Juaʉ̃ 17:1-26
17 Jesuba mãwã jaraɗacarea bajãnaa acʉpeɗa jarasia:
–Zeza, mʉ̃ ewarira jũẽsia. Bʉ Warrara dji dromada unubidua bʉ Warraba bʉra wãrãda dji dromada unubimãrẽã.
2 Bʉa jũma ẽberãrãra mʉ̃ jʉwaeɗa ɓʉsia. Maʉ̃gʉrãnebemada bʉa mʉ̃́a ʉ̃cʉrʉ diasia. Mʉ̃a ãdjirãa ewariza zocai ɓaida diasia.
3 Ewariza zocai ɓeaba cawa panʉa bʉra wãrã Ãcõrẽ aɓa ɓʉda. Idjaɓa za bʉa diabueɗa Jesucritoda cawa panʉa.
4 Bʉa mʉ̃́a naʉ̃ ẽjũãne obiɗara mʉ̃a jũma osia. Mãwã cawabisia bʉra dji dromada.
5 Maʉ̃ carea Zeza, mʉ̃ra bʉ quĩrãpita dji dromada ɓʉdua bʉ ume naʉ̃ ẽjũã oi naẽna dji dromada ɓaɗa quĩrãca.
Jesuba idji ume nĩbabadarã carea Ãcõrẽa iwiɗiɗa
6 Bʉa mʉ̃́a ẽberãrã naʉ̃ ẽjũãne ɓeada ʉ̃cʉrʉ diasia. Mʉ̃a jũma ãdjirãa bʉra cawabisia. Ãdjirãra bʉrea, baribʉrʉ bʉa mʉ̃́a diasia bʉ beɗeada jaradiamãrẽã. Ãdjia ĩjã o panʉa.
7 Maʉ̃ba cawa panʉa jũma mʉ̃a eroɓʉra bʉɗeba ze ɓʉda.
8 Bʉa mʉ̃́a jaraɗara mʉ̃a ãdjirãa jaradiasia. Ãdjirãba wãrãda maʉ̃ beɗeara ĩjãsiɗaa. Maʉ̃ bẽrã cawa panʉa wãrãda mʉ̃ra bʉmaʉba zesida. Wãrãda ĩjã panʉa bʉa mʉ̃ra diabuesida.
9 Mʉ̃a bʉ́a iwiɗiya ãdjirã carebamãrẽã. Mʉ̃a bʉ́a iwiɗiẽ́ ɓʉa naʉ̃ ẽjũãnebemarã carea. Ãtebʉrʉ bʉa mʉ̃́a diaɗarã careabʉrʉ iwiɗi ɓʉa, ãdjirãra bʉre bẽrã.
10 Jũma mʉ̃rera bʉrea idjaɓa jũma bʉrera mʉ̃rea. Ãdjirãba o panʉneba mʉ̃ra dji dromada unubi panʉa.
11 Mʉ̃ra naʉ̃ ẽjũãne ɓaẽ́a baribʉrʉ ãdjirãra waɗibiɗa naʉ̃ ẽjũãne panania. Zeza, bʉra bio biya quirua. Mʉ̃ra bʉmaa wãbʉrʉ bẽrã bʉ ʉɓʉaɗeba ãdjirãra bio wagadua. Bʉa mʉ̃́a maʉ̃ ʉɓʉara diasia.* Mãwã ãdjirãra cacua aɓa ɓʉ quĩrãca ɓeaɗia, dadji cacua aɓa panʉ quĩrãca.
12 Bʉ ʉɓʉaɗeba mʉ̃a jũma bʉa diaɗarãra naʉ̃ ẽjũãne waga eroɓasia. Ãdjirãnebemarã ni aɓaʉda aduaɗaẽ́ basía. Aɓabe dji aduaida ɓaɗadrʉ aduasia bʉ beɗeaba jara ɓʉ quĩrãca wãrãda mãwãmãrẽã.*
13 Ʉ̃rãbʉrʉ mʉ̃ra bʉmaa wãya. Baribʉrʉ waɗibiɗa naʉ̃ ẽjũãne ɓʉɗe jũma maʉ̃gʉra jarabʉrʉa. Mãwã mʉ̃ bʉ ume ɓʉsriɗa ɓʉ quĩrãca ãdjirã siɗa bio ɓʉsriɗa panania.
14 Bʉa jaraɗara mʉ̃a ãdjirãa jaradiasia. Baribʉrʉ naʉ̃ ẽjũãnebemarãba ãdjirãra quĩrãma panʉa mʉ̃ quĩrãca naʉ̃ ẽjũãnebemarãẽ́ bẽrã.
15 Mʉ̃a bʉ́a iwiɗiẽ́ ɓʉa ãdjirãra naʉ̃ ẽjũãnebemada ãyã edemãrẽã, ãtebʉrʉ iwiɗi ɓʉa cadjiruaɗebemada waga ɓamãrẽã.*
16 Ãdjirãra naʉ̃ ẽjũãnebemaẽ́a mʉ̃ naʉ̃ ẽjũãnebemaẽ́ quĩrãca.
17 Bʉ beɗeaba bʉra wãrãda cawabi ɓʉa. Maʉ̃ba ãdjirãra aɓa bʉ itea bia ɓʉdua.
18 Bʉa mʉ̃ naʉ̃ ẽjũãnebemarã tãẽna diabueɗa quĩrãca mʉ̃a ãdjirãra naʉ̃ ẽjũãnebemarã tãẽna diabuebʉrʉa.
19 Ãdjirã carea ara mʉ̃djida aɓa bʉ itea bia ɓʉbʉrʉa, ãdjirã siɗa aɓa bʉ itea bia ɓeaɗamãrẽã bʉ wãrãda cawa panʉneba.
Jesuba jũma idji ĩjãbʉda carea Ãcõrẽa iwiɗiɗa
20 Mʉ̃a aɓabe ãdjirã carea iwiɗiẽ́ ɓʉa. Ãtebʉrʉ ãdjirãba mʉ̃ beɗea jarabʉdaɗe mʉ̃ ĩjãbʉda carea biɗa iwiɗi ɓʉa.
21 Zeza, bʉra mʉ̃ ume ɓʉ bẽrã idjaɓa mʉ̃da bʉ ume ɓʉ bẽrã mʉ̃a iwiɗi ɓʉa ãdjirã siɗa dadji ume cacua aɓa ɓʉ quĩrãca ɓeaɗamãrẽã. Mãwã naʉ̃ ẽjũãne ɓeaba ĩjãnia bʉa mʉ̃ra diabuesida.
22 Bʉa mʉ̃ra edasia dadjira ãbaa pananamãrẽã. Mãwã mʉ̃ra dji dromada ɓʉsia. Ara maʉ̃ quĩrãca mʉ̃a ãdjirãra dji dromada ɓʉsia dadji ume cacua aɓa ɓʉ quĩrãca pananamãrẽã.
23 Mʉ̃ra ãdjirã ume ɓʉ bẽrã idjaɓa bʉra mʉ̃ ume ɓʉ bẽrã dadjirãra jũma ãbaa cacua aɓa ɓʉ quĩrãca panania. Mãwã naʉ̃ ẽjũãne ɓeaba cawaɗia bʉa mʉ̃ra diabuesida idjaɓa cawaɗia bʉa ãdjirãra quĩrĩã ɓʉda mʉ̃ quĩrĩã ɓʉ quĩrãca.
24 Zeza, bʉa naʉ̃ ẽjũã oi naẽnaʉba mʉ̃ra quĩrĩã ɓʉa. Maʉ̃ bẽrã bajãne mʉ̃ra dji dromada ɓʉsia. Mʉ̃a quĩrĩã ɓʉa jũma bʉa mʉ̃́a diaɗarãra mama mʉ̃ ume ãbaa ɓeaɗida bʉa mʉ̃ dji dromada ɓʉɗara ununamãrẽã.
25 Zeza, bʉra jipa ɓʉa. Naʉ̃ ẽjũãnebemarãba bʉra adua panʉa, baribʉrʉ mʉ̃a bʉra cawa ɓʉa. Idjaɓa za ɓea biɗa cawa panʉa bʉa mʉ̃ra namaa diabuesida.
26 Mʉ̃a ãdjirãa bʉra cawabisia. Maʉ̃ awara waɗibiɗa auɗuara cawabi ɓaya bʉa mʉ̃ quĩrĩã ɓʉ quĩrãca ãdjirã siɗa dji quĩrĩã pananamãrẽã idjaɓa mʉ̃ra ãdjirã soɗe eropananamãrẽã.–
