Juaʉ̃ 9:1-41
9 Wãbʉrʉɗe Jesuba unusia ẽberã dauɓerrea topeɗaɗada.
2 Maʉ̃ne Jesu ume nĩbabadarãba iwiɗisiɗaa:
–Jaradiabari, ¿caiba cadjirua oɗaɗeba naʉ̃ ẽberãra jãwã dauɓerrea tosiɗa? ¿Idji djibarirãba cadjirua opeɗaɗaɗeba, wa idjia cadjirua oɗaɗeba?–
3 Jesuba panusia:
–Cadjirua opeɗaɗaɗeba jãwã toɗaẽ́ basía. Idjira dauɓerrea tosiɗaa idjiɗeba Ãcõrẽba ne obʉrʉda jũmarãba ununamãrẽã.
4 Maʉ̃ bẽrã waɗi ãsa ɓʉɗe eɗa mʉ̃ Diabueɗaba obi ɓʉra mʉ̃a oida ɓʉa. Queuɗacarea ni aɓaʉda poya trajaɗacaa.
5 Baribʉrʉ naʉ̃ ẽjũãne ɓʉɗe mʉ̃ra ẽberãrã itea ʉ̃naa quĩrãca ɓʉa ãdjirãba sãwã nĩbaɗida cawaɗamãrẽã.–
6 Mãwã jarapeɗa Jesura egoroɗe iɗotasia. Maʉ̃ba egorora susua osia. Maʉ̃ egoro susuaba dji dauɓerrea ɓʉ dauza pʉrʉsia.
7 Maʉ̃be Jesuba idjía jarasia:
–Cuibada Siloe abadamaa sʉgʉɗe wãdua.– (Maʉ̃ trʉ̃ba jara ɓʉa “diabueɗa.”)*
Ara maʉ̃da dauɓerrea ɓʉra wãpeɗa idji daura sʉgʉpeɗa unu ɓesia. Maʉ̃be diguiɗaa wãsia.
8 Idji de caita ɓeabariba idjaɓa idji dauɓerrea ɓʉ unupeɗaɗaba jara duanasiɗaa:
–¿Naʉ̃gʉẽ́ca oɗe chũmepeɗa ne iwiɗi ɓabadara?–
9 Ʉ̃cʉrʉba idjíaɗa asiɗaa. Dewararãba idji quĩrãca ɓʉmĩna idjiẽ́ana asiɗaa. Baribʉrʉ dji dauɓerrea ɓaɗaba jarasia:
–Wãrãda mʉ̃́a.–
10 Maʉ̃ne idjía iwiɗisiɗaa:
–¿Sãwã bʉa unu ɓesi?–
11 Idjia panusia:
–Ẽberã Jesu abadaba egoroda susua opeɗa mʉ̃ dauza pʉrʉsia. Maʉ̃be idjia jarasia: “Cuibada Siloe abadamaa sʉgʉɗe wãdua.” Wãpeɗa mʉ̃ dau sʉgʉbʉrʉɗe unu ɓesia.–
12 Maʉ̃ne ãdjirãba iwiɗisiɗaa:
–Maʉ̃gʉ ẽberãra ¿sãma ɓʉ?–
Idjia panusia:
–Mʉ̃a adua ɓʉa.–
Pariseorãba dauɓerrea ɓaɗaa bio iwiɗipeɗaɗa
13 9:13-14 Jesuba egoro susua opeɗa dauɓerrea ɓʉ biabiɗa ewarira ʉ̃nãũbada ewari basía. Maʉ̃ carea dauɓerrea ɓaɗara ʉ̃cʉrʉba pariseorãmaa edesiɗaa.
15 Maʉ̃be pariseorã biɗa maʉ̃ ẽberãa iwiɗisiɗaa sãwãbʉrʉ unu ɓesida. Maʉ̃ne idjia jarasia:
–Idjia egoroda susua opeɗa mʉ̃ dauza pʉrʉsia. Maʉ̃be mʉ̃a baidoɗe sʉgʉbʉrʉɗe unu ɓesia.–
16 Ʉ̃cʉrʉ pariseorãba jarasiɗaa:
–Maʉ̃ ẽberãra Ãcõrẽneba zeẽ́ ɓʉa, ʉ̃nãũbada ewarida wayaca bẽrã.–
Baribʉrʉ dewararãba jarasiɗaa:
–¿Sãwã cadjirua obari ẽberãba maʉ̃ ne ununacada poya osi?–
Mãwã wariwaria beɗea duanasiɗaa.
17 Mãwã duananapeɗa wayacusa dji dauɓerrea ɓaɗaa iwiɗisiɗaa:
–Maʉ̃ ẽberã, bʉ dau biabiɗara bʉmaarã ¿caida mãwã ɓʉ?
Dauɓerrea ɓaɗaba panusia:
–Mʉ̃maarã idjira Ãcõrẽneba beɗeabaria.–
18 Judiorã dji bororãba ĩjãnaẽ́ panasiɗaa maʉ̃ ẽberãra naẽna dauɓerrea ɓasida. Maʉ̃ carea idji djibarirãda trʉ̃bisiɗaa.
19 Maʉ̃be ãdjía iwiɗisiɗaa:
–¿Naʉ̃gʉra bãrã warra dauɓerrea topeɗaɗaca? ¿Sãwã iɗira idjia unu ɓʉ?–
20 Ãdjia panusiɗaa:
–Daiba cawa panʉa naʉ̃gʉra dai warra dauɓerrea topeɗaɗada.
21 Baribʉrʉ adua panʉa sãwã iɗira unu ɓesida, idjaɓa adua panʉa caiba idjira biabisida. Idjira drõã bẽrã idjía iwiɗiɗadua.–
22 Idji djibarirãba mãwã jarasiɗaa judiorã bororãra waya panʉ bẽrã. Wãrãda maʉ̃ judiorãba jaraɗoasiɗaa ẽberãrãba Jesura Ãcõrẽba ẽdrʉ edabari diai jaraɗaaɗa acara panʉda. Aɓaʉba mãwã jarasira dji bororãba idjira judiorã dji jʉrebada deɗebemada ãyã jʉretaɗiaɗa asiɗaa.
23 Maʉ̃ carea djibarirãba jarasiɗaa: “Idjira drõã bẽrã idjía iwiɗiɗadua.”
24 Maʉ̃ bẽrã judiorã bororãba dauɓerrea ɓaɗara wayacusa trʉ̃napeɗa jarasiɗaa:
–Ãcõrẽ quĩrãpita daia wãrã beɗeaɗeba jãʉ̃ ẽberãnebemada jaradua.* Dairãba cawa panʉa idjira cadjirua obarida.–
25 Dauɓerrea ɓaɗaba jarasia:
–Mʉ̃a adua ɓʉa idjia cadjirua obarida wa ocada. Aɓabe cawa ɓʉa mʉ̃ra dauɓerrea ɓasida baribʉrʉ iɗira unu ɓʉda.–
26 Maʉ̃ne ãdjirãba wayacusa idjía iwiɗisiɗaa:
–Idjia ¿sãwã osi? ¿Cãrẽda osi bʉ dau biabi carea?–
27 Idjia panusia:
–Mʉ̃a bãrãa jarasia baribʉrʉ ĩjã quĩrĩãnaẽ́ basía. Maʉ̃da ¿cãrẽ cãrẽã wayacusa ũrĩ quĩrĩã panʉ? ¿Bãrã siɗa idji ume nĩba quĩrĩã panʉca?–
28 Maʉ̃ carea ãdjirãba idjira nãwã quẽãsiɗaa:
–Bʉdrʉ jãʉ̃ ẽberã ume nĩa, baribʉrʉ dairãra Moise leyɗeba nĩbabadaa.
29 Dairãba cawa panʉa Ãcõrẽba Moisea beɗeasida,* baribʉrʉ jãʉ̃ ẽberãra sãmabemada adua panʉa.–
30 Maʉ̃ne dauɓerrea ɓaɗaba jarasia:
–¿Sãwãẽrã bãrãba jara panʉ adua panʉda idjira sãmabemada? ¿Idjia mʉ̃ daura biabiẽ́ basica?
31 Dadjirãba cawa panʉa cadjirua obadaba iwiɗibʉdara Ãcõrẽba bia ũrĩcada. Maʉ̃ awara cawa panʉa bariduaba Ãcõrẽda waya ɓʉbʉrʉ idjaɓa idjia quĩrĩã ɓʉda o ɓʉbʉrʉ, maʉ̃gʉba iwiɗibʉrʉra Ãcõrẽba bia ũrĩbarida.*
32 Naãrã eɗaʉba aɓa iɗibema ewariɗaa ¿bãrãba ũrĩbadjiɗaca ẽberã dauɓerrea toɗada biabibʉdada?
33 Naʉ̃ ẽberãda Ãcõrẽneba zeɗaẽ́bara ni cãrẽ siɗa poya oẽ́ bacasia.–
34 Maʉ̃ne pariseorãba idjira quẽãsiɗaa:
–Bʉ topeɗaɗaɗeba ʉ̃taa cadjirua obaria. ¿Sãwã dairãa ne jaradiai?–
Maʉ̃ carea idjira judiorã dji jʉrebada deɗebemada ãyã jʉretasiɗaa.
Dji wãrãda dauɓerrea ɓea
35 Jesuba ũrĩsia dauɓerrea ɓaɗara ãyã jʉretasiɗada. Maʉ̃ carea idjira jʉrʉɗe wãsia. Unupeɗa iwiɗisia:
–¿Bʉa Naʉ̃ Djara Edaɗara wãrãda ĩjã ɓʉca?–*
36 Idjia jarasia:
–Mʉ̃ boro, jaradua idjira caida mʉ̃a wãrãda ĩjãi carea.–
37 Jesuba panusia:
–Bʉa idjira unu ɓʉa. Mʉ̃, bʉ ume beɗea ɓʉda idjía.–
38 Ara maʉ̃da Jesu quĩrãpita chĩrãboroɗe coɓepeɗa jarasia:
–Mʉ̃ Boro, mʉ̃a ĩjã ɓʉa.–
39 Maʉ̃ne Jesuba jarasia:
–Mʉ̃ra naʉ̃ ẽjũãnaa zesia ẽberãrã cawa oi carea. Mãwã dji dauɓerrea ɓea quĩrãca ɓeaba ununia idjaɓa dji unu panʉana a panʉra dauɓerrea ɓea quĩrãca panenia.–
40 Ʉ̃cʉrʉ pariseorã Jesu caita duanʉba maʉ̃ beɗea ũrĩsiɗaɗe iwiɗisiɗaa:
–Bʉa ¿cãrẽ cãrẽã mãwã jara ɓʉ? ¿Dairãra dauɓerrea ɓeaca?–
41 Jesuba panusia:
–Bãrãda wãrãda dauɓerrea ɓeaɗabara, cadjirua obada carea beɗeaɗe pananaẽ́ bacasia. Baribʉrʉ bãrãba unu panʉana a panʉ bẽrã beɗeaɗe panʉa.–
