Apocalipsi 1:1-20
1 Mʉ̃ra Jesucrito nezoca Juaʉ̃a. Naʉ̃ cartaɗe ɓʉ́ ɓʉa Jesucritoba bajãneba mʉ̃́a cawabiɗada. Maʉ̃ cawabiɗara Ãcõrẽba Jesucritoa cawabisia idji ĩjã ɓeaa cawabimãrẽã dãrãẽ́ne cãrẽda sãwãida.* Jesucritoba bajãnebema nezocada mʉ̃maa diabuesia maʉ̃ra cawabimãrẽã.
2 Jũma mʉ̃a ununara wãrãda jara ɓʉa. Mʉ̃a jaraya naʉ̃ beɗeara Ãcõrẽneba ze ɓʉda idjaɓa Jesucritoba wãrãda cawabisida.
3 Maʉ̃ sãwãinebema beɗea djabarã quĩrãpita lebʉrʉra bio bia ɓaya. Idjaɓa naʉ̃ beɗea ũrĩnapeɗa ĩjã o ɓeara bio bia ɓeaɗia, naʉ̃ beɗeara dãrãẽ́ne mãwãi bẽrã.
Djabarã Asia druaɗebema itea Juaʉ̃ba ɓʉɗa
4 Mʉ̃ra Juaʉ̃a. Naʉ̃ cartara ɓʉbʉrʉa djabarã Asia druaɗebemarã itea. Siete puruɗaa diabuebʉrʉa. Mʉ̃a quĩrĩã ɓʉa Ãcõrẽba idji biaɗeba bãrãra careba ɓaida idjaɓa necai ɓaira bãrãa dia ɓaida. Idjira ɓʉa, naẽna ɓasia, idjaɓa ewariza ɓaya. Idjaɓa mʉ̃a quĩrĩã ɓʉa Ãcõrẽ bugue biya quiru quĩrãpita siete jaure panʉba mãwã o pananida.*
5 Maʉ̃ awara quĩrĩã ɓʉa Jesucritoba mãwã o ɓaida. Idjia Ãcõrẽnebemada wãrãda jarabaria. Beu ɓaɗada naãrã ʉ̃rẽbasia ewariza zocai ɓai carea. Jũma naʉ̃ ẽjũãnebema bororã cãyãbara dji dromaara ɓʉa. Idjia dadjirãra quĩrĩã ɓʉa idjaɓa idji oaɗeba cadjiruaɗebemada ẽdrʉ ɓʉsia.
6 Dadjirãra ɓʉsia Ãcõrẽ puruɗe sacerdoteda ɓeaɗamãrẽã. Mãwã idji Zeza Ãcõrẽba quĩrĩã ɓʉra o panania. Idjía bia beɗeaɗida panʉa. Bia ɓʉa idjidrʉ ewariza jũmarã Boroda ɓaida. Wãrãda bia ɓʉa mãwã ɓaida.*
7 Ũrĩnadua. Critora jʉ̃rãrãne zeya. Maʉ̃ne jũmarãba ununia. Idji supeɗaɗa biɗa ununia.
Idji unubʉdaɗe jũma naʉ̃ ẽjũãnebemara jĩãnia.* Wãrãda mãwã ɓaya.
8 Dadjirã Boroba jarasia: “Mʉ̃ra ne jũma poya o ɓʉ Ãcõrẽa. Mʉ̃ra dji Alpaa idjaɓa dji Omegaa.* Maʉ̃ba jara ɓʉa mʉ̃ra dji naãrãbemada idjaɓa dji jĩrũarebemada. Mʉ̃ra ɓʉa, naẽna ɓasia, idjaɓa ewariza ɓaya.”
Juaʉ̃ba Crito ununa
9 Mʉ̃ra bãrã djaba Juaʉ̃a. Dadjirãra Jesucrito ume panʉ bẽrã mʉ̃ra bãrã ume Ãcõrẽ puruɗebemaa, bãrã ume bia mĩga ɓʉa, idjaɓa bãrã ume jũma droa ɓʉa. Ãcõrẽ beɗea jaradia ɓʉ carea idjaɓa Jesuɗebema wãrãana a ɓʉ carea mʉ̃ra morro droma Patmo abadaɗe ɓʉsiɗaa.
10 Dadjirã Boro Jesucrito itea wagabada ewariɗe mʉ̃ra Ãcõrẽ Jaureɗeba ɓasia.* Maʉ̃ne mʉ̃ ẽcarraare aɓaʉba beɗea ɓʉda ũrĩsia. Idji beɗeara cachiru jĩgua quĩrãca ɓasia.
11 Maʉ̃ba jarasia: “Bʉa unubʉrʉda cartaɗe ɓʉpeɗa djabarã siete puru ɓeaɗe panʉmaa diabuedua: Epesoɗaa, Esmirnanaa, Pergamonaa, Tiatiraɗaa, Sardiɗaa, Piladelpiaɗaa, idjaɓa Laodiceaɗaa.”*
12 Maʉ̃ne mʉ̃a jẽda acʉsia caida beɗea ɓʉ cawaya. Acʉbʉrʉɗe siete ĩbĩrã oro oɗada unusia.
13 Maʉ̃ siete ĩbĩrã ẽsi ẽberã zaca ɓʉda unusia.* Idjia cacuaɗe jʉ̃ ɓʉra eɗu jĩrũ daucha jũẽ ɓasia. Idji ju caita oro oɗada trãjʉ̃ ɓasia.
14 Idji buɗara totroa querasia oveja cara quĩrãca wa nieve quĩrãca. Idji daura tʉbʉ urua quĩrãca ɓasia.
15 Idji jĩrũra bronce tʉbʉɗe dorraɓaripeɗa ʉraɗa quĩrãca urua ɓasia. Idji beɗeara do jururua ɓʉ quĩrãca jĩguasia.
16 Idji jʉwa araare chĩdauda siete eroɓasia. Idji iteɗeba djõbada neco quiɗa umena peweɗea era ɓʉda odja nũmasia. Idji quĩrãra ʉ̃mãdau dorrodorroa quĩrãca ɓasia.
17 Idji unusiɗe ne wayaaba mʉ̃ra idji jĩrũ caita beuɗa quĩrãca egode taɓesia. Baribʉrʉ idji jʉwa araarebemada mʉ̃ ʉ̃rʉ̃ ɓʉpeɗa jarasia: “Ne wayarãdua. Mʉ̃ra dji naãrãbemaa idjaɓa dji jĩrũarebemaa.
18 Mʉ̃ra dji Zocai Ɓʉa. Mʉ̃ra beuɗamĩna acʉdua zocai ɓʉda, idjaɓa ewariza zocai ɓaya. Mʉ̃abʉrʉ beuɗarãra ʉ̃rẽbabida ɓʉa.*
19 Bʉa unu ɓʉda cartaɗe ɓʉdua. Iɗi sãwã nũmʉda idjaɓa jĩrũare sãwã nũmainebema siɗa ɓʉdua.
20 Mʉ̃a cawabiya bʉa ununa siete chĩdau mʉ̃ jʉwa araarebemane eroɓʉba cãrẽda jara ɓʉda idjaɓa maʉ̃ siete ĩbĩrã oro oɗaba cãrẽda jara ɓʉda. Maʉ̃ siete chĩdauba jara ɓʉa bajãnebema nezocarã siete panʉda. Maʉ̃ siete panʉba djabarã siete puru ɓeaɗe panʉda wagabadaa. Ãdjiza djabarã puru aɓaʉɗe panʉda wagabadaa. Dji ĩbĩrã siete panʉba jara ɓʉa djabarã siete puru ɓeaɗe panʉnebemada.”
Beɗea eɗaare
^ 1:1. Idji ĩjã ɓeaa. Griego beɗeaɗe ɓʉ́ ɓʉa “nezocarãa.”
^ 1:4. Siete jaure panʉba. Ʉ̃cʉrʉmaarã maʉ̃ siete jaure panʉra Ãcõrẽ Jaureda mãwã ɓʉa. Idjaɓa ʉ̃cʉrʉmaarã maʉ̃ jaure siete panʉra bajãnebema nezocarã dji dromada mãwã ɓeaa.
^ 1:6. Wãrãda bia ɓʉa mãwã ɓaida. Griego beɗeaɗe ɓʉ́ ɓʉa: “Amén.”
^ 1:7. Mateo 24:30; Juaʉ̃ 19:34-37.
^ 1:8. Griego alfabetoɗe alpara dji naãrãbema letraa, omegara dji jĩrũarebema letraa.
^ 1:10. Dadjirã Boro Jesucrito itea wagabada ewariɗe. Jesu ʉ̃rẽbaɗacarea domiaza djabarãba idji ʉ̃rẽbaɗara quĩrãnebabadjiɗaa. Iɗira domingoza mãwã obadaa.
^ 1:11. Griego beɗeaɗe ʉ̃cʉrʉ cartaɗe naʉ̃ siɗa ɓʉ́ ɓʉa: “Mʉ̃ra dji Alpaa idjaɓa dji Omegaa. Maʉ̃ba jara ɓʉa mʉ̃ra dji naãrãbemada idjaɓa dji jĩrũarebemada.”
^ 1:13. Ẽberã zaca ɓʉda. Griego beɗeaɗe nãwã ɓʉ́ ɓʉa: “Naʉ̃ djara edaɗaca ɓʉda unusia.” Aɓari quĩrãca jara ɓʉa Daniel 7:13ɗe.
^ 1:18. Mʉ̃abʉrʉ beuɗarãra ʉ̃rẽbabida ɓʉa. Griego beɗeaɗe nãwã ɓʉ́ ɓʉa: “Mʉ̃abʉrʉ ẽberãrã beuɗiɗebema yavera eroɓʉa. Beupeɗaɗa duanʉmabema yavera eroɓʉa.”
