Juaʉ̃ 20:1-31
20 Nabema ewari domianebemane Maria Magdalenara diapeɗeɗa waɗi pãĩmaena Jesu tʉɓaripeɗaɗamaa wãsia. Jũẽbʉrʉɗe unusia mõgara waiɓʉa uria jũãtrʉ ɓaɗara orrocawa coɓʉda.
2 Maʉ̃ carea pira wãsia Simoʉ̃ Pedromaa. Jesu ume nĩbabari “Jesuba bio quĩrĩã ɓʉ” abadara mama ɓasia. Jũẽpeɗa jarasia:
–Dadjirã Borora idji tʉɓaripeɗaɗamaʉba ãyã edesiɗaa. Daiba adua panʉa sãmaa edesiɗada.–
3 Maʉ̃be Jesu ume nĩbapeɗaɗarã Pedroda idjaɓa dewarada Jesu tʉɓaripeɗaɗamaa wãsiɗaa.
4 Umena pira wãsiɗaa, baribʉrʉ dewarabemara Pedro cãyãbara isabeara pira wãna bẽrã Jesu tʉɓaripeɗaɗama naãrã jũẽsia.
5 Jũẽpeɗa eɗa acʉi carea eɗaa ɓarrusia. Maʉ̃ne wua Jesu cacua bʉrá ɓaɗara arima taɓʉda unusia, baribʉrʉ eɗaa wãẽ́ basía.
6 Simoʉ̃ Pedrora idji jĩrũare jũẽpeɗa uriaɗe eɗa wãsia. Idjia biɗa unusia Jesu cacua bʉrá ɓaɗa wuara arima taɓʉda.
7 Maʉ̃ awara unusia wua Jesu boro ãnẽɓari ɓaɗada. Baribʉrʉ maʉ̃gʉra dewarabema wua ume ãbaa ɓaẽ́ basía, ãtebʉrʉ jĩga ɓeɗá coɓasia.
8 Maʉ̃be naãrã jũẽna siɗa eɗaa wãsia. Wua mãwã taɓʉra unusiɗe wãrãda ĩjãsia Jesura ʉ̃rẽbasida.
9 Baribʉrʉ ãdjia waɗibiɗa bio cawaɗaẽ́ panasiɗaa Ãcõrẽ Beɗeaɗe Jesu ʉ̃rẽbaida ɓʉɗebemada ɓʉ́ ɓʉda.*
10 Maʉ̃be Jesu ume nĩbapeɗaɗarãra ãdji pananamaa jẽda wãsiɗaa.
Jesuba Maria Magdalenaa ara idjida unubiɗa
Marco 16:9-11
11 Maʉ̃misa Mariara uria icawa jĩã ɓasia. Mãwã jĩã ɓʉba eɗaa ɓarrusia eɗa acʉi carea.
12 Maʉ̃ne bajãnebema nezocarã cacuaɗe jʉ̃bada torroa jʉ̃ panʉda umé eɗa unusia. Aɓa Jesu ɓaɗa boro nocoare chũmasia. Dewarabemada idji jĩrũ ɓaɗaare chũmasia.
13 Ãdjia iwiɗisiɗaa:
–Wẽrã, ¿cãrẽ cãrẽã jĩã ɓʉ?–
Maʉ̃ne idjia panusia:
–Mʉ̃ Boro Jesuda edesiɗaa. Mʉ̃a adua ɓʉa sãmaa edesiɗada.–
14 Ara mãwã jarabʉrʉɗe Mariara ãyã pʉrʉwasia. Maʉ̃ne Jesuda unusia baribʉrʉ cawaẽ́ basía Jesuda mãwã ɓʉda.
15 Jesuba idjía iwiɗisia:
–Wẽrã, ¿cãrẽ cãrẽã jĩã ɓʉ? ¿Caida jʉrʉ ɓʉ?–
Mariaba crĩchasia néu wagabarida mãwã ɓʉda. Maʉ̃ bẽrã jarasia:
–Bʉa Jesu cacuada ãyã edesibʉrʉ, mʉ̃́a jaradua sãma ɓʉsida mʉ̃a ãyã tʉɓariɗe edei carea.–
16 Maʉ̃ne Jesuba trʉ̃ jarasia:
–¡Maria!–
Mariaba araa acʉpeɗa –¡Raboni!– asia. (Maʉ̃ra hebreo beɗeaɗe jara ɓʉa “Jaradiabari.”)
17 Jesuba jarasia:
–Mʉ̃ra bʉrʉrãdua mʉ̃ Zezamaa waɗi wãẽ́ ɓʉ bẽrã. Jãʉ̃be mʉ̃ djabarãmaa wãpeɗa jaradua mʉ̃ Zezamaa wãbʉrʉda. Idjira bãrã Zezaa. Mʉ̃ Ãcõrẽa idjaɓa bãrã Ãcõrẽa.–
18 Ara maʉ̃da Maria Magdalenara Jesu ume nĩbabadarãmaa wãpeɗa jarasia:
–Mʉ̃a dadjirã Boroda unusia.–
Maʉ̃ awara Jesuba jaraɗara jũma nẽbʉrʉsia.
Jesuba edaɗarãa ara idjida unubiɗa
Mateo 28:16-20; Marco 16:14-18; Luca 24:36-49
19 Maʉ̃gʉ ewarira nabema ewari domianebema basía. Queuɗacarea Jesu ume nĩbabadarãra deɗe eɗa ãbaa dji jʉre panasiɗaa. Dewararã judiorãda waya panʉ bẽrã dji eɗa wãbadara bio jũãtrʉ nũmʉsiɗaa. Maʉ̃ne Jesura cawaẽ́ne eɗa odjasia. Ãdjirã ẽsi nũmepeɗa jarasia:
–¡Mẽrã! ¡Necai duananadua!–*
20 Maʉ̃ jarapeɗa idji jʉwada, idji orro siɗa ãdjirãa acʉbisia. Dadjirã Boro unubʉda carea ɓʉsriɗasiɗaa.
21 Maʉ̃be Jesuba wayacusa ãdjirãa jarasia:
–Necai duananadua. Mʉ̃ Zezaba mʉ̃ naʉ̃ ẽjũãnaa diabueɗa quĩrãca mʉ̃a bãrãda puru ɓeaza diabueya.–
22 Mãwã jarapeɗa ãdjirãmaa jãrãpuasia.* Jãrãpuapeɗa jarasia:
–Ãcõrẽ Jaurera edaɗadua.*
23 Ẽberãba cadjirua oɗada bãrãba Ãcõrẽ Jaureɗeba quĩrãdoaɗibʉrʉ, maʉ̃ba jara ɓʉa Ãcõrẽba maʉ̃ cadjiruara quĩrãdoasida. Idjaɓa ẽberãba cadjirua oɗada bãrãba Ãcõrẽ Jaureɗeba quĩrãdoaɗaẽ́bʉrʉ maʉ̃ba jara ɓʉa Ãcõrẽba maʉ̃ cadjiruara quĩrãdoaẽ́ ɓʉda.–
Jesuba Tomáa ara idjida unubiɗa
24 Tomára Jesuba edaɗa doce panʉnebema basía. Idji ĩyãgaɗa trʉ̃ra Mĩguiso abadjiɗaa.* Jesu odjasiɗe idjira waabemarã ume ɓaẽ́ basía.
25 Maʉ̃ bẽrã idjía jarasiɗaa:
–Dairãba dadjirã Borora unusiɗaa.–
Baribʉrʉ Tomába jarasia:
–Mʉ̃dji dauba idji jʉwa clavoba cachipeɗaɗada unuẽ́bʉrʉ, idjaɓa mʉ̃ jʉwa jĩwĩnĩda dji clavo cachi ɓaɗaɗe berajuẽ́bʉrʉ, idjaɓa mʉ̃ jʉwada idji orroɗe berajuẽ́bʉrʉ, idji ʉ̃rẽbaɗara mʉ̃a ĩjãẽ́a.–
26 Ocho ewari baɗacarea Jesu ume nĩbabadarãra wayacusa deɗe eɗa ãbaa dji jʉre duanasia. Maʉ̃ne Tomá siɗa ɓasia. Mãwã panʉne dji eɗa wãbadara bio jũãtrʉ nũmʉmĩna Jesura cawaẽ́ne odjasia. Ãdjirã ẽsi nũmepeɗa Jesuba jarasia:
–¡Mẽrã! ¡Necai duananadua!–
27 Mãwã jarapeɗa Tomáa jarasia:
–Bʉ jʉwa jĩwĩnĩra nama berajudua, mʉ̃ jʉwaza acʉdua, idjaɓa bʉ jʉwara mʉ̃ orroɗe berajudua. Waa ĩjãẽ́ ɓarãdua, ãtebʉrʉ ĩjãdua mʉ̃ra wãrãda ʉ̃rẽbasida.–
28 Maʉ̃ne Tomába jarasia:
–¡Mʉ̃ Boro! ¡Mʉ̃ Ãcõrẽ!–
29 Mãwã ɓʉɗe Jesuba idjía jarasia:
–Bʉa mʉ̃ra unubʉrʉ bẽrã ĩjãbʉrʉa. ¡Baribʉrʉ ẽberãrãba mʉ̃ra ununaẽ́mĩna ĩjãnibʉrʉ, bio bia ɓeaɗia!–
Naʉ̃ carta ¿cãrẽ cãrẽã ɓʉsi?
30 Jesuba dewara ne ununacada idji ume nĩbabadarã quĩrãpita zocãrã osia, baribʉrʉ jũma maʉ̃gʉra naʉ̃ cartaɗe ɓʉẽ́a.
31 Baribʉrʉ jũma naʉ̃gʉra ɓʉsia bãrãba Jesura Ãcõrẽba ẽdrʉ edabari diai jaraɗada, Ãcõrẽ Warrada ĩjãnamãrẽã. Mãwã ĩjãnibʉrʉ idjiɗeba zocai ɓai arada eroɓeaɗia.
Beɗea eɗaare
^ 20:9. Ãcõrẽ Beɗeaɗe ɓʉ ɓʉda. Ʉ̃cʉrʉmaarã Juaʉ̃ba jara ɓʉa Salmo 16:8-11; Isaía 53:11-12; Osea 6:1-2; Joná 1:17; Levitico 23:11. Baribʉrʉ dewararãmaarã Juaʉ̃ba jara ɓʉa jũma Antiguo Testamentoda.
^ 20:19. ¡Necai duananadua! Judiorãba mãwã saludabadaa.
^ 20:22. Genesi 2:7; Ezequiel 37:1-14.
^ 20:22. Ãcõrẽ Jaure edapeɗaɗaɗebemada acʉdua Hecho 1:4-8; 2:1-4.
^ 20:24. Mĩguiso. Griego beɗeaɗe Dídimo ɓʉ́ ɓʉa.
