Juaʉ̃ 16:1-33
16 Mʉ̃a jũma maʉ̃gʉra bãrãa jara ɓʉa mʉ̃ ĩjã panʉra igararãnamãrẽã.
2 Judiorãba bãrãra ãdjirã dji jʉrebada deɗebemada ãyã jʉrecuaɗia. Maʉ̃ awara bãrã beaɗi ewarira zeya. Bãrã beabʉdaɗe ãdjirãba crĩchaɗia Ãcõrẽba quĩrĩã ɓʉda o panʉda.
3 Mãwã oɗia mʉ̃ Zezada, mʉ̃ siɗa adua panʉ bẽrã.
4 Baribʉrʉ mʉ̃a jũma maʉ̃gʉra bãrãa jarabʉrʉa, maʉ̃ ewari jũẽbʉrʉɗe mʉ̃a jaraɗara quĩrãnebaɗapeɗa sozarra ɓeaɗamãrẽã.
Ãcõrẽ Jaureba o ɓʉɗebema
Mʉ̃a bãrã bia mĩgaɗiɗebemada naẽna jaraẽ́ basía bãrã ume ɓaɗa bẽrã.
5 Baribʉrʉ mʉ̃ra mʉ̃ Diabueɗamaa wãya. Mãwãmĩna ni aɓaʉ bãrãnebemaba mʉ̃́a iwiɗiɗaẽ́ panʉa “bʉra ¿sãma wãi?”
6 Ãtebʉrʉ bãrãra sopua panʉa mʉ̃ra wãyana aɗa bẽrã.
7 Mʉ̃a wãrã arada jaraya: bãrã itea biara ɓʉa mʉ̃ra wãida. Mʉ̃da wãẽ́bʉrʉ bãrã Carebabarida zeẽ́a. Baribʉrʉ mʉ̃da wãibʉrʉ idjira diabueya.
8 Ãcõrẽ Jaure zebʉrʉɗe naʉ̃ ẽjũãnebemarãa cawabiya caida cadjirua obarida, caida jipa ɓʉda, idjaɓa caida beɗeaɗe ɓʉda. Cawabiya ãdjirãba jũma maʉ̃gʉɗebemada ãĩ crĩcha panʉda.
9 Ãcõrẽ Jaureba ãdjirãa cawabiya mʉ̃ beɗea ĩjãnaca bẽrã cadjirua obadada.
10 Cawabiya mʉ̃ra jipa ɓʉda mʉ̃ Zezamaa wãna bẽrã. Maʉ̃ne bãrãba mʉ̃ra waa ununaẽ́a.
11 Idjaɓa Ãcõrẽ Jaureba cawabiya naʉ̃ ẽjũãnebemarãra wãrãda beɗeaɗe panʉda, Ãcõrẽba naʉ̃ ẽjũãnebema borora beɗeaɗe ɓʉaɗa aɗa bẽrã.*
12 Mʉ̃a waɗibiɗa ne zocãrã bãrãa jara quĩrĩã ɓʉa. Maʉ̃ra bãrãba nawena jũma poya cawaɗaẽ́a.
13 Baribʉrʉ Ãcõrẽ Jaureba wãrã beɗeara cawabibari bẽrã idji zebʉrʉɗe bãrãa jaradiaya wãrã beɗea Ãcõrẽneba ze ɓʉda jũma cawaɗamãrẽã. Idjira ara idji crĩchaɗeba beɗeaẽ́a, ãtebʉrʉ jũma mʉ̃neba ũrĩbʉrʉda jaraya. Idjia bãrãa cawabiya nocoarebema ewariɗe cãrẽda sãwãida.
14 Cawabiya mʉ̃ra dji dromada, mʉ̃ beɗea ũrĩpeɗa jũma bãrãa jaradiai bẽrã.
15 Jũma mʉ̃ Zezaɗera mʉ̃rea. Maʉ̃ carea mʉ̃a jarasia Ãcõrẽ Jaureba mʉ̃ beɗea ũrĩpeɗa bãrãa jaradiaida.
Bãrãra sopua pananapeɗa ɓʉsriɗaɗia
16 Dãrãẽ́ne bãrãba mʉ̃ra ununaẽ́a, baribʉrʉ mãwãnacarea wayacusa dãrãẽ́ne mʉ̃ra ununia.–*
17 Maʉ̃ne ʉ̃cʉrʉ idji ume nĩbabadarãba ara ãdjiduɓa iwiɗi duanasiɗaa:
–Idjia dadjirãa “dãrãẽ́ne bãrãba mʉ̃ra ununaẽ́a, baribʉrʉ mãwãnacarea wayacusa dãrãẽ́ne mʉ̃ra ununiana” a ɓʉba ¿cãrẽda jara ɓʉ? Idji Zezamaa wãyana a ɓʉba ¿cãrẽda jara ɓʉ?
18 Maʉ̃ beɗea “dãrãẽ́ne” a ɓʉba ¿cãrẽda jara ɓʉ? Dadjirãba cawaɗaẽ́ panʉa cãrẽnebemada beɗea ɓʉda.–
19 Jesuba cawasia ãdjia maʉ̃gʉɗebemada iwiɗi quĩrĩã panʉda. Maʉ̃ carea jarasia:
–Mʉ̃a bãrãa jarasia dãrãẽ́ne mʉ̃ra ununaẽ́da idjaɓa mãwãnacarea dãrãẽ́ne mʉ̃ra wayacusa ununida. ¿Maʉ̃gʉɗebemada ara bãduɓa iwiɗi duanʉẽ́ca?
20 Wãrã arada mʉ̃a jaraya: bãrãra sopuaba jĩãnia baribʉrʉ naʉ̃ ẽjũãnebemarãra ɓʉsriɗaɗia. Bãrãra sopuaba jĩãnimĩna maʉ̃ sopuara jõpeɗa ɓʉsriɗaɗia.
21 Wãrãda wẽrã warra tobʉrʉɗe pua ɓʉa idji ewarira jũẽna bẽrã. Baribʉrʉ warra toɗacarea maʉ̃ puara quĩrãdoabaria idji warra carea ɓʉsriɗa ɓʉ bẽrã.
22 Ara maʉ̃ quĩrãca bãrãra ara nawena sopua panʉa, baribʉrʉ mʉ̃ra wayacusa bãrã acʉɗe zeya. Maʉ̃be bãrãra ɓʉsriɗaɗia. Ni aɓaʉba maʉ̃ ɓʉsriɗara poya jõbiẽ́a.
23 Maʉ̃gʉ ewariɗe bãrãba ni cãrẽ siɗa mʉ̃́a waa iwiɗiɗaẽ́a. Wãrã arada mʉ̃a jaraya: bãrãba mʉ̃ Zezaa mʉ̃ trʉ̃neba iwiɗibʉdara idjia diaya.
24 Bãrãba waɗibiɗa dadji Zezaa ni cãrẽ siɗa mʉ̃ trʉ̃neba iwiɗiɗaẽ́ panʉa. Baribʉrʉ mãwã iwiɗiɗibʉrʉ edaɗia. Mãwã bãrãra bio ɓʉsriɗa ɓeaɗia.
25 Mʉ̃a ne jara ɓʉɗeba maʉ̃gʉra bãrãa jarasia, baribʉrʉ ewari aɓa mʉ̃ra waa ne jara ɓʉɗeba beɗeaẽ́a. Ãtebʉrʉ mʉ̃ Zezaɗebemada ebuɗa jaraya.
26 16:26-27 Maʉ̃ ewariɗe bãrãba mʉ̃ trʉ̃neba Ãcõrẽa iwiɗiɗia. Mʉ̃ra bãrãbari Ãcõrẽa beɗeaẽ́a, mʉ̃ Zezaba bãrãra quĩrĩã ɓʉ bẽrã. Idjia bãrãra quĩrĩã ɓʉa, mʉ̃da quĩrĩã panʉ bẽrã idjaɓa mʉ̃ra Ãcõrẽneba zeɗada ĩjã panʉ bẽrã.
28 Mʉ̃ Zezamaʉba naʉ̃ ẽjũãnaa zesia. Baribʉrʉ mʉ̃a naʉ̃ ẽjũãra ameya mʉ̃ Zezamaa wayacusa wãi carea.–
29 Maʉ̃be idji ume nĩbabadarãba jarasiɗaa:
–Ʉ̃rãbʉrʉ bʉa jara ɓʉra daima ebuɗa ɓʉa. Ne jara ɓʉɗeba beɗea ɓʉẽ́a.
30 Ʉ̃rãbʉrʉ dairãba cawabʉdaa bʉa ne jũmada cawa ɓʉda. Daiba iwiɗiɗi naẽna bʉa sãwã panuida cawa ɓʉa. Maʉ̃neba dairãba cawa panʉa bʉra Ãcõrẽneba zesida.–
31 Jesuba jarasia:
–¿Ʉ̃rãbʉrʉ bãrãba wãrãda ĩjãbʉdaca?
32 Ewari jũẽida ɓaɗada jũẽbʉrʉa. Bãrãra jũma aɓa aɓa memenenapeɗa mʉ̃duɓa amenia.* Baribʉrʉ mʉ̃duɓa ɓaẽ́a mʉ̃ Zezada mʉ̃ ume ɓʉ bẽrã.
33 Jũma maʉ̃gʉra mʉ̃a bãrãa jarasia mʉ̃neba necai ɓeaɗamãrẽã. Naʉ̃ ẽjũãne bia mĩga ɓeaɗia, baribʉrʉ ne wayarãnadua: naʉ̃ ẽjũãnebema cadjiruada mʉ̃a poyasia.–
