Juaʉ̃ 19:1-42
19 Maʉ̃be Pilatoba Jesura soaba ubisia.
2 Mãwã ɓʉɗe romano sordaorãba boroɓari ʉrʉ caɗada Jesu boroɗe jʉ̃ ɓʉsiɗaa, idjaɓa cacua ʉ̃rʉ̃ jʉ̃bada pursupursua ɓʉda jʉ̃bisiɗaa.
3 Maʉ̃be Jesu caita zeɗapeɗa ipiɗa jarasiɗaa:
–¡Bio bia ɓʉa, judiorã boro!–
Mãwã jaraɗapeɗa jʉwajãba idji quĩrãdarraɗe ubadjiɗaa.
4 Maʉ̃be Pilatora wayacusa dajada judiorãmaa wãpeɗa jarasia:
–Ũrĩnadua. Mʉ̃a ẽberãra dajadaa eneya bãrã quĩrãpita. Mʉ̃maarã idjia cadjiruada oẽ́ basía.–
5 Jesu dajadaa enebʉdaɗe ʉrʉ caɗa boroɓarida idjaɓa cacuaɗe jʉ̃bada pursupursua ɓʉda jʉ̃ ɓasia. Maʉ̃ne Pilatoba jarasia:
–Za ɓʉa dji ẽberãra.–*
6 Baribʉrʉ Jesu unubʉdaɗe sacerdote bororãba, Ãcõrẽ de dromanebema zarrarã biɗa jĩgua jarasiɗaa:
–¡Idjira cruɗe cachi beabidua! ¡Cruɗe cachi beabidua!–
Maʉ̃ne Pilatoba jarasia:
–¡Bãrãbʉrʉ edeɗapeɗa cruɗe cachi beaɗadua! Mʉ̃maarã idjia cadjiruada oẽ́ basía.–
7 Maʉ̃ne judiorãba panusiɗaa:
–Dairãba leyda eropanʉa. Maʉ̃ leyɗe jara ɓʉ quĩrãca idjira beuida ɓʉa ara idjida Ãcõrẽ Warraaɗa a ɓʉ bẽrã.–*
8 Maʉ̃ beɗea ũrĩsiɗe Pilatora bio ne wayasia.
9 Maʉ̃be idji de dromane eɗa wayacusa wãpeɗa Jesua iwiɗisia:
–¿Bʉra sãmabema?–
Baribʉrʉ Jesuba panuẽ́ basía.
10 Mãwã ɓʉɗe Pilatoba jarasia:
–¿Bʉa panuẽ́ca? ¿Adua ɓʉca mʉ̃a bʉra poya cruɗe cachi beabida idjaɓa poya ẽdrʉ ɓʉida ɓʉda?–
11 Maʉ̃ne Jesuba panusia:
–Ãcõrẽba bʉda ɓʉɗaẽ́bara bʉa mʉ̃ra ni cãrẽ siɗa oẽ́ bacasia. Mʉ̃ bʉ jʉwaɗe diapeɗaɗaba mãwã o quĩrĩã panana bẽrã bʉ cãyãbara cadjiruada auɗuara osiɗaa.–
12 Maʉ̃ ũrĩsiɗe Pilatoba crĩcha ɓesia Jesura sãwã ẽdrʉ ɓʉida. Baribʉrʉ judiorãba wetara jĩgua jarasiɗaa:
–Bʉa jãʉ̃ ẽberãda ẽdrʉ ɓʉibʉrʉ bʉra romanorã boro ume dji biaẽ́a. Bariduaba ara idjida dji boroaɗa aibʉrʉ, maʉ̃ ẽberãra romanorã boro ume dji quĩrũa.–
13 Pilatoba maʉ̃gʉda ũrĩna bẽrã Jesura dajadaa enebisia. Maʉ̃be idji ãbugueɗe chũmesia dejã “mõgara dowa oɗa” abadama. Hebreo beɗeaɗe Gabata abadaa.
14 Judiorã Egiptoɗeba ẽdrʉpeɗaɗa quĩrãnebabada ewarira nurẽma bẽrã ãdjirãra ne o panasiɗaa. Umatipa baboɗoɗe Pilatoba judiorãa jarasia:
–Acʉɗadua. Bãrã Borora nama ɓʉa.–
15 Baribʉrʉ ãdjirãba jĩgua jarasiɗaa:
–¡Beabidua! ¡Beabidua! ¡Cruɗe cachi beabidua!–
Maʉ̃ carea Pilatoba jarasia:
–¿Mãwãra mʉ̃a bãrã Boroda cruɗe cachi beabica?–
Maʉ̃ne sacerdote bororãba panusiɗaa:
–¡Dairãba dewara borora neẽ́ panʉa! ¡Aɓabe romanorã borodrʉ dairã boroa!–*
16 Maʉ̃be Pilatoba Jesura romano sordaorãa diasia cruɗe cachi beaɗamãrẽã. Ara maʉ̃da idjira edesiɗaa.
Jesu cruɗe cachipeɗaɗa
Mateo 27:32-44; Marco 15:21-32; Luca 23:26-43
17 Jesuba idji cruda ataupeɗa sordaorãba idjira edesiɗaa ẽjũã Boro Ɓʉwʉrʉ abadamaa. Hebreo beɗeaɗe Golgota abadaa.*
18 Mama ãdjirãba Jesura cruɗe cachisiɗaa. Idjaɓa idji caita ẽberãda umé cruɗe cachisiɗaa, aɓa Jesu jʉwa araare, aɓa jʉwa acʉare.
19 Maʉ̃ awara Pilatoba beɗea ɓʉɗada Jesu boro nocoare jira ɓʉbisia. Nãwã ɓʉsia: “Jesu Nazareɗebema, judiorã Boro.”
20 Maʉ̃ beɗeara ɓʉsia hebreo beɗeaɗe, latiʉ̃ beɗeaɗe, idjaɓa griegoɗe biɗa.* Zocãrã judiorãba maʉ̃ beɗeara unusiɗaa, Jesu cruɗe cachipeɗaɗara puru caita ɓʉ bẽrã.
21 Judiorã sacerdote bororãba maʉ̃ beɗea unusiɗaɗe Pilatoa jarasiɗaa:
–Ɓʉrãdua “Judiorã Boro.” Ãtebʉrʉ ɓʉdua: “Naʉ̃ ẽberãba jarasia idjira judiorã boroda.”–
22 Baribʉrʉ Pilatoba jarasia:
–Mʉ̃a ɓʉɗara ara mãwã ɓeya.–
23 Romano sordaorãba Jesu cruɗe cachipeɗaɗacarea idjia cacuaɗe jʉ̃ ɓaɗada edaɗapeɗa dji ʉ̃rʉ̃bemara quĩmãrẽ cõãnapeɗa ãdjiza edasiɗaa.* Idjia dewara jʉ̃ ɓaɗa siɗa edasiɗaa. Maʉ̃gʉra quĩrã tẽũ cajuɗa neẽ́ ɓasia, ãtebʉrʉ ʉ̃tʉba eɗa caɗa basía.
24 Maʉ̃ne sordaorãba ãdjiduɓa jarasiɗaa:
–Naʉ̃gʉra cõãnaẽ́a. Biara ɓʉa naʉ̃ carea ne jemenenida caiba edai cawaya.–
Maʉ̃gʉra mãwãsia Ãcõrẽ Beɗeaɗe naẽnaena ɓʉɗa quĩrãca: “Mʉ̃a cacuaɗe jʉ̃ ɓaɗara ãdjiza jeɗecasiɗaa; mʉ̃a jʉ̃ ɓaɗa edaɗi carea jemenesiɗaa.”* Wãrãda sordaorãba mãwã osiɗaa.
25 Jesu cruɗe jira ɓʉ caita Jesu papada, dji papa djabawẽrãda, Cleopa quima Mariada, Maria Magdalena siɗa panasiɗaa.
26 Jesuba idji papa unusiɗe idjaɓa unusia idji ume nĩbabari “idjia bio quĩrĩã ɓʉ” abadada. Idjira arima nũmasia. Maʉ̃ne Jesuba idji papaa jarasia:
–Papa, za ɓʉda bʉ warraa.–
27 Maʉ̃be idji ume nĩbabaría jarasia:
–Za ɓʉda bʉ papaa.–
Maʉ̃ ewariɗeba ʉ̃taa Jesu papara Jesu ume nĩbabari deɗe ɓabadjia.
Jesu cruɗe beuɗa
Mateo 27:45-56; Marco 15:33-41; Luca 23:44-49
28 Mãwã jaraɗacarea Jesuba cawasia jũma idjia oida ɓaɗara osida. Maʉ̃ne jarasia:
–Mʉ̃ra opichia nũmʉa.–
Maʉ̃gʉra jarasia Ãcõrẽ Beɗeaɗe jara ɓʉ quĩrãca.*
29 Maʉ̃ne arima zocoda uva ɓa oregueaba bira nũmasia. Ʉ̃cʉrʉba maʉ̃ uva ɓa oregueaba mõda quiruda ɓeguea edasiɗaa. Mõda quirura hisopo bacuru jʉwateɗe jʉ̃napeɗa Jesu iteɗe tẽũ nũmʉsiɗaa.
30 Jesuba maʉ̃ uva ɓa oregueara dopeɗa jarasia:
–Mʉ̃a oida ɓaɗara jũma osia.–
Maʉ̃be idji boro eɗaa jaɓaripeɗa jaiɗasia.
Jesu orroɗe mĩãsuba suɗa
31 Judiorã Egiptoɗeba ẽdrʉpeɗaɗa quĩrãnebabada ewarira nurẽma bẽrã ne o panasiɗaa. Maʉ̃ ewari dromara ʉ̃nãũbada ewari bẽrã ãdjirãba quĩrĩãẽ́ panasiɗaa ẽberãra cruɗe jira ɓeaɗida. Maʉ̃ bẽrã Pilatoa jarasiɗaa cruɗe cachi ɓeara jĩrũ ɓʉapetacuabimãrẽã isabe beuɗapeɗa ãdji cacuara mamabemada ãyã ɓʉɗamãrẽã.
32 Maʉ̃ carea sordaorãra wãnapeɗa Jesu ume cruɗe cachi panʉra aɓa naãrã jĩrũ ɓʉapetasiɗaa. Ara maʉ̃ quĩrãca dewarabema ẽberã jĩrũ siɗa ɓʉapetasiɗaa.
33 Baribʉrʉ Jesuma jũẽsiɗaɗe unusiɗaa idjira beuɗoasida. Maʉ̃ bẽrã idji jĩrũra ɓʉapetaɗaẽ́ basía.
34 Mãwã ɓʉɗe sordaoba Jesu orroɗe mĩãsuba susia wãrãda beusi cawaya. Ara maʉ̃da oara, ɓa siɗa erozoasia.
35 Naʉ̃ carta ɓʉɗaba wãrãda maʉ̃ra unusia. Idjia jara ɓʉra wãrãa.* Idjia cawa ɓʉa wãrã beɗeada jara ɓʉda bãrã biɗa soɗeba ĩjãnamãrẽã.
36 Jũma maʉ̃gʉra wãrãda mãwãsia Ãcõrẽ Beɗeaɗe ɓʉ́ ɓʉ quĩrãca. Nãwã ɓʉ́ ɓʉa: “Idji ɓʉwʉrʉra ni aɓa biɗa ɓʉaɗaẽ́a.”*
37 Idjaɓa Ãcõrẽ Beɗeaɗe naʉ̃ siɗa ɓʉ́ ɓʉa: “Ãdjia supeɗaɗara acʉɗia.”*
Jesu tʉɓaripeɗaɗa
Mateo 27:57-61; Marco 15:42-47; Luca 23:50-56
38 Jũma mãwãnacarea judio Jose abadada Pilatomaa wãsia. Maʉ̃ Josera Arimateaɗebema basía. Idjira Jesu ume nĩbabari basía, baribʉrʉ ni aɓaʉa jaraca basía dewara judiorãda waya ɓʉ bẽrã. Idjia Jesu cacuara Pilatoa iwiɗisia tʉɓariɗe edei carea. Maʉ̃ bẽrã Pilatoba idu edebisia. Ara maʉ̃da Joseba Jesu cacuara edaɗe wãpeɗa tʉɓariɗe edesia.
39 Maʉ̃ awara Nicodemo,* naẽna Jesuma diamasi beɗeaɗe ze ɓaɗaba pora mirra quera áloe ume pueraɗada enesia. Maʉ̃ zʉgʉara 34 kilo ɓasica ɓʉa.*
40 Ãdjia Jesu cacua edaɗapeɗa maʉ̃ pora mirra quera áloe ume pueraɗada wua torroɗe posiɗaa. Poɗapeɗa idji cacuara maʉ̃ wua torroba bʉrá ɓʉsiɗaa judiorãba tʉɓariɗi naẽna obada quĩrãca.
41 Jesu cruɗe cachipeɗaɗa caita néuda ɓasia. Maʉ̃ néuɗe beuɗa tʉɓaribada uriada ɓasia mõjẽ coroɗa djiwiɗida. Mama beuɗara waɗibiɗa ɓʉɗaca basía.
42 Maʉ̃ uriara caita ɓʉ bẽrã idjaɓa judiorã ʉ̃nãũbada ewarira jũẽboɗo bẽrã Jesura mama tʉɓarisiɗaa.
Beɗea eɗaare
^ 19:5. Pilatoba Jesura dajadaa enesiɗe acʉbi quĩrĩã ɓasica ɓʉa Jesura ẽberã minijĩchiaẽ́da. Baribʉrʉ Juaʉ̃ba “ẽberã” ɓʉbʉrʉɗe jara ɓʉca ɓʉa Jesura Naʉ̃ Djara Edaɗada. Acʉdua Juaʉ̃ 1:1; 1:14.
^ 19:7. Levitico 24:15-16.
^ 19:15. Ãcõrẽ Beɗeaɗe jara ɓʉa israelerã boro arara aɓa Ãcõrẽda mãwã ɓʉda. Acʉdua Juece 8:23; 1 Samuel 8:7.
^ 19:17. Hebreo. Iɗi ewariɗe maʉ̃ beɗeara arameo trʉ̃ jarabadaa.
^ 19:20. Latiʉ̃ beɗeara romanorãba beɗeabadjiɗaa. Hebreo beɗeara judiorãba beɗeabadjiɗaa. Griego beɗeara berara jũma druazabemaba maãrĩ cawa ɓeasia. Griegoɗe beɗeabadjiɗaa druaza ne nẽdobueɗi carea.
^ 19:23. Romano sordaorãba Jesu cruɗe cachipeɗaɗacarea idjia cacuaɗe jʉ̃ ɓaɗada edaɗapeɗa dji ʉ̃rʉ̃bemara quĩmãrẽ cõãnapeɗa ãdjiza edasiɗaa. Maʉ̃ beɗeara idjaɓa nãwã traducida ɓʉa: “Jesu cruɗe cachipeɗaɗacarea romano sordaorã quĩmãrẽ panʉba idjia jʉ̃ ɓaɗara ãdjiza aɓarica edasiɗaa.”
^ 19:24. Salmo 22:18.
^ 19:28. Salmo 22:15; 69:21.
^ 19:35. Juaʉ̃ba jara ɓʉa Jesura beuɗa bẽrã wãrãda ẽberã basida. Juaʉ̃ drõã ɓasiɗe ʉ̃cʉrʉba jarabadjiɗaa Jesura ẽberã quĩrãca ɓasida baribʉrʉ naʉ̃ djarada edaẽ́ basida.
^ 19:36. Exodo 12:46; Numero 9:12; Salmo 34:20.
^ 19:37. Zacaria 12:10.
^ 19:39. Juaʉ̃ 3:1-15.
^ 19:39. 34 kilo. Griego beɗeaɗe ɓʉ́ ɓʉa dji zʉgʉara cien litrada. Maʉ̃ba jara ɓʉa 75 libra. Mirrara, áloe siɗa bacuru tũãpa panʉa. Dji querara pora basía.
