Juaʉ̃ 18:1-40
18 Jũma maʉ̃gʉ jaraɗacarea Jesura idji ume nĩbabadarã siɗa Cedroʉ̃ do zaque waa quĩrãrẽ wãsiɗaa. Arima néuda ɓasia. Jesura idji ume nĩbabadarã siɗa mamaa wãsiɗaa.
2 Juda, Jesu jidabiya ɓʉba maʉ̃ néura cawa ɓasia, Jesura idji ume nĩbabadarã ume mama ɓarima zocãrã dji jʉrebadjiɗa bẽrã.
3 Maʉ̃ bẽrã Judaba zocãrã romano sordaorãda, Ãcõrẽ de dromanebema zarrarã siɗa maʉ̃ néuɗaa pe edesia. Ãdjirãra sacerdoterã bororãba, pariseorã biɗa Juda ume diabuesiɗaa. Ãdjirãba ĩbĩrãda idjaɓa mĩãsu siɗa eropanasiɗaa.
4 Maʉ̃ne Jesuba jũma sãwãida cawa ɓʉ bẽrã ãdjimaa wãpeɗa iwiɗisia:
–Bãrãba ¿caida jʉrʉ panʉ?–
5 Ãdjirãba panusiɗaa:
–Jesu Nazareɗebemada.–
Jesuba jarasia:
–Mʉ̃da idjía.–
Maʉ̃ne Juda, Jesu jidabiya ɓʉra ãdjirã ume ɓasia.
6 Jesuba mʉ̃da idjíaɗa abʉrʉɗe ãdjirãra jẽda ʉradrʉbʉdaɗe ɓaecuasiɗaa.
7 Maʉ̃be Jesuba wayacusa iwiɗisia:
–¿Caida jʉrʉ panʉ?–
Ãdjirãba wayacusa panusiɗaa:
–Jesu Nazareɗebemada.–
8 Maʉ̃ne Jesuba jarasia:
–Mʉ̃da idjíaɗa asia. Mʉ̃da jʉrʉ panʉbʉrʉ, za duanʉ ẽberãrãra idu wãbiɗadua.–
9 Mãwã jarasia idjia naẽna jaraɗa bẽrã: “Zeza, bʉa mʉ̃́a diaɗara ni aɓa biɗa aduaɗaẽ́a.”* Idjia jaraɗa quĩrãca wãrãda mãwãsia.
10 Maʉ̃ne Simoʉ̃ Pedroba djõbada necoda eroɓasia. Maʉ̃da ẽũta edapeɗa sacerdote dji droma nezoca cʉwʉrʉ jʉwa araarebemada tʉtasia. Maʉ̃ nezoca trʉ̃ra Malco abadaa.
11 Maʉ̃ carea Jesuba Pedroa jarasia:
–Bʉdji necora wagadua. Bʉmaarã ¿mʉ̃ Zezaba mʉ̃ mĩgayaɗa aɗara mʉ̃a droaida ɓʉẽ́ca?–
Jesu Anámaa jida edepeɗaɗa
Mateo 26:57-58; Marco 14:53-54; Luca 22:54
12 Maʉ̃be romano sordaorãba Jesura jidaɗapeɗa jʉwa jʉ̃siɗaa. Ãdji borora, Ãcõrẽ de dromanebema zarrarã siɗa arima panasiɗaa.
13 Jesura naãrã ẽberã Aná demaa edesiɗaa. Anára Caipá zãwãrẽ basía. Maʉ̃ poaɗe Caipára sacerdote dji droma basía.*
14 Ara maʉ̃ Caipába judiorãa jaraɗoasia biara ɓʉda ẽberã aɓa jũmarã carea beuida.*
Pedroba Jesu unucaaɗa aɗa
Mateo 26:69-70; Marco 14:66-68; Luca 22:55-57
15 Maʉ̃ne Jesu ume nĩbabadarã Simoʉ̃ Pedroda idjaɓa dewarada Jesu caiɗu wãsiɗaa. Simoʉ̃ Pedro ume wãnara sacerdote dji dromaba unubadjia. Maʉ̃ bẽrã idjira Jesu caiɗu eɗa wãsia sacerdote dji droma de duɗaa.
16 Baribʉrʉ Pedrora eɗa wãbada dajadaare ɓesia. Maʉ̃ bẽrã idji ume wãna, sacerdote dji dromaba unubarira dajadaa wãsia. Dji eɗa wãbada wagabari wẽrã ume beɗeapeɗa Pedrora eɗa edesia.
17 Maʉ̃ wẽrãba Pedroa iwiɗisia:
–¿Bʉ siɗa Jesu ume nĩbabariẽ́ca?–
Pedroba panusia:
–Mʉ̃ẽ́a.–
18 Maʉ̃ne sacerdote dji droma nezocarãba, Ãcõrẽ de dromanebema zarrarã biɗa tʉbʉda coa nũmʉsiɗaa cũrãsa nũmʉ bẽrã. Coaɗapeɗa tʉbʉ cã duanasiɗaa. Maʉ̃ne Pedrora ãdjirã ume tʉbʉ cã nũmasia.
Anába Jesua bio iwiɗiɗa
Mateo 26:59-66; Marco 14:55-64; Luca 22:66-71
19 Maʉ̃be sacerdote dji dromaba Jesua bio iwiɗisia idji ume nĩbabadarãnebemada, idjia jaradia ɓaɗaɗebema siɗa.
20 Maʉ̃ne Jesuba panusia:
–Mʉ̃ra naʉ̃ ẽjũãnebemarã quĩrãpita ebuɗa beɗea ɓasia. Mʉ̃a jaradia ɓasia dadjirã dji jʉrebada deza idjaɓa Ãcõrẽ de droma dajada, jũma dadji judiorã ãbaa dji jʉrebadama. Ni maãrĩ biɗa chupea jaraẽ́ basía.
21 ¿Cãrẽ cãrẽã mʉ̃́a iwiɗi ɓʉ? Mãwã oiẽ́ ɓʉa. Ãtebʉrʉ mʉ̃ beɗea ũrĩpeɗaɗarãa iwiɗida ɓʉa. Ãdjirãbʉrʉ cawa panʉa mʉ̃a jaradiaɗara.–
22 Jesuba mãwã jarabʉrʉɗe zarra idji caita nũmʉba jʉwajãba Jesu quĩrãdarraɗe upeɗa jarasia:
–¿Bʉa sacerdote dji dromada wayaẽ́ ɓʉca?–
23 Jesuba panusia:
–Mʉ̃a biẽ́ jarasibʉrʉ, jaradua mʉ̃a cãrẽneba biẽ́ jarasida. Baribʉrʉ bia jarasibʉrʉ, bʉa ¿cãrẽ cãrẽã mʉ̃ra usí?–
24 Maʉ̃be Anába Jesura jʉwa jʉ̃ ɓʉda Caipámaa diabuesia, idjira sacerdote dji dromaara ɓʉ bẽrã.
Pedroba waya Jesu unucaaɗa aɗa
Mateo 26:71-75; Marco 14:69-72; Luca 22:58-62
25 Pedrora waɗibiɗa ʉ̃ta nũmasia tʉbʉ cã ɓʉda. Maʉ̃ne ẽberãrãba idjía iwiɗisiɗaa:
–¿Bʉ siɗa jãʉ̃gʉ ẽberã ume nĩbabariẽ́ca?–
Pedroba mẽrã jarasia:
–Mʉ̃ẽ́a.–
26 Maʉ̃ne sacerdote droma nezoca aɓaʉba Pedroa iwiɗisia:
–¿Mʉ̃a bʉra idji ume néuɗe unuẽ́ basica?–
Maʉ̃ nezocara Pedroba cʉwʉrʉ tʉtaɗa ume dji ẽberãrã basía.
27 Pedroba wayacusa mẽrãsia. Ara mãwã jarabʉrʉɗe eterrera berusia.*
Jesu Pilato quĩrãpita ɓaɗa
28 Maʉ̃be diapeɗeɗa Jesura Caipá deɗeba romanorã boro de dajadaa edesiɗaa. Jesu edepeɗaɗa judiorãra maʉ̃ de Pretorio abadaɗe eɗa wãnaẽ́ basía ãdjirãmaarã eɗa wãsiɗara Ãcõrẽ quĩrãpita biẽ́ panani bẽrã. Idji quĩrãpita bia ɓa quĩrĩã panasiɗaa Egiptoɗeba ẽdrʉpeɗaɗa quĩrãnebabada coɗi carea.*
29 Maʉ̃ bẽrã Pilatoda ãdjirãmaa dajadaa wãpeɗa iwiɗisia:*
–Naʉ̃ ẽberã, bãrãba biẽ́ jara panʉba ¿cãrẽ cadjiruada osi?–
30 Ãdjirãba panusiɗaa:
–Naʉ̃gʉba cadjiruada oɗaẽ́bara dairãba idjira bʉmaa enenaẽ́ bacasia.–
31 Maʉ̃ carea Pilatoba ãdjirãa jarasia:
–Bãrãbʉrʉ idjira edeɗapeɗa cawa oɗadua ara bãdji leyba jara ɓʉ quĩrãca.–
Maʉ̃ne judiorãba jarasiɗaa:
–Daiba djãrãra beabiɗacara panʉa. Bãrãbʉrʉ beabiɗida panʉa.–
32 Maʉ̃gʉra wãrãda mãwãsia Jesuba jaraɗa quĩrãca. Idjia jarasia sãwã beuida ɓʉda.*
33 Maʉ̃be Pilatora wayacusa deɗe eɗa wãsia. Jesura eɗa edebipeɗa iwiɗisia:
–¿Bʉda wãrãda judiorã boroca?–*
34 Jesuba panusia:
–¿Maʉ̃gʉra bʉa iwiɗi ɓʉca bio cawai carea, wa iwiɗi ɓʉ dewararãba bʉ́a mʉ̃nebemada mãwã jarasiɗa bẽrã?–
35 Maʉ̃ carea Pilatoba jarasia:
–¿Mãwãra mʉ̃da judioca? Bʉ purubʉrʉ, sacerdote bororãbʉrʉ bʉra mʉ̃maa enesiɗaa. ¿Bʉa cãrẽda osi ãdjirãba mãwã oɗamãrẽã?–
36 Jesuba panusia:
–Mʉ̃ra ẽberãrã boromĩna mʉ̃ purura naʉ̃ ẽjũãnebemaẽ́a. Naʉ̃ ẽjũãnebema baɗabara mʉ̃ purura djõcasiɗaa judiorãba mʉ̃ jidarãnamãrẽã. Baribʉrʉ mʉ̃ purura naʉ̃ ẽjũãnebemaẽ́a.–
37 Maʉ̃ bẽrã Pilatoba jarasia:
–¿Mãẽteara wãrãda bʉra ẽberãrã boroca?–
Jesuba panusia:
–Mãẽ, bʉa mãwã jara quĩrĩã ɓʉbʉrʉ, mʉ̃ra ẽberãrã Boroa. Baribʉrʉ mʉ̃ra naʉ̃ ẽjũãnaa zesia wãrã beɗeada jaradiai carea.* Jũma wãrãare ɓeaba mʉ̃ beɗeara ĩjãbadaa.–
38 Maʉ̃ne Pilatoba iwiɗisia:
–¿Cãrẽda wãrã?–
Jesu beaɗi carea jarapeɗaɗa
Mateo 27:15-31; Marco 15:6-20; Luca 23:13-25
Mãwã jaraɗacarea Pilatora wayacusa dajadaa judiorãmaa wãpeɗa jarasia:
–Mʉ̃a unuẽ́a naʉ̃ ẽberãba cãrẽ cadjiruada osida.
39 Baribʉrʉ dai romanorãba poaza bãrã itea obada quĩrãca oɗia. Bãrã Egiptoɗeba ẽdrʉpeɗaɗa quĩrãnebabada ewari bẽrã mʉ̃a preso ɓʉda aɓa ẽdrʉ ɓʉya, bãrãba jarabʉdada. ¿Bãrãba quĩrĩã panʉca mʉ̃a za ɓʉ judiorã boroda ẽdrʉ ɓʉida?–
40 Maʉ̃ne ãdjirãba jĩgua jarasiɗaa:
–Jãʉ̃gʉẽ́a. ¡Barrabádrʉ ẽdrʉ ɓʉdua!–
Maʉ̃ Barrabára mĩã beabada boro basía.*
Beɗea eɗaare
^ 18:9. Juaʉ̃ 6:39.
^ 18:13. Caipára 18 poa sacerdote dji boro basía, poa 18ɗeba aɓa 36ɗaa.
^ 18:14. Juaʉ̃ 11:50.
^ 18:27. Juaʉ̃ 13:38.
^ 18:28. Judiorãba jarabadjiɗaa aɓaʉda judiorãẽ́ deɗe eɗaa wãsira Ãcõrẽ quĩrãpita biẽ́ ɓeida. Acʉdua Numero 9:9-11.
^ 18:29. Romanorã boro Tiberio abadaba Pilatora Judea druaɗebema boroda ɓʉsia. Dji boroda ɓasia poa 26ɗeba aɓa 36 babʉrʉɗaa. Judiorã bororãba Jesura Pilatomaa edesiɗaa ãdjia preso ɓearã beacara panʉ bẽrã. Aɓa romanorãba mãwã cawa oɗida panasiɗaa.
^ 18:32. Juaʉ̃ 3:14; 8:28; 12:32.
^ 18:33. Luca 23:2ɗe jara ɓʉa judiorã bororãba Pilatoa maʉ̃nebemada jarasiɗada.
^ 18:37. Naʉ̃ ẽjũãnaa zesia. Griego beɗeaɗe nãwã ɓʉ́ ɓʉa: “Mʉ̃ra naʉ̃ ẽjũãne toɗapeɗa zesia.”
^ 18:40. Ʉ̃cʉrʉ versioʉ̃ne jara ɓʉa Barrabára ne drʉabari basida. Baribʉrʉ Marco 15:7-8ɗe nãwã jara ɓʉa: “Maʉ̃ Barrabára idjiarebema siɗa romanorã ume djõsiɗaa. Maʉ̃ne mĩã quenapeɗaɗa bẽrã idjira preso ɓasia.”
