ̃ne Jesuba jarasia:
–Maʉ̃ ora mʉ̃́a. Mʉ̃neba Ãcõrẽra wãrãda cawa panʉa idjaɓa zocai ɓai arada eropanʉa. Mʉ̃neba wãnaẽ́bʉrʉ ni aɓaʉda mʉ̃ Zezamaa poya jũẽnaẽ́a.
7 Bãrãba mʉ̃da wãrãda cawa panʉbʉrʉ, mʉ̃ Zeza siɗa cawa panʉa.* Iɗibʉrʉ bãrãba idjira cawa panʉa unu panʉ bẽrã.–
8 Maʉ̃ne Pelipeba idjía jarasia:
–Dai Boro, dadji Zezara daia unubidua. Ara maʉ̃ba bia ɓʉa.–
9 Maʉ̃ carea Jesuba jarasia:
–Pelipe, mʉ̃ra dãrãbʉrʉa bãrã ume ɓʉda. Bʉa mʉ̃ra ¿waɗibiɗa cawaẽ́ ɓʉca? Mʉ̃ unu ɓʉba mʉ̃ Zeza siɗa unu ɓʉa. Bʉa ¿sãwã jara ɓʉ “dadji Zezara daia unubidua”?
10 ¿Bʉa ĩjãẽ́ ɓʉca mʉ̃ra mʉ̃ Zeza ume ãbaa ɓʉda idjaɓa mʉ̃ Zezara mʉ̃ ume ãbaa ɓʉda? Mʉ̃a beɗea ɓʉra ara mʉ̃djiɗeba beɗeacaa. Ãtebʉrʉ mʉ̃ Zeza mʉ̃ ume ãbaa ɓʉra mʉ̃neba beɗea ɓʉa. Wãrãda mʉ̃neba ne jũmada idjia obaria.
11 Ĩjãnadua mʉ̃ra mʉ̃ Zeza ume ãbaa ɓʉda idjaɓa mʉ̃ Zezara mʉ̃ ume ãbaa ɓʉda. Mʉ̃a mãwã jara ɓʉ carea bãrãba ĩjãnaẽ́ panʉbʉrʉ, mʉ̃a o ɓʉ carea ĩjãnadua.
12 Wãrã arada mʉ̃a jaraya: bariduaba mʉ̃da ĩjã ɓʉbʉrʉ, mʉ̃a o ɓʉra idjia biɗa oya. Wãrãda mʉ̃a o ɓʉ cãyãbara idjia auɗuara oya, mʉ̃ra mʉ̃ Zezamaa wãi bẽrã.
13 Bãrãba mʉ̃da ĩjã panʉ bẽrã mʉ̃ trʉ̃neba iwiɗibʉdara mʉ̃a jũma oya. Mãwã mʉ̃neba ebuɗa ɓaya mʉ̃ Zezara dji dromada.
14 Wãrãda bãrãba mʉ̃da ĩjã panʉ bẽrã jũma mʉ̃ trʉ̃neba iwiɗibʉdara mʉ̃a oya.
Jesuba Ãcõrẽ Jaure diai jaraɗa
15 Bãrãba mʉ̃da wãrãda quĩrĩã panʉbʉrʉ, mʉ̃ beɗeara ĩjã o panania.*
16 Maʉ̃ bẽrã mʉ̃ Zezaa iwiɗiya bãrã Carebabarida diabuemãrẽã. Maʉ̃gʉra bãrã ume ewariza ɓaya.
17 Idjira Ãcõrẽ Jaurea. Idjia Ãcõrẽra wãrãda cawabibaria. Naʉ̃ ẽjũãnebemarãba idjira poya edaɗaẽ́a, ununaca bẽrã idjaɓa adua panʉ bẽrã. Maʉ̃ne bãrãbʉrʉ idjira cawa panʉa, bãrã ume ɓʉ bẽrã idjaɓa bãrã soɗe ɓai bẽrã.*
18 Mʉ̃a bãrãra jẽrãmãrã quĩrãca ameẽ́a. Mʉ̃ra wayacusa bãrãmaa zeya.
19 Dãrãẽ́ne naʉ̃ ẽjũãnebemarãba mʉ̃ra waa ununaẽ́a baribʉrʉ bãrãba mʉ̃ra ununia. Mʉ̃a zocai ɓai arada eroɓʉ bẽrã, bãrã biɗa zocai ɓai arada eroɓeaɗia.
20 Mʉ̃ zeɗacarea bãrãba cawaɗia mʉ̃ra mʉ̃ Zeza ume ãbaa ɓʉda, bãrãra mʉ̃ ume ãbaa panʉda, idjaɓa mʉ̃ra bãrã ume ãbaa ɓʉda.
21 Mʉ̃ beɗea ũrĩpeɗa ĩjã o ɓʉba mʉ̃ra quĩrĩã ɓʉa. Aɓaʉba mʉ̃da quĩrĩã ɓʉbʉrʉ, mʉ̃ Zezaba idjira quĩrĩã ɓaya. Mʉ̃a biɗa idjira quĩrĩã ɓaya, idjaɓa ara mʉ̃da idjía unubiya.–
22 Maʉ̃be dewara Juda, Iscarioteẽ́ba Jesua iwiɗisia:
–Dai Boro, ¿sãwã bʉra dairãa unubi baribʉrʉ naʉ̃ ẽjũãnebemarãa unubiẽ́?–
23 Jesuba panusia:
–Mʉ̃ quĩrĩã ɓʉba mʉ̃ beɗeara ĩjã o ɓaya. Mʉ̃ Zezaba idjira quĩrĩã ɓaya. Maʉ̃be daira idjimaa zeɗia idji ume ãbaa panani carea.
24 Mʉ̃ quĩrĩãẽ́ ɓʉba mʉ̃ beɗeara ĩjã ocaa. Bãrãba ũrĩ panʉ beɗeara mʉ̃reẽ́a, ãtebʉrʉ mʉ̃ Zeza, mʉ̃ Diabueɗaɗea.
25 Maʉ̃gʉra mʉ̃a bãrãa jara ɓʉa waɗibiɗa bãrã ume ɓʉ bẽrã.
26 Baribʉrʉ mʉ̃ Zezaba mʉ̃ trʉ̃neba idji Jaureda diabueya bãrã Carebabarida ɓamãrẽã. Ãcõrẽ Jaureba ne jũmada bãrãa jaradiaya. Idjia bãrãa jũma mʉ̃a jaraɗara quĩrãnebabiya.
27 Mʉ̃a necai ɓaida bãrã soɗe ameya. Mʉ̃a dia ɓʉ necai ɓaira naʉ̃ ẽjũãnebemarãba poya diaɗacaa. Maʉ̃ bẽrã jũmawãyã sopuarãnadua. Ne wayarãnadua.
28 Mʉ̃a bãrãa jarasia mʉ̃ra wãbʉrʉda idjaɓa waya bãrã ume ɓaɗe zeida.* Bãrãba mʉ̃da wãrãda quĩrĩã panʉbara ɓʉsriɗacasiɗaa mʉ̃ Zezamaa wãyana aɗa carea. Mʉ̃ Zezara mʉ̃ cãyãbara dji dromaara ɓʉ bẽrã mʉ̃ra wayacusa ɓʉya mʉ̃dji naãrã ɓaɗamaa.
29 Mʉ̃a maʉ̃gʉra jara ɓʉa waɗi mãwãi naẽna, wãrãda mãwãbʉrʉɗe bãrãba ĩjãnamãrẽã.
30 Mʉ̃ra bãrã ume dãrã beɗeaẽ́a, naʉ̃ ẽjũãnebema borora zebʉrʉ bẽrã. Idjia mʉ̃ra poyaẽ́mĩna beabiya.
31 Mãwã mʉ̃ Zezaba obi ɓʉda mʉ̃a ĩjã oya. Maʉ̃gʉɗeba naʉ̃ ẽjũãnebemarãba cawaɗia mʉ̃a mʉ̃ Zezara bio quĩrĩã ɓʉda.
Piradrʉɗadua. Wãnadrʉ.–
Beɗea eɗaare
^ 14:7. Bãrãba mʉ̃ra wãrãda cawa panʉbʉrʉ, mʉ̃ Zeza siɗa cawa panʉa. Griego beɗeaɗe ʉ̃cʉrʉ cartaɗe ɓʉ́ ɓʉa: “Bãrãba mʉ̃ra wãrãda cawa pananabara, mʉ̃ Zeza siɗa cawacasiɗaa.”
^ 14:15. Ĩjã o panania. Griego beɗeaɗe ʉ̃cʉrʉ cartaɗe ɓʉ́ ɓʉa: “Ĩjã o pananadua.”
^ 14:17. Bãrã soɗe ɓai bẽrã. Griego beɗeaɗe ʉ̃cʉrʉ cartaɗe ɓʉ́ ɓʉa: “Bãrã soɗe ɓʉ bẽrã.”
^ 14:28. Juaʉ̃ 14:3,18.
