Pilemoʉ̃ 1:1-25
1 Mʉ̃ra Pauloa. Jesucrito carea preso ɓʉa. Dadji djaba Timoteoda nama ɓʉa. Djaba Pilemoʉ̃, daiba bʉra quĩrĩã panʉa. Bʉa dai quĩrãca Ãcõrẽ trajura o ɓʉ bẽrã mʉ̃a naʉ̃ cartara bʉ itea ɓʉbʉrʉa.
2 Idjaɓa ɓʉbʉrʉa jũma djabarã bʉ deɗe ãbaa dji jʉrebadarã itea, dadji djabawẽrã Apia itea, dadji djaba Arquipo itea biɗa. Arquipoba Ãcõrẽ beɗeara dai careba jaradiabaria.
3 Mʉ̃a quĩrĩã ɓʉa dadjirã Zeza Ãcõrẽba, dadjirã Boro Jesucrito biɗa ãdji biaɗeba bãrãra careba pananida idjaɓa necai ɓai siɗa bãrãa dia pananida.
Djaba Onesimo carea Pauloba beɗea djuburiaɗa
4 Mʉ̃a Ãcõrẽa iwiɗibʉrʉza bʉ carea bia ɓʉaɗa abaria.
5 Mʉ̃a ũrĩsia bʉa dadjirã Boro Jesura bio ĩjã ɓʉda idjaɓa jũma Ãcõrẽ ẽberãrãra quĩrĩã ɓʉda.
6 Mʉ̃a Ãcõrẽa iwiɗi ɓʉa Crito ĩjã ɓea ume bʉra bio bia ɓamãrẽã.* Mãwã jũma ne bia dadjia Jesucritoɗeba eropanʉda bʉa bio cawaya.
7 Djaba, bʉa Ãcõrẽ ẽberãrãra quĩrĩãneba sobiabiɗa bẽrã mʉ̃ siɗa sobiabisia idjaɓa bio ɓʉsriɗabisia.
8 Maʉ̃ carea bʉ́a iwiɗiya mʉ̃a jarabʉrʉ quĩrãca omãrẽã. Critoɗeba mʉ̃a obida ɓʉmĩna obiẽ́a.
9 Ãtebʉrʉ mʉ̃a beɗea djuburiaya quĩrĩãneba mãwã omãrẽã. Mʉ̃ra drõã Pauloa. Jesucrito carea preso ɓʉa.
10 Bʉ nezoca Onesimo carea mʉ̃a beɗea djuburiaya. Idjira mʉ̃ warra quĩrãca ɓʉa. Mʉ̃ nama preso ɓʉɗe idjia mʉ̃neba Critora ĩjãna bẽrã mʉ̃ warra quĩrãca ɓesia.
11 Naẽna bʉ nezoca dji biaẽ́ basía, baribʉrʉ iɗira nezoca biada ɓesia. Mãwã idjia bʉ itea bia trajaya idjaɓa mʉ̃ra bia carebaya.
12 Idjira bʉmaa jẽda diabuebʉrʉa. Mʉ̃a idjira bio quĩrĩã ɓʉa. Mʉ̃ quĩrã djuburia idjira bia edadua mʉ̃ edabʉrʉ quĩrãca.*
13 Beɗea bia Critoɗebema carea mʉ̃ preso ɓʉɗe idjira mʉ̃ ume eroɓa quĩrĩã ɓasia jũma bʉa mʉ̃ carea jãmaʉba poya oẽ́ ɓʉda omãrẽã.
14 Baribʉrʉ bʉa bia ɓʉaɗa aẽ́ne mãwã o quĩrĩãẽ́ basía. Mʉ̃a quĩrã djuburia iwiɗi ɓʉra bʉ́a õgo obiẽ́a ãtebʉrʉ quĩrĩã ɓʉa bʉabʉrʉ mãwã o quĩrĩã ɓaida.
15 Dãrãẽ́ ɓʉa bʉ nezoca Onesimora bʉ ume ɓaɗada mĩrũ wãnada. Ãĩbẽrã mãwãsia idji jẽda wãbʉrʉɗe bʉa ewariza eroɓamãrẽã.
16 Baribʉrʉ idjira nezoca quĩrãca eroɓaiẽ́ ɓʉa, ãtebʉrʉ nezoca cãyãbara biara eroɓaida ɓʉa. Critoɗeba bʉ djaba bẽrã quĩrĩãneba eroɓaida ɓʉa. Mʉ̃a idjira bio quĩrĩã ɓʉa, baribʉrʉ maʉ̃ cãyãbara bʉa idjira biara quĩrĩãida ɓʉa, bʉ nezoca bẽrã idjaɓa dadjirã Boroɗeba bʉ djaba bẽrã.
17 Bʉmaarã dadjia Ãcõrẽ itea aɓarida o panʉbʉrʉ, Onesimora bia edadua mʉ̃ edabʉrʉ quĩrãca.
18 Idjia bariduaɗeba bʉda biẽ́ osibʉrʉ wa bʉ́a jẽda diai bara ɓʉbʉrʉ, mʉ̃́a iwiɗidua.
19 Ara mʉ̃ jʉwaba nãwã ɓʉbʉrʉa: idjia jẽda diaida ɓʉra mʉ̃a diaya. Quĩrãnebadua mʉ̃neba Crito ĩjãna bẽrã bʉa mʉ̃́a diai bara ɓʉda.
20 Djaba, dadji Boro carea mʉ̃ quĩrã djuburia iwiɗi ɓʉra odua. Dadjira Critoɗeba djabarã bẽrã mʉ̃ sora ɓʉsriɗabidua.
21 Mʉ̃a mãwã ɓʉbʉrʉa cawa ɓʉ bẽrã bʉa mʉ̃ beɗeara ĩjãida. Cawa ɓʉa mʉ̃a jara ɓʉ cãyãbara bʉa biara oida.
22 Maʉ̃ awara mʉ̃a crĩcha ɓʉa bãrãba Ãcõrẽa iwiɗi panʉneba mʉ̃ra ẽdrʉida. Mãwã mʉ̃ra bãrãmaa poya wãya. Maʉ̃ bẽrã mʉ̃ cãĩ siɗa waga eroɓadua.
Pauloba naʉ̃ cartaɗe jĩrũare ɓʉɗa
23 Djaba Epaproda Jesucrito carea mʉ̃ ume preso ɓʉa. Idjia quĩrĩã ɓʉa bʉra bia ɓaida.
24 Marcoba, Aristarcoba, Demába, Luca biɗa quĩrĩã panʉa bʉra bia ɓaida. Ãdjirãba mʉ̃ ume Ãcõrẽ trajura o panʉa.
25 Mʉ̃a quĩrĩã ɓʉa dadjirã Boro Jesucritoba idji biaɗeba bãrãra careba ɓaida.*
