Apocalipsi 12:1-17
12 Ne jarai waiɓʉada bajãne odjasia. Mʉ̃a unusia wẽrãba ʉ̃mãdauda wua quĩrãca jʉ̃ ɓʉda.* Idji jĩrũra jeɗeco ʉ̃rʉ̃ ɓasia. Doce chĩdauda boroɓari quĩrãca jʉ̃ ɓasia.
2 Maʉ̃ wẽrãra ɓiogoa ɓasia. Warra toiɗe nũmʉ bẽrã puaba ɓiabadjia.
3 Maʉ̃be dewara ne jaraida bajãne odjasia. Mʉ̃a je droma purega ɓʉda unusia. Maʉ̃ jeba boroda siete eroɓasia idjaɓa cachuda die eroɓasia. Nepeda boroza jʉ̃ ɓeasia.
4 Idji druba jãrãwẽbʉrʉba chĩdauda berara ẽsidra bajãneba naʉ̃ ẽjũãnaa jurrubisia.* Maʉ̃ jera wẽrã warra toi carea ɓʉma nũmesia warra zaque ara tobʉrʉda mĩ carea.
5 Maʉ̃ne wẽrãba umaquĩrã warrada tosia. (Maʉ̃ warraba quĩrã djuburia neẽ́ jũma naʉ̃ ẽjũãne ɓeaa idji beɗeada ĩjã obiya.)* Baribʉrʉ jeba mĩ naẽna Ãcõrẽba maʉ̃ warrara ʉ̃taa edesia idji bugue biya quiruɗe chũmʉmaa.
6 Maʉ̃be wẽrãra ẽjũã põãsa ewaraga ɓʉmaa mĩrũ wãsia. Mama 1,260 ewari idjira waga eroɓai carea Ãcõrẽba jũma o eroɓasia.
7 Mãwãnacarea bajãnebema nezoca dji droma Miguel abadada idjiare panʉ nezocarã siɗa je ume bajãne djõbucasiɗaa. Maʉ̃ne jera idjiare panʉ siɗa djõbucasiɗaa.
8 Baribʉrʉ jeba, idjiare panʉ biɗa poyaɗaẽ́ basía. Maʉ̃ bẽrã ãdjira bajãne waa poya pananaẽ́ basía.
9 Maʉ̃ne je dromara, jũma idjiare panʉ siɗa naʉ̃ ẽjũãnaa ɓatabuesiɗaa. Maʉ̃ jera naẽnaeɗa baɗa dama basía. Idji trʉ̃ra Diauru idjaɓa Satana abadaa.* Idjia naʉ̃ ẽjũãne ɓeara jũma cũrũga eroɓʉa.
10 Maʉ̃be mʉ̃a ũrĩsia aɓaʉda bajãne jĩgua beɗea ɓʉda. Maʉ̃ba nãwã jarasia:
Iɗibʉrʉ dadji Ãcõrẽba idji ẽberãrãra ẽdrʉ edabʉrʉa.
Iɗibʉrʉ idji ʉɓʉaɗeba jũmarã boroda ɓaya.
Crito idjia ẽdrʉ edabari diai jaraɗaba jũma poya eroɓaya.
Dadji djabarã biẽ́ jarabarida bajãneba uɗaa ɓatabuesiɗaa.
Idjia ãsa, diamasi biɗa dadji Ãcõrẽ quĩrãpita djabarãra biẽ́ jarabadjia.
11 Dadji djabarãba Oveja Zaque oa erozoaɗaba idjaɓa idji beɗea jara panʉneba poyasiɗaa.
Ãdjirã Crito carea beaɗira wayaɗaẽ́ basía, ãtebʉrʉ beuɗi carea panasiɗaa.
12 ¡Maʉ̃ bẽrã jũma bajãne ɓeara ɓʉsriɗaɗadua!
Baribʉrʉ naʉ̃ ẽjũãne ɓeara, pusaɗe ɓea siɗa mĩã djuburi ɓeaɗia diaurura bãrãmaa zeɗa bẽrã.
Idjira dãrã ɓaẽ́da cawa ɓʉ bẽrã bio quĩrũ ɓʉa.
13 Jeba cawasia idjira naʉ̃ ẽjũãnaa ɓatabuesiɗada. Maʉ̃ carea wẽrã warra toɗara biẽ́ oi carea ẽpẽsia.
14 Baribʉrʉ jeba biẽ́ orãmãrẽã Ãcõrẽba wẽrãa nejõbʉ droma ida diasia ẽjũã põãsa ewaraga ɓʉmaa wãɓari wãmãrẽã. Mama Ãcõrẽba idjira poa ũbea ẽsidra waga eroɓai carea jũma o eroɓasia.
15 Maʉ̃ bẽrã jeba idji iteɗeba baidoda do quĩrãca cumabuesia wẽrãra do ɓarrea edemãrẽã.
16 Baribʉrʉ egoroba wẽrãra carebasia. Egorora yã dogopeɗa jeba iteɗeba do quĩrãca cumabueɗara jũma dosia.
17 Maʉ̃ carea jera wẽrã ume bio quĩrũsia. Ara maʉ̃da idjira wẽrãneba yõpeɗaɗa waabemarã ume djõne wãsia. Maʉ̃ yõpeɗaɗara Ãcõrẽ beɗea ĩjã o ɓearãa, Jesucritoba jaradiaɗa ĩjã ɓearãa.
Beɗea eɗaare
^ 12:1. Maʉ̃ wẽrãba judiorãnebemada jara ɓʉa.
^ 12:4. Berara ẽsidra. Griego beɗeaɗe ɓʉ́ ɓʉa “la tercera parte.”
^ 12:5. Quĩrã djuburia neẽ́. Griego beɗeaɗe ɓʉ́ ɓʉa: “Jiorroba ĩjã obiya.” Salmo 2:7-9.
^ 12:9. Griegoɗe beɗea diauruba jara ɓʉa: “Djãrã biẽ́ jarabari.” Satana trʉ̃ba jara ɓʉa: “Dji quĩrũ.”
