Juaʉ̃ 2:1-25
2 Ewari ũbea baɗacarea ẽberãda dji edasiɗaa Caná puruɗe Galilea druaɗe. Maʉ̃ carea ɓʉsriɗa ewarida o panasiɗaa. Jesu papada mama ɓasia.
2 Jesura, idji ume nĩbabadarã siɗa maʉ̃ quima edabʉrʉ ɓʉsriɗa o panʉmaa jarasiɗaa wãnamãrẽã.
3 Mãwã panʉne uva ɓara jõna bẽrã dji papaba Jesua jarasia:
–Uva ɓara jõsia.–
4 Maʉ̃ne Jesuba jarasia:
–Papa, ¿cãrẽ cãrẽã bʉa mʉ̃́a maʉ̃gʉra jara ɓʉ? Mʉ̃ ewarira waɗi jũẽẽ́ ɓʉa.–*
5 Baribʉrʉ Jesu papaba dji jeɗe panʉ́a jarasia:
–Idjia jarabʉrʉra jũma oɗadua.–
6 Maʉ̃ne sei zoco waiɓʉa mõgara oɗada arima panasiɗaa. Judiorãba maʉ̃ zocoɗeba baidoda juebadjiɗaa ne sʉgʉɗapeɗa Ãcõrẽ quĩrãpita bia ɓeaɗi carea. Zocoza veinte wa treinta galoʉ̃ poya ɓeasia.*
7 Maʉ̃ne Jesuba uva ɓa jeɗe panʉ́a jarasia:
–Za ɓea zocoda baidoba biraɗadua.–
Ara maʉ̃da bira tʉ nũmʉsiɗaa.
8 Maʉ̃be Jesuba jarasia:
–Jãʉ̃be maãrĩ jueɗapeɗa uva ɓa jeɗe panʉ boromaa edeɗadua.–
Ara maʉ̃da mãwã osiɗaa.
9 Maʉ̃be uva ɓa jeɗe panʉ boroba maʉ̃ baido baɗada do zasia. Wãrãda uva ɓada dosia, baribʉrʉ idjia adua ɓasia sãma juesiɗada. Aɓabe dji jeɗe panʉbʉrʉ cawa panasiɗaa. Uva ɓa jeɗe panʉ boroba dji umaquĩrã quima edaya ɓʉda trʉ̃peɗa jarasia:
11 Maʉ̃ ne ununaca naãrã oɗara Jesuba Caná puruɗe Galilea druaɗe osia. Maʉ̃gʉɗeba idjira dji Dromada unubisia. Mãwã idji ume nĩbabadarãba idjira wãrãda ĩjãsiɗaa.
12 Mãwãnacarea Jesura Capernauʉ̃ puruɗaa wãsia. Idji papada, idji djabarãda, idji ume nĩbabadarã siɗa idji ume ãbaa wãsiɗaa. Mama dãrã pananaẽ́ basía.
Jesuba ne nẽdobuebadarã ãyã jʉrecuaɗa
Mateo 21:12-13; Marco 11:15-18; Luca 19:45-46
13 Judiorã Egiptoɗeba ẽdrʉpeɗaɗa quĩrãnebabada ewarida caita ɓasia.* Maʉ̃ bẽrã Jesura Jerusaleʉ̃naa wãsia.
14 Mama Ãcõrẽ de droma dajada unusia Ãcõrẽa babue diaɗi careabemada nẽdobue panʉda. Pacada, ovejada, puchirã siɗa nẽdobue panasiɗaa. Idjaɓa ʉ̃cʉrʉba Ãcõrẽ de dromane diaida ɓʉ paratara dji drua ãĩba zebʉdarãa nẽbʉa nẽdobuebadjiɗaa ãĩbema paratara diacara panana bẽrã.
15 Maʉ̃ carea Jesuba jʉ̃carada soa quĩrãca osia. Maʉ̃ba Ãcõrẽ de dajada duanʉra, ãdji ovejada, ãdji paca siɗa jũma ãyã jʉretacuasia. Dji parata nẽdobuebada mesa coretacuabʉrʉɗe ãdji paratara egode cua dogosia.
16 Mãwã obʉrʉɗe idjia puchirã nẽdobuebadarãa jarasia:
–Jũma naʉ̃gʉra ãyã edeɗadua. Mʉ̃ Zeza dera ne nẽdobuebada deda orãnadua.–
17 Maʉ̃ne idji ume nĩbabadarãba quĩrãnebasiɗaa Ãcõrẽ Beɗeaɗe nãwã ɓʉ́ ɓʉda: “Bʉ de dromara mʉ̃a bio quĩrĩã ɓʉ bẽrã mʉ̃ra beuya.”*
18 Mãwã ɓʉɗe judiorã dji dromarãda arima panasiɗaa. Maʉ̃gʉrãba Jesua jarasiɗaa:
–Dairãa unubidua Ãcõrẽba bʉ́a jãwã obi ɓʉda.–
19 Jesuba panusia:
–Naʉ̃ de dromada ãrĩnibʉrʉ, mʉ̃a ewari ũbeaɗe wayacusa oya.–
20 Maʉ̃ne judiorã dji dromarãba jarasiɗaa:
–Naʉ̃ Ãcõrẽ de dromara 46 poa edesia jũma pãrãni carea.* Maʉ̃da bʉa ¿sãwã ewari ũbeaɗe jũma oyaɗa a ɓʉ?–
21 Jesuba naʉ̃ de dromaana asiɗe ara idjiɗebemada beɗea ɓasia.
22 Idji ʉ̃rẽbaɗacarea idji ume nĩbabadarãba quĩrãnebasiɗaa idjia mãwã jaraɗada. Maʉ̃be ãdjirãba Ãcõrẽ Beɗeaɗe ɓʉ́ ɓʉra, Jesuba jaraɗa siɗa wãrãda ĩjãsiɗaa.
Jesuba ẽberãrã sãwã ɓea cawaɗa
23 Judiorã Egiptoɗeba ẽdrʉpeɗaɗa quĩrãnebabada ewariɗe Jesura Jerusaleʉ̃ne ɓasia. Maʉ̃ne zocãrã ne ununacada osia. Maʉ̃ carea zocãrãba idjira ĩjãsiɗaa.
24 Baribʉrʉ Jesuba jũmarã crĩchada cawa ɓʉ bẽrã ĩjãẽ́ basía ãdjia wãrãda ĩjã panʉda.
25 Jũmarã soda cawa ɓʉ bẽrã ni aɓaʉba idjía ẽberãrã sãwã ɓeada jaraɗiẽ́ panasiɗaa.
Beɗea eɗaare
^ 2:4. Mʉ̃ ewari. Ʉ̃cʉrʉmaarã Jesuba jara ɓasia idji beaɗiɗebemada. Dewararãmaarã Jesuba jara ɓasia idjira Ãcõrẽba diai jaraɗa ebuɗa cawabi ewariɗebemada. Idjaɓa ʉ̃cʉrʉmaarã jara ɓʉa Jesuba uva ɓa diaiɗebemada wa idjia ne ununaca oi ewariɗebemada.
^ 2:6. Veinte wa treinta galoʉ̃. Ʉ̃cʉrʉ traduccioʉ̃ne ɓʉsiɗaa ochenta wa cien litro. Griego beɗeaɗe ɓʉ́ ɓʉa “metreta umé wa ũbea.”
^ 2:13. Exodo 12:1-27.
^ 2:17. Salmo 69:9. Griego beɗeaɗe ɓʉ́ ɓʉa: “Bʉ de dromara mʉ̃a bio quĩrĩã ɓʉ bẽrã mʉ̃ra babueya.”
^ 2:20. Ãcõrẽ de droma pãrãnada cuarenta y sei poa edesia baribʉrʉ waiɓʉara o panana bẽrã pãrãnaca basía.
