Juaʉ̃ 6:1-71
6 Mãwãnacarea Jesura Galilea amene droma wa quĩrãrã wãsia. Maʉ̃ amene dromara idjaɓa Tiberia abadaa.*
2 Jesuba ne ununaca o ɓʉɗeba cacua biẽ́ ɓeara biabicuasia. Zocãrã ẽberãrãba maʉ̃ra unu panana bẽrã idji caiɗu wãsiɗaa.
3 Maʉ̃be Jesura idji ume nĩbabadarã ume eya zaqueɗaa wãnapeɗa egode chũpanesiɗaa.
4 Maʉ̃ ewariɗe judiorã Egiptoɗeba ẽdrʉpeɗaɗa quĩrãnebabada ewarida caita ɓasia.
5 6:5-6 Maʉ̃ne Jesuba unusia ẽberãrã zocãrã idjimaa zebʉdada. Jesuba bio cawa ɓasia cãrẽda oida baribʉrʉ Pelipea iwiɗisia:
–Paʉ̃ra ¿sãma nẽdoɗi jũma naʉ̃gʉrã ẽberãrã ne cobiɗi carea?–
Jesuba mãwã iwiɗisia Pelipeba casa panui cawaya.
6 –
7 Pelipeba panusia:
–Ẽberã dosciento ewari trajaɗa parataba paʉ̃ nẽdobʉda siɗa araẽ́a ãdjirãza maãrĩ cobiɗi carea.–
8 Maʉ̃ne Simoʉ̃ Pedro djaba Andreda ɓasia. Idjira Jesu ume nĩbabari basía. Maʉ̃ Andreba jarasia:
9 –Warra nama ɓʉba cebada oɗa paʉ̃da juesuma eroɓʉa idjaɓa ɓedada umé eroɓʉa. Baribʉrʉ jãcua ẽberãrã zocãrã duanʉ itea maʉ̃da ¿sãwãi?–
10 Mama põãjãrã iɗa ɓasia. Maʉ̃ bẽrã Jesuba jarasia:
–Jũmarãa jaraɗadua põãjãrãne chũpanenamãrẽã.–
Ara maʉ̃da egode chũpanesiɗaa. Ãdjirãra dji umaquĩrã awa mil juesuma panasiɗaca ɓʉa.
11 Jesuba paʉ̃ra jʉwaɗe edapeɗa Ãcõrẽa bia ɓʉaɗa asia. Maʉ̃be idji ume nĩbabadarãa jarasia ẽberãrãa jeɗecaɗamãrẽã. Ɓeda siɗa ara maʉ̃ quĩrãca osia jũmarãba aɗuba coɗamãrẽã.
12 Jũmarãda jãwũã ne copeɗaɗacarea Jesuba idji ume nĩbabadarãa jarasia:
–Dji aɗubaɗara jũma jʉrʉ peɗadua ni maãrĩ biɗa ãrĩrãmãrẽã.–
13 Ara maʉ̃da jʉrʉ pesiɗaa. Doce jamara birasiɗaa maʉ̃ paʉ̃ cebada oɗa juesumanebema aɗubaɗaba.
14 Jesuba mãwã oɗaɗeba cawabisia idjira Ãcõrẽneba ze ɓʉda. Ẽberãrãba maʉ̃ ununapeɗa jarasiɗaa:
–Wãrãda naʉ̃gʉra Ãcõrẽneba beɗeabari dji droma, dji naʉ̃ ẽjũãne zeida ɓaɗaa.–*
15 Baribʉrʉ Jesuba cawasia ẽberãrãba idjira õgo edeɗida ãdjirã boroda ɓʉɗi carea. Maʉ̃ carea wayacusa iduɓa eyaɗe ʉ̃taa wãsia.
Jesu do ʉ̃rʉ̃ nĩbaɗa
Mateo 14:22-27; Marco 6:45-52
16 Queuɗacarea Jesu ume nĩbabadarãra doeɗa amene dromanaa wãsiɗaa.
17 Jãbaɗe ɓadosiɗaɗe Jesura ãdjimaa waɗibiɗa jũẽẽ́ ɓasia. Baribʉrʉ waa quĩrãrã chã wãsiɗaa Capernauʉ̃ne jũẽni carea. Mãwã ɓʉɗe bio pãĩsosoa nũmesia.
18 Maʉ̃ne nãũrãda dji cãbãyã puá nũmʉ bẽrã amene dromara bogozoa nũmesia.
19 Do quẽsidra wãbʉdaɗe unusiɗaa Jesura do ʉ̃rʉ̃ nĩda.* Ãdjimaa zebʉrʉ bẽrã ne wayasiɗaa.
20 Baribʉrʉ Jesuba jarasia:
–Mʉ̃da jãwã ɓʉa. Ne wayarãnadua.–
21 Maʉ̃ne idjira jãbaɗe ɓʉsriɗa edasiɗaa. Ara maʉ̃da ãdji wãbʉdama jũẽsiɗaa.*
Jesura zocai ɓai diabari paʉ̃a
22 Maʉ̃ nurẽma ẽberãrã waa quĩrãrẽ duanenaba quĩrãnebasiɗaa jãbada aɓabe ɓasida. Cawa panasiɗaa maʉ̃ jãbaɗe Jesu ume nĩbabadarãra wãsiɗada. Idjaɓa cawa panasiɗaa Jesura ãdjirã ume wãẽ́ basida.
23 Maʉ̃ne dewara jãbada Tiberia puruɗeba jũẽcuasia Jesuba Ãcõrẽa bia ɓʉaɗa apeɗa ẽberãrãa paʉ̃ cobigaɗama.
24 Mãwã ɓʉɗe ẽberãrãba cawasiɗaa Jesura, idji ume nĩbabadarã siɗa mama panʉẽ́da. Maʉ̃ carea ãdjirãra maʉ̃ jãbaɗe ɓadocuaɗapeɗa Capernauʉ̃naa Jesu jʉrʉɗe wãsiɗaa.
25 Jesu amene droma quĩrãrẽ unusiɗaɗe iwiɗisiɗaa:
–Jaradiabari, bʉra ¿sãʉ̃be nama jũẽsi?–
26 Jesuba panusia:
–Wãrã arada mʉ̃a jaraya: bãrãba cawaɗaẽ́ panʉa mʉ̃a ne ununaca oɗaba cawabi ɓʉda. Mʉ̃ra aɓabe jʉrʉ panʉa jãʉ̃ paʉ̃ copeɗaɗaba jãwũãpeɗaɗa bẽrã.
27 Trajarãnadua paʉ̃ ɓerawabarida edaɗi carea. Ãtebʉrʉ trajaɗadua paʉ̃ Ãcõrẽ ume ewariza zocai ɓai diabarida edaɗi carea. Maʉ̃gʉra mʉ̃, Naʉ̃ Djara Edaɗaba diaya. Dadji Zeza Ãcõrẽba mʉ̃ra maʉ̃ carea ɓʉsia.–
28 Maʉ̃ bẽrã ãdjirãba iwiɗisiɗaa:
–Dairãba ¿cãrẽda oɗida panʉ Ãcõrẽ traju oɗi carea?–
29 Jesuba panusia:
–Ãcõrẽba obi ɓʉ trajura naʉ̃gʉa: mʉ̃, idjia Diabueɗada ĩjãnida panʉa.–
30 6:30-31 Maʉ̃ carea ãdjirãba Jesua iwiɗisiɗaa:
–¿Bʉa dairãa cãrẽda unubi bʉ beɗea ĩjãnamãrẽã? Dadjirã drõã naẽnabemaba ẽjũã põãsa ewaraga ɓʉɗe manáda cosiɗaa. Ãcõrẽ Beɗeaɗe jara ɓʉa: “Idjia bajãnebema paʉ̃da diasia ãdjirãba coɗamãrẽã.”* ¿Bʉa cãrẽda oi?–
32 Maʉ̃ne Jesuba panusia:
–Wãrã arada mʉ̃a jaraya, maʉ̃ bajãnebema paʉ̃ra Moiseba diaẽ́ basía. Mʉ̃ Zezabʉrʉ diasia. Maʉ̃ awara bajãnebema paʉ̃ dji arada ẽberãrãa dia ɓʉa.
33 Maʉ̃ paʉ̃ bajãneba zeɗaba zocai ɓai arada dia ɓʉa.–
34 Ãdjirãba jarasiɗaa:
–Dai Boro, maʉ̃ paʉ̃ra dairãa ewariza dia ɓadua.–
35 Jesuba jarasia:
–Mʉ̃drʉ maʉ̃ paʉ̃a. Mʉ̃abʉrʉ zocai ɓai arada diabaria. Maʉ̃ bẽrã mʉ̃maa zebʉrʉra waa jarra ɓaẽ́a. Mʉ̃ ĩjã ɓʉra waa opichia ɓaẽ́a.
36 Baribʉrʉ mʉ̃a jaraɗa quĩrãca, mʉ̃a ne ununaca oɗada bãrãba unusiɗamĩna ĩjãnaẽ́ panʉa.
37 Mʉ̃ Zezaba mʉ̃́a dia ɓʉ ẽberãrãra mʉ̃ ĩjãne zeɗia. Mʉ̃maa zebʉdara mʉ̃a ãyã jʉretaẽ́a.
38 Mʉ̃ra bajãneba zeẽ́ ɓʉa mʉ̃a quĩrĩã ɓʉda oi carea. Ãtebʉrʉ zesia mʉ̃ Diabueɗaba quĩrĩã ɓʉda oi carea.
39 Mʉ̃ Diabueɗaba quĩrĩã ɓʉa idjia mʉ̃́a diaɗarãra ni aɓa biɗa aduaẽ́da. Quĩrĩã ɓʉa naʉ̃ ewari jõnacarea mʉ̃a jũma ãdjirãra ʉ̃rẽbabida.
40 Mʉ̃ Zezaba wãrãda quĩrĩã ɓʉa ẽberãrãba mʉ̃ra idji Warrada cawaɗapeɗa ĩjãnida idji ume ewariza zocai ɓeaɗamãrẽã. Mãwãbʉrʉ mʉ̃a ãdjirãra naʉ̃ ewari jõnacarea ʉ̃rẽbabiya.–
41 Jesuba jaraɗoasia “bajãneba zeɗa paʉ̃ra mʉ̃́a.” Maʉ̃ carea judiorã arima ɓeaba idjiɗebemada biẽ́ beɗeasiɗaa.
42 Nãwã jarasiɗaa:
–¿Naʉ̃gʉra Jesu, Jose warraẽ́ca? Dji zeza, dji papa siɗa dadjirãba unubadaa. ¿Cãrẽ cãrẽã idjira bajãneba zesiaɗa a ɓʉ?–
43 Mãwã panʉne Jesuba jarasia:
–Waa biẽ́ beɗearãnadua.
44 Ni aɓaʉba poya mʉ̃ra ĩjãẽ́a mʉ̃ Zeza, mʉ̃ Diabueɗaba idjida mʉ̃maa eneẽ́bʉrʉ. Baribʉrʉ mʉ̃ Zezaba eneibʉrʉ naʉ̃ ewari jõnacarea maʉ̃ ẽberãra mʉ̃a ʉ̃rẽbabiya ewariza zocai ɓamãrẽã.
45 Ãcõrẽneba beɗeabadarã cartaɗe nãwã jara ɓʉa: “Ãcõrẽbʉrʉ jũmarãa jaradiaya.”* Mãwã bariduaba mʉ̃ Zeza beɗea ũrĩpeɗa idjiɗeba cawapeɗa mʉ̃ ĩjãne zeya.
46 Maʉ̃gʉba jaraẽ́ ɓʉa aɓaʉba dadji Zezara unusida. Aɓabe mʉ̃abʉrʉ Ãcõrẽra unubaria idjimaʉba zeɗa bẽrã.
47 Wãrã arada mʉ̃a jaraya: ẽberãba mʉ̃da ĩjãibʉrʉ Ãcõrẽ ume ewariza zocai ɓaida eroɓaya.
48 Mʉ̃ra paʉ̃ zocai ɓai araa.
49 Bãrã drõã naẽnabemarãba ẽjũã põãsa ewaraga ɓʉɗe maná co pananara aɓabe djico basía. Co pananamĩna beusiɗaa.
50 Baribʉrʉ bariduaba naʉ̃ paʉ̃ bajãneba zeɗada coibʉrʉ beuẽ́a.
51 Paʉ̃ zocai ɓai arara mʉ̃́a. Bariduaba maʉ̃ paʉ̃da coibʉrʉ ewariza zocai ɓaya. Mʉ̃a dia ɓʉ paʉ̃ra mʉ̃ djaraa. Maʉ̃gʉra mʉ̃a diaya ẽberãrãba zocai ɓai arada eroɓeaɗamãrẽã.–
52 Mãwã ɓʉɗe judiorã ãdjiduɓa quĩrũquĩrũ duanʉba jara duanesiɗaa:
–¿Sãwã idji djarada dadjirãa cobi?–
53 Maʉ̃ne Jesuba jarasia:
–Wãrã arada mʉ̃a jaraya: bãrãba mʉ̃ djarada coɗaẽ́bʉrʉ, mʉ̃ oa siɗa doɗaẽ́bʉrʉ, zocai ɓai arada edaɗaẽ́a.
54 6:54-55 Mʉ̃ djarara cobada dji wãrã araa. Mʉ̃ oara dobada dji wãrã araa. Maʉ̃ bẽrã mʉ̃ djara co ɓʉ, mʉ̃ oa do ɓʉba Ãcõrẽ ume ewariza zocai ɓaira eroɓʉa. Naʉ̃ ewari jõnacarea mʉ̃a maʉ̃ ẽberãra ʉ̃rẽbabiya.
56 Mʉ̃ djara co ɓʉ, mʉ̃ oa do ɓʉra mʉ̃ ume ɓʉa idjaɓa mʉ̃ra idji ume ɓʉa.
57 Mʉ̃ Zeza, mʉ̃ Diabueɗaba zocai ɓaida diai carea eroɓʉa. Mʉ̃ra idjiɗeba zocai ɓʉa. Ara maʉ̃ quĩrãca mʉ̃ djara co ɓʉba mʉ̃neba zocai ɓai arada eroɓʉa.
58 Mʉ̃ra paʉ̃ bajãneba zeɗa dji araa. Bãrã drõã naẽnabemarãba manára cobadjiɗamĩna jũma beusiɗaa. Baribʉrʉ mʉ̃ra maná quĩrãca ɓʉẽ́a. Naʉ̃ paʉ̃ co ɓʉra ewariza zocai ɓaya.–
59 Jesuba jũma maʉ̃gʉra Capernauʉ̃ne jaradiasia judiorã dji jʉrebada deɗe.
Jesu beɗeaɗeba Ãcõrẽ ume ewariza zocai pananinebema
60 Maʉ̃ jaradia ɓʉ ũrĩsiɗaɗe zocãrã Jesu ẽpẽ ɓeaba jarasiɗaa:
–Idjia jaraɗara zarea ɓʉa. ¿Caiba poya ĩjãi?–
61 Jesuba cawasia idjia jaradiaɗa carea ãdjirãra mãwã biẽ́ beɗea panʉda. Maʉ̃ bẽrã jarasia:
–Mʉ̃a jaradiaɗara ¿bãrãmaa zarea ɓʉca?
62 Mãwã baibʉrʉ bãrãba ¿sãwã crĩchaɗi mʉ̃, Naʉ̃ Djara Edaɗara ʉ̃taa naẽna ɓaɗamaa wãbʉrʉda unusiɗara?
63 Ãcõrẽ Jaurebʉrʉ zocai ɓai arara diabaria. Naʉ̃ djaraba diacaa. Mʉ̃a bãrãa jaradia ɓʉra Ãcõrẽ Jaureba zocai ɓai ara dia ɓʉɗebemaa.
64 Baribʉrʉ ʉ̃cʉrʉ bãrãba waɗibiɗa mʉ̃ beɗeara ĩjãnaẽ́ panʉa.–
Jesuba mãwã jarasia idjia naẽnaeɗa cawa ɓaɗa bẽrã cairãba idji beɗeara ĩjãnaẽ́da idjaɓa caibʉrʉ idjira jidabida.
65 Maʉ̃ne Jesuba jarasia:
–Maʉ̃ carea mʉ̃a jarasia: mʉ̃ Zezaba ẽberãda mʉ̃maa eneẽ́bʉrʉ, maʉ̃ ẽberãba poya mʉ̃ra ĩjãẽ́a.–
66 Maʉ̃ carea zocãrã Jesu ẽpẽ pananarãba idjira igarasiɗaa. Waa idji ume nĩbaɗaẽ́ basía.
67 Maʉ̃ bẽrã Jesuba idjia doce edaɗarãa jarasia:
–¿Bãrã siɗa wãbʉrʉɗica?–
68 Simoʉ̃ Pedroba panusia:
–Dai Boro, daida ¿caimaa wãni? Aɓa bʉabʉrʉ dairãa jaradiabaria Ãcõrẽ ume ewariza zocai ɓeaɗamãrẽã.
69 Dairãba bʉ beɗeara wãrãda ĩjã panʉa, idjaɓa dairãba wãrãda cawa panʉa bʉra Ãcõrẽba diabueɗa jipa ɓʉda.–
70 Jesuba jarasia:
–Bãrã doce panʉra mʉ̃a edasia mʉ̃ ume nĩbaɗamãrẽã. Baribʉrʉ bãrãnebemada aɓa diauruɗea.–
71 Jesuba Juda, Simoʉ̃ Iscariote warraɗebemada beɗea ɓasia. Idjia jĩrũare Jesura jidabisia idji ume nĩbabadarã doce panʉnebemamĩna.
Beɗea eɗaare
^ 6:1. Galilea. Maʉ̃ amene dromara Antiguo Testamentoɗe “Quinéret” wa “Cineret” trʉ̃ jarabadjiɗaa. Luca 5:1ɗe jara ɓʉa “Genesare.”
^ 6:14. Deuteronomio 18:15-18.
^ 6:19. Maʉ̃ amene dji jeɗeara die kilómetro ɓʉa. Maʉ̃gʉba jara ɓʉa cinco wa sei kilómetro wi wãbʉda basida.
^ 6:21. Maʉ̃ versículora griego beɗeaɗe idjaɓa jara ɓʉa: “Maʉ̃ne idjira jãbaɗe eda quĩrĩã panʉne ãdji wãbʉdama jũẽsiɗaa.”
^ 6:30-31. Exodo 16:4,15; Salmo 78:24; Nehemia 9:15.
^ 6:45. Isaía 54:13.
