Apocalipsi 11:1-19
11 Mãwãnacarea aɓaʉba de zabada bacuru quĩrãca ɓʉda mʉ̃́a diasia. Idjia nãwã jarasia: “Ãcõrẽ de dromara, animarã babue diabada siɗa zaɗe wãdua. Idjaɓa Ãcõrẽa mama bia beɗea panʉ siɗa jũma juachadua.
2 Baribʉrʉ Ãcõrẽ de droma mõgaraba auɗu jũrã ca ɓʉ eɗaarebema ẽjũãda zarãdua, maʉ̃gʉra Ãcõrẽ ĩjãẽ́ ɓeaa diaɗa bẽrã. Ãdjirãba Ãcõrẽ puru Jerusaleʉ̃ra 42 jeɗeco poya eropanania.*
3 Maʉ̃ ewariɗe mʉ̃a ẽberãda umé diabueya mʉ̃nebemada ebuɗa beɗeaɗamãrẽã. Ãdjia sopua carea jʉ̃bada jʉ̃ panʉne 1,260 ewari Ãcõrẽneba beɗeaɗia.”
4 Ãcõrẽ naʉ̃ ẽjũãnebema boro quĩrãpita olivo bacuruda umé panʉa, ĩbĩrã siɗa umé panʉa. Maʉ̃ba idjiɗebema beɗeabada umé panʉda jara ɓʉa.*
5 Bariduaba ãdjida biẽ́ o quĩrĩãnibʉrʉ, ãdji iteɗeba urua eradrʉbʉrʉba ãdji ume dji quĩrũra bá beaɗia. Jũma ãdji biẽ́ o quĩrĩãbʉdara ara maʉ̃ quĩrãca beaɗia.
6 Maʉ̃ ẽberã umé panʉba Ãcõrẽneba beɗea panʉne bajãra poya jũãtrʉɗia cue zerãmãrẽã. Baido siɗa ãdjia poya oa babiɗia idjaɓa naʉ̃ ẽjũã ãrĩnira quĩrãtanoa poya zebiɗia ãdjia o quĩrĩã panʉ quĩrãca.
7 Baribʉrʉ Ãcõrẽnebema jũma beɗeapeɗaɗacarea animarã cadjirua uria dau cʉre ɓʉɗeba zebʉrʉba ãdjira orraya. Maʉ̃ba ãdjira poyapeɗa beaya.
8 Dji bewãrãra Jerusaleʉ̃ puru dromane tapanania. (Jerusaleʉ̃ puruɗe dadjirã Boro Jesura cruɗe cachi beasiɗaa. Ʉ̃cʉrʉba maʉ̃ purura trʉ̃ jarabadaa “Sodoma” idjaɓa “Egipto”, Jerusaleʉ̃nebemaba cadjiruara aɓarica obada bẽrã.)
9 Puruzabemaba, beɗeazabemaba, druazabema biɗa bẽwãrã mama tapanʉda ewari ũbea ẽsidra acʉ panania. Maʉ̃ bewãrãra idu joubiɗaẽ́a.
10 Ãdji beupeɗaɗa carea naʉ̃ ẽjũãne ɓeara ɓʉsriɗaɗia. Ɓʉsriɗa panʉba ãdjiza nebiada diadruaɗia maʉ̃ Ãcõrẽneba beɗeabada umé pananaba ãdjirãra bia mĩga eropanana bẽrã.
11 Baribʉrʉ ewari ũbea ẽsidra baɗacarea Ãcõrẽba ãdjira ʉ̃rẽbabisia. Ãdji piradrʉbʉda unupeɗaɗara bio dauperasiɗaa.
12 Maʉ̃be dji Ãcõrẽneba beɗeabadaba beɗeada bajãnaa jĩgua ũrĩsiɗaa. Nãwã jarasia: “Nama ʉ̃taa zeɗadua.” Ara maʉ̃da ãdji ume dji quĩrũba acʉ panʉne jʉ̃rãrãne bajãnaa wãsiɗaa.
13 Maʉ̃be de uremiada dji cãbãyã uresia. Maʉ̃ba Jerusaleʉ̃ puruɗe deda zocãrã coracuasia.* Ẽberãrãda siete mil quinisiɗaa. Maʉ̃ne dji zocai ɓeara bio daupera duanʉba Ãcõrẽ bajãne ɓʉ́a bia beɗeasiɗaa.
14 Maʉ̃ mĩã djuburi ɓeaɗi jaraɗara jõsia. Baribʉrʉ jĩrũarebema mĩã djuburi ɓeaɗi jaraɗara dãrãẽ́ne zeya.*
Jĩrũarebema cachiru zaɗa
15 Bajãnebema nezoca dji jĩrũarebemaba idji cachirura zásia.* Maʉ̃ne bajãne zocãrã nãwã jĩgua beɗeasiɗaa:
Dadjirã Boro Ãcõrẽda, idjia ẽdrʉ edabari diai jaraɗa ume naʉ̃ ẽjũãnebema boroda panesiɗaa.*
Iɗiba ʉ̃taa Ãcõrẽra ewariza jũmarã Boroda ɓaya.
16 Maʉ̃be veinticuatro drõãrãda ãdji bugue biya quiruɗe Ãcõrẽ quĩrãpita chũmeanada chĩrãboroɗe ɓarru copanenapeɗa Ãcõrẽa bia beɗeasiɗaa.
17 Nãwã jarasiɗaa:
Dairã Boro Ãcõrẽ jũma poya ɓʉ, bʉra naãrãeɗa ɓasia idjaɓa waɗibiɗa ɓʉa.*
Bʉ ʉɓʉa waiɓʉa ɓʉda unubi ɓʉ bẽrã idjaɓa jũmarã Boroda ɓeɗa bẽrã daiba bia ɓʉaɗa a panʉa.
18 Druazabemarãra bʉ ume quĩrũbucasiɗaa. Baribʉrʉ bʉa cawa oi ewarira jũẽsia.* Iɗibʉrʉ bʉa beuɗarãra cawa oya.
Maʉ̃ne bʉ nezocarã bʉɗeba beɗeapeɗaɗarãa, bʉ ẽberãrãa, bʉ waya ɓea dji dromarãa, eɗaara ɓearãa biɗa bʉa ne biada diaya ãdjia opeɗaɗa quĩrãca.
Baribʉrʉ naʉ̃ ẽjũãne cadjirua opeɗaɗara bʉa biẽ́ ɓʉya.
19 Maʉ̃be Ãcõrẽ de droma bajãne ɓʉra ewasia. Maʉ̃ deɗe eɗa Ãcõrẽ ley wagabada baurudeda mʉ̃a unusia. Maʉ̃ne baada purewa eda nũmesia, jururua nũmesia, idjaɓa dji cãbãyã ɓae nũmesia. Naʉ̃ ẽjũãra ure nũmesia idjaɓa hieloda cue quĩrãca jurru nũmesia.
Beɗea eɗaare
^ 11:2. Griego beɗeaɗe nãwã ɓʉ́ ɓʉa: “Ãdjirãra Ãcõrẽ itea ɓʉ purura 42 jeɗeco biwadʉgaɗia.”
^ 11:4. Zacaria 4:1-14.
^ 11:13. Zocãrã. Griego beɗeaɗe ɓʉ́ ɓʉa “la décima parte.”
^ 11:14. Mĩã djuburi ɓeaɗi jaraɗara ũbea panʉa. Apocalipsi 8:13.
^ 11:15. Bajãnebema nezoca dji jĩrũarebemaba. Cãpũrĩã beɗeaɗe ɓʉ́ ɓʉa “séptimo ángel.”
^ 11:15. Idjia ẽdrʉ edabari diai jaraɗa. Griego beɗeaɗe “idji Crito” ɓʉ́ ɓʉa.
^ 11:17. Griego beɗeaɗe ʉ̃cʉrʉ cartaɗe idjaɓa ɓʉ́ ɓʉa: “Idjaɓa zeida ɓʉa.”
^ 11:18. Bʉa cawa oi ewarira jũẽsia. Griego beɗeaɗe nãwã ɓʉ́ ɓʉa: “Bʉ quĩrũbi ewarira jũẽsia.”
