Juaʉ̃ 15:1-27
15 Jesuba jarasia:
–Mʉ̃ra uva jʉ̃cara dji araa.* Mʉ̃ Zezara djibaria.
2 Mʉ̃ jʉwate zauɗacara idjia jũma tʉcuaya, baribʉrʉ dji zaubada jʉwatera quĩrãcuita tʉcuabaria biara zauɗamãrẽã.
3 Mʉ̃ beɗeada ĩjã panʉ bẽrã bãrãra jʉwate quĩrãcuita tʉcuaɗa quĩrãca biya ɓeaa.*
4 Mʉ̃ ume ãbaa ɓeaɗadua mʉ̃ bãrã ume ãbaa ɓʉ quĩrãca. Jʉ̃caraɗe caraẽ́ ɓʉ jʉwatera ara iduɓa zaucaa. Ara maʉ̃ quĩrãca bãrãda mʉ̃ ume ɓeaɗaẽ́bʉrʉ zauɗaẽ́a.
5 Mʉ̃ra uva jʉ̃cara dji araa. Bãrãra mʉ̃ jʉwaterãa. Mʉ̃ ume ãbaa ɓeara bio zaubadaa, mʉ̃ra bãrã ume ãbaa ɓʉ bẽrã. Bãrãba mʉ̃ neẽ́ ni cãrẽ siɗa Ãcõrẽ itea poya oɗaẽ́a.
6 Mʉ̃ ume ãbaa ɓʉẽ́ra mʉ̃ Zezaba ãyã ɓatabueya jʉwate zauca quĩrãca. Maʉ̃ jʉwate purrubaɗacarea dadjia ãbaa bueɗapeɗa babuebadaa.
7 Bãrãda mʉ̃ ume ãbaa ɓeaɗibʉrʉ, mʉ̃ beɗeada ĩjã o pananibʉrʉ, iwiɗiɗadua jũma bãrãba quĩrĩãbʉdada. Maʉ̃ne mʉ̃a diaya.
8 Bãrãda bia zauɗibʉrʉ unubiɗia wãrãda mʉ̃ ume nĩbabadarãda mãwã ɓeada. Mãwã unubiɗia mʉ̃ Zezara dji dromada.
9 Mʉ̃a bãrãra quĩrĩã ɓʉa mʉ̃ Zezaba mʉ̃ quĩrĩã ɓʉ quĩrãca. Maʉ̃ bẽrã mʉ̃ quĩrĩãneba pananadua.
10 Mʉ̃a obi ɓʉ beɗeada ĩjã oɗibʉrʉ, wãrãda mʉ̃ quĩrĩãneba panania. Ara maʉ̃ quĩrãca mʉ̃ Zezaba obi ɓʉ beɗea ĩjã o ɓʉ bẽrã idji quĩrĩãneba ɓabaria.
11 Jũma maʉ̃gʉra mʉ̃a jara ɓʉa bãrãra mʉ̃ ume bio ɓʉsriɗa ɓeaɗamãrẽã.
12 Mʉ̃a obi ɓʉ beɗeara naʉ̃gʉa: bãrãra dji quĩrĩãnadua mʉ̃a bãrã quĩrĩã ɓʉ quĩrãca.
13 Ẽberãda idji dji bia carebai carea beuibʉrʉ, ni aɓaʉba maʉ̃ cãyãbara poya biara quĩrĩãra eroɓaẽ́a.
14 Mʉ̃a obi ɓʉ beɗeada bãrãba ĩjã oɗibʉrʉ bãrãra mʉ̃ dji biarãa.
15 Mʉ̃a bãrãra waa mʉ̃ nezocaaɗa aẽ́a. Nezocaba idji boroba oi crĩcha ɓʉra adua ɓʉa. Mʉ̃a bãrãra mʉ̃ dji biarãana aya. Mʉ̃a bãrãa cawabisia ne jũma mʉ̃ Zezaɗeba ũrĩnada.
16 Bãrãba mʉ̃ra edaɗaẽ́ basía. Mʉ̃abʉrʉ bãrãra edasia. Mʉ̃a bãrãra ɓʉsia wãnapeɗa bia zauɗamãrẽã, idjaɓa maʉ̃ zaubʉdara dãrã droamãrẽã. Mʉ̃a bãrãra edaɗa bẽrã mʉ̃ Zezaba jũma bãrãba mʉ̃ trʉ̃neba iwiɗibʉdara diaya.
17 Waya mʉ̃a bãrãa jaraya: aɓarica dji quĩrĩãnadua.
Naʉ̃ ẽjũãnebemarãba Jesu ĩjã ɓeara quĩrãmabadaa
18 Naʉ̃ ẽjũãnebemarãba bãrãda quĩrãma panʉbʉrʉ, cawaɗadua ãdjirãba naãrã mʉ̃da quĩrãmasiɗada.
19 Bãrãda naʉ̃ ẽjũãnebema baɗabara ãdjirãba bãrãra quĩrĩãcasiɗaa ãdjirãnebema bẽrã. Baribʉrʉ mʉ̃a bãrãra naʉ̃ ẽjũãnebemada edasia ãdjirã awara ɓeaɗamãrẽã. Maʉ̃ bẽrã bãrãra quĩrãmabadaa.
20 Quĩrãnebaɗadua mʉ̃a naʉ̃ jaraɗara: “Ni aɓaʉ nezocada idji boro cãyãbara auɗuara ɓʉẽ́a.”* Maʉ̃gʉba jara ɓʉa ẽberãrãba mʉ̃ beɗeada ĩjã o panʉbʉrʉ, bãrã beɗea siɗa ĩjã oɗia. Baribʉrʉ ãdjirãba mʉ̃da biẽ́ oɗi carea ẽpẽ panʉbʉrʉ, bãrã siɗa biẽ́ oɗi carea ẽpẽnia.
21 Bãrãra mʉ̃ carea biẽ́ oɗia ãdjia mʉ̃ Diabueɗara adua panʉ bẽrã.
22 Mʉ̃a ãdjirãa jaradiaɗe zeɗaẽ́bara ãdjia cadjirua opeɗaɗa carea beɗeaɗe ɓeaɗaẽ́ bacasia. Baribʉrʉ mʉ̃ beɗeada ũrĩpeɗaɗa bẽrã poya jaraɗaẽ́a adua panasiɗada ãdjia o panʉra cadjiruada.
23 Aɓaʉba mʉ̃da quĩrãma ɓʉbʉrʉ, mʉ̃ Zeza siɗa quĩrãma ɓʉa.
24 Mʉ̃a ãdjirã quĩrãpita ne ununacada oɗaẽ́bara, ãdjirãba cadjirua o panʉ carea beɗeaɗe ɓeaɗaẽ́ bacasia. Baribʉrʉ mʉ̃a oɗara ãdjirãba unusiɗamĩna mʉ̃ra, mʉ̃ Zeza siɗa quĩrãma panʉa.
25 Mãwã duanʉa ara ãdjirã leyɗe jara ɓʉ quĩrãca. Nãwã jara ɓʉa: “Mʉ̃ra beɗea neẽ́ ɓʉda quĩrãmasiɗaa.”*
26 Ãcõrẽ Jaure bãrã Carebabarira zeya. Idjia wãrã beɗeada jarabaria. Mʉ̃a idjira mʉ̃ Zezamaʉba diabuebʉrʉɗe idjia mʉ̃nebemada bãrãa beɗeaya.
27 Bãrã biɗa mʉ̃nebemada beɗeaɗia, bãrãra naãrãeɗaʉba mʉ̃ ume panʉ bẽrã.
Beɗea eɗaare
^ 15:1. Antiguo Testamentoɗe jara ɓʉa Ãcõrẽba Israelera uva jʉ̃cara quĩrãca usida, mãwãmĩna idjia quĩrĩã ɓaɗa quĩrãca ãdjirãba oɗaẽ́ basía. Acʉdua Salmo 80:8-16; Isaía 5:1-7; Jeremia 2:21; Ezequiel 15:1-8; 19:10-14; Osea 10:1. Baribʉrʉ naʉ̃ Juaʉ̃ 15:1ɗe jara ɓʉa Jesuba o ɓʉda Ãcõrẽba quĩrĩã ɓʉ quĩrãca. Maʉ̃ carea jara ɓʉa “uva jʉ̃cara dji ara.”
^ 15:3. Juaʉ̃ 13:10.
^ 15:20. Juaʉ̃ 13:16.
^ 15:25. Salmo 35:19; 69:4.
