Apocalipsi 10:1-11
10 Mãwãnacarea cãĩmocara quĩrãca mʉ̃a unusia bajãnebema nezoca dji dromada eɗaa zebʉrʉda. Idjia cacuaɗe jʉ̃ ɓʉra jʉ̃rãrã basía. Idji boro ʉ̃rʉ̃ eumada ɓasia. Idji quĩrãra ʉ̃mãdau quĩrãca urua ɓasia. Idji jĩrũra tʉbʉ eradrʉ nũmʉ quĩrãca ɓasia.
2 Idji jʉwaɗe carta zaqueda ewara eroɓasia. Idji jĩrũ araarebemara pusaɗe tʉga nũmasia. Jĩrũ acʉarebemara drua tʉga nũmasia.
3 Maʉ̃be idjira imama jarragabari quĩrãca jĩgua ɓiasia. Mãwã ɓiabʉrʉɗe baara ɓarima siete jururuasia.
4 Baa ɓarima siete jururuaɗacarea maʉ̃ jururuaba jaraɗara mʉ̃a cartaɗe ɓʉi basía. Maʉ̃ne bajãnaa mʉ̃a beɗeada ũrĩsia nãwã jarabʉrʉda: “Baaba ɓarima siete jururua jaraɗara mẽrã eroɓadua. Cartaɗe ɓʉrãdua.”
5 Maʉ̃be mʉ̃a ununa bajãnebema nezoca pusaɗe idjaɓa drua tʉga nũmʉba idji jʉwa araarebemada ʉ̃taa bajãnaa wasia.
6 Mãwã ɓʉɗe idjira naʉ̃ ẽjũãnebema, bajãnebema, pusaɗebema jũma oɗa Ãcõrẽ trʉ̃neba beɗeasia. Nãwã jarasia Ãcõrẽ ewariza zocai ɓʉ trʉ̃neba: “Ãcõrẽba jaraɗara dãrãẽ́ne jũma mãwãya.
7 Idjiɗeba beɗeabadarãda idji nezocarãa. Naẽna Ãcõrẽba ãdjirãa jarabadjia idjia cawabiẽ́ ɓʉda jĩrũare jũma mãwãida. Bajãnebema nezoca dji jĩrũarebemaba cachiru zabʉrʉɗe wãrãda jũma mãwãya.”
8 Maʉ̃be bajãnaa beɗea mʉ̃a naẽna ũrĩnaba wayacusa nãwã jarasia: “Bajãnebema nezoca jĩrũ aɓa pusaɗe jĩrũ aɓa drua tʉga nũmʉba carta zaque idji jʉwaɗe ewara eroɓʉda edaɗe wãdua.”
9 Ara maʉ̃da bajãnebema nezocamaa wãpeɗa mʉ̃a iwiɗisia carta zaquera diamãrẽã. Idjia panusia: “Edadua. Codua. Bʉ iteɗera urrajõ quĩrãca cũã ɓaya, baribʉrʉ bʉ ɓiteɗa asea nũmeya.”
10 Maʉ̃ carta zaquera bajãnebema nezoca jʉwaɗebemada edapeɗa cosia. Mʉ̃ iteɗe urrajõ quĩrãca cũã ɓasia baribʉrʉ coɗacarea mʉ̃ ɓiteɗa asea nũmesia.
11 Maʉ̃be idjia mʉ̃́a jarasia: “Bʉa wayacusa Ãcõrẽneba beɗeaida ɓʉa zocãrã puru sãwãninebemada, zocãrã drua sãwãninebemada, beɗeaza sãwãninebemada, idjaɓa ẽberãrã bororã sãwãninebema siɗa.”
