Juaʉ̃ 21:1-25
21 Mãwãnacarea Jesuba ara idjida wayacusa idji ume nĩbabadarãa unubisia Tiberia amene droma icawa.* Nãwã basía:
2 maʉ̃ ewariɗe ãbaa panasiɗaa Simoʉ̃ Pedroda, Tomá idji ĩyãgaɗa trʉ̃ra “Mĩguiso” abadada, Natanael Galileaɗe ɓʉ puru Canánebemada, Zebedeo warrarãda, idjaɓa dewararãda umé.
3 Mãwã panʉne Simoʉ̃ Pedroba jarasia:
–Mʉ̃ra ɓeda beaɗe wãya.–
Maʉ̃ne ãdjirãba jarasiɗaa:
–Dairã siɗa bʉ ume wãnia.–
Ara maʉ̃da jãbaɗe ɓadoɗapeɗa wãsiɗaa. Mãwãmĩna maʉ̃ diamasi ɓedara jidaɗaẽ́ basía.
4 Diapeɗeɗa Jesuda ĩbʉɗe nũmasia baribʉrʉ ãdjia unusiɗamĩna adua panasiɗaa Jesuda mãwã ɓʉda.
5 Mãwã ɓʉɗe Jesuba ãdjirãa jĩgua iwiɗisia:
–Warrarã, ¿ɓedara jidasiɗaca?–
Ãdjia panusiɗaa:
–Jidaɗaẽ́ basía.–
6 Jesuba jarasia:
–Mãẽteara jʉwa araare ɓaribueɗadua. Maʉ̃ne jidaɗia.–
Ara maʉ̃da idjia jaraɗaare ɓaribuesiɗaa. Maʉ̃ne ãtarrayara poya erreɓariɗaẽ́ basía ɓedara zocãrã jidapeɗaɗa bẽrã.
7 Mama ɓasia Jesu ume nĩbabari “Jesuba bio quĩrĩã ɓʉ” abadada. Maʉ̃gʉba Pedroa jarasia:
–¡Jãʉ̃gʉra dadjirã Boroa!–
Simoʉ̃ Pedrora cacua egoɗa ɓasia. Maʉ̃ ẽberãra dadjirã Boroda ũrĩsiɗe ara maʉ̃da idjia cacuaɗe jʉ̃barira jʉ̃peɗa daiɗu tẽũ dogosia.
8 Baribʉrʉ waabemarãra doya ariɗe panʉ bẽrã ãtarrayara ɓedaba bira ɓʉda jãbaɗeba ĩbʉɗaa erreɓari edesiɗaa. Doya jũẽni carea dji tʉmʉara cien metro ɓasica ɓʉa.
9 Drua ɓadocuasiɗaɗe tʉbʉda urua ɓʉda unusiɗaa. Ɓeda bá ɓʉda idjaɓa paʉ̃ ãbuɗa siɗa unusiɗaa.
10 Jesuba jarasia:
–Bãrãba ɓeda jidapeɗaɗada ʉ̃cʉrʉ enenadua.–
11 Ara maʉ̃da Simoʉ̃ Pedrora jãbaɗaa wãpeɗa ãtarrayara ĩbʉɗaa erreɓari enesia. Ãtarrayara ɓeda waiɓʉa ɓeaba bira ɓasia. 153 juachasiɗaa. Baribʉrʉ zocãrã jidasiɗamĩna dji ãtarrayara cõãẽ́ basía.
12 Maʉ̃be Jesuba jarasia:
–Ne coɗe zeɗadua.–
Maʉ̃ne ãdjirãba wayasiɗaa idjira caida iwiɗiɗi carea. Cawasiɗaa idjira dadjirã Boroda.
13 Mãwã panʉne Jesuba paʉ̃ra edapeɗa ãdjirãa diasia. Ɓeda siɗa diasia.
14 Maʉ̃ba ɓarima ũbea babʉrʉ basía Jesu ʉ̃rẽbaɗacarea ara idjida idji ume nĩbabadarãa unubibʉrʉda.
Jesuba Pedro waya edaɗa
15 Ne copeɗaɗacarea Jesuba Simoʉ̃ Pedroa iwiɗisia:
–Simoʉ̃, Joná warra, ¿bʉa mʉ̃ra biara quĩrĩã ɓʉca za ɓeaba mʉ̃ quĩrĩã panʉ cãyãbara?–*
Pedroba panusia:
–Mãẽ mʉ̃ Boro, bʉa cawa ɓʉa mʉ̃a bʉra quĩrĩã ɓʉda.–
Jesuba jarasia:
–Mʉ̃ ĩjã ɓeara bio waga ɓadua oveja zaquerã wagabari quĩrãca.–
16 Jesuba wayacusa Pedroa iwiɗisia:
–Simoʉ̃, Joná warra, ¿mʉ̃ra quĩrĩã ɓʉca?–
Pedroba panusia:
–Mãẽ mʉ̃ Boro, bʉa cawa ɓʉa mʉ̃a bʉra quĩrĩã ɓʉda.–
Jesuba jarasia:
–Mʉ̃ ĩjã ɓeara bio waga ɓadua oveja zaquerã wagabari quĩrãca.–
17 Jesuba wayacusa iwiɗisia:
–Simoʉ̃, Joná warra, ¿mʉ̃ra quĩrĩã ɓʉca?–
Maʉ̃gʉba ɓarima ũbea iwiɗibʉrʉ basía. Pedrora sopua nũmesia, Jesuba ɓarima ũbea aɓarida iwiɗiɗa bẽrã. Maʉ̃be idjia jarasia:
–Mʉ̃ Boro, bʉa ne jũmada cawa ɓʉa. Bʉa cawa ɓʉa mʉ̃a bʉra quĩrĩã ɓʉda.–
Jesuba jarasia:
–Mʉ̃ ĩjã ɓeara bio waga ɓadua oveja zaquerã wagabari quĩrãca.
18 Wãrã arada jaraya: cũdraeɗa bʉduɓa djiobadjia bʉdji wã quĩrĩãbʉrʉmaa wãi carea. Baribʉrʉ bʉ drõã ɓeɗacarea dewararãba bʉ jʉwara jiraɗapeɗa õgo djioɗia. Maʉ̃be edeɗia bʉ wã quĩrĩãẽ́ ɓʉmaa.–*
19 Maʉ̃ jara ɓʉɗeba Jesuba cawabisia Pedrora sãwã beuida, idji beubʉrʉɗeba ẽberãrãba cawaɗamãrẽã Ãcõrẽra dji dromada. Mãwã jarapeɗa Jesuba Pedroa jarasia:
–¡Mʉ̃ ume nĩbadua!–
Jesu, idjia bio quĩrĩã ɓʉ ume
20 Pedroba jẽda acʉpeɗa Jesu ume nĩbabari “Jesuba bio quĩrĩã ɓʉ” abadara caiɗu zebʉrʉda unusia. Maʉ̃gʉra Jesu caita chũmasia Egiptoɗeba ẽdrʉpeɗaɗa quĩrãnebabada cobada cosiɗaɗe. Idjia iwiɗisia: “Dai Boro, ¿caiba bʉra jidabi?”*
21 Pedroba maʉ̃gʉ ẽberã unupeɗa Jesua iwiɗisia:
–Mʉ̃ Boro, za zebʉrʉra ¿sãwã ɓai?–
22 Jesuba panusia:
–Mʉ̃a quĩrĩã ɓʉbʉrʉ idjira zocai ɓaida aɓa mʉ̃ waya zebʉrʉɗaa ¿bʉa maʉ̃da sãwãi? Mʉ̃a quĩrĩã ɓʉa bʉra mʉ̃ ume nĩbaida.–
23 Mãwã jaraɗa carea zocãrã djabarãba crĩchasiɗaa Jesuba bio quĩrĩã ɓʉ abadara beuẽ́da. Baribʉrʉ Jesuba jaraẽ́ basía idjira beuẽ́da. Ãtebʉrʉ jarasia: “Mʉ̃a quĩrĩã ɓʉbʉrʉ idjira zocai ɓaida aɓa mʉ̃ waya zebʉrʉɗaa, ¿bʉa maʉ̃da sãwãi?”
24 Ara maʉ̃ Jesu ume nĩ ɓaɗaba maʉ̃nebemada jara ɓʉa idjaɓa naʉ̃ cartaɗe nãwã ɓʉbʉrʉa. Dadjirãba cawa panʉa idjia jara ɓʉra wãrãda.
Jesuba maʉ̃ auɗu ne zocãrã oɗa
25 Waɗi baraa Jesuba ocuaɗara. Baribʉrʉ jũma maʉ̃gʉda cartaɗe aɓa aɓa ɓʉbʉdabara, mʉ̃maarã maʉ̃ carta ɓʉcuaɗara naʉ̃ duɗa araẽ́ bacasia.
