Apocalipsi 13:1-18
13 Mãwãnacarea jera pusa ĩbʉɗe nũmesia.* Maʉ̃ne mʉ̃a unusia animarã minijĩchia ɓʉda pusaɗeba odjabʉrʉda. Maʉ̃ animarãra siete boroda idjaɓa die cachuda eroɓasia. Cachuza nepeda jʉ̃ ɓeasia. Boroza Ãcõrẽ biẽ́ jara ɓʉ beɗeada trʉ̃ quĩrãca ɓʉ́ eroɓeasia.
2 Maʉ̃ animarã mʉ̃a ununara imama gorogoroa quĩrãca ɓasia. Idji jĩrũra wi jĩrũ quĩrãca ɓasia. Idji itera imama ite quĩrãca ɓasia. Jeba maʉ̃ animarãa idji ʉɓʉada diasia. Idjaɓa idji bugue biya quiruɗe chũmebisia naʉ̃ ẽjũãne ɓeara poya eroɓamãrẽã.
3 Maʉ̃ animarã boro aɓa cõnara anina bara ɓasia. Maʉ̃ cõnaba idjira wãrãda beuida ɓasia baribʉrʉ dji cõnara ani ɓasia. Maʉ̃ carea jũma naʉ̃ ẽjũãne ɓeaba cawa crĩchaɗaẽ́ basía. Maʉ̃ bẽrã idjira ẽpẽsiɗaa.
4 Ãdjirãba jea bia beɗeabadjiɗaa, idji ʉɓʉara maʉ̃ animarãa diaɗa bẽrã. Idjaɓa dji animarãa biɗa bia beɗeabadjiɗaa. Nãwã jarabadjiɗaa: “¿Caida naʉ̃ animarã quĩrãca ɓʉ? ¿Caida idji ume poya djõi?”
5 Ãcõrẽba maʉ̃ animarãa idu jarabisia ara idjidrʉ dji dromada idjaɓa Ãcõrẽra biẽ́ taɓʉda. 42 jeɗeco naʉ̃ ẽjũãne ɓeada idu poyabisia.
6 Maʉ̃ne idjia Ãcõrẽda, Ãcõrẽ trʉ̃da, Ãcõrẽ ɓʉmabemada, jũma bajãne ɓea siɗa biẽ́ jarabadjia.
7 Idjaɓa Ãcõrẽba iduaribisia maʉ̃ animarãra idji ẽberãrã ume djõnapeɗa poyamãrẽã. Iduaribisia puruzabemada, beɗeazabemada, druazabema siɗa poya eroɓamãrẽã.
8 Maʉ̃ne jũma naʉ̃ ẽjũãne ɓeaba maʉ̃ animarãa bia beɗeabadjiɗaa. Naʉ̃ ẽjũã oi naẽna ãdji trʉ̃ra Oveja Zaqueba eroɓʉ cartaɗe ɓʉẽ́ ɓeasia. Maʉ̃ cartaɗe ẽberãrã ewariza zocai ɓeaɗi trʉ̃da jũma ɓʉ́ ɓʉa.
9 Dji cʉwʉrʉ bara ɓʉba ũrĩdua:
10 Aɓaʉda preso ɓeida Ãcõrẽba quĩrĩã ɓʉbʉrʉ, preso ɓeya.
Aɓaʉda necoba beuida quĩrĩã ɓʉbʉrʉ, necoba beuya.*
Maʉ̃ carea Ãcõrẽ ẽberãrãba bio droaɗida panʉa idjaɓa bio ĩjã pananida panʉa.
Animarã minijĩchia ɓʉ egoroɗeba odjaɗa
11 Mãwãnacarea mʉ̃a dewara animarã minijĩchia ɓʉda egoroɗeba odjabʉrʉda unusia. Maʉ̃ animarãba cachu zaqueda umé eroɓasia oveja zaque cachu quĩrãca. Baribʉrʉ je beɗeabʉrʉ quĩrãca beɗeabadjia.
12 Idjira pusaɗeba odjaɗa animarãare ɓasia. Maʉ̃ne animarã pusaɗeba odjaɗaba jarabʉrʉra idjia ẽberãrãa jũma ĩjã obibadjia. Maʉ̃ bẽrã jarasia jũma naʉ̃ ẽjũãne ɓeaba animarã pusaɗeba odjaɗaa bia beɗeaɗamãrẽã. Maʉ̃ animarã boro cõna aninara beuida ɓaɗamĩna waɗi zocai ɓasia.
13 Animarã egoroɗeba odjaɗaba ne ununaca waiɓʉa ɓeada ocuabadjia. Ẽberãrãba acʉ panʉne urua siɗa bajãneba naʉ̃ ẽjũãnaa ɓaebisia.
14 Ãcõrẽba iduaribisia egoroɗeba odjaɗa animarãba maʉ̃ ne ununacara pusaɗeba odjaɗa animarã trʉ̃neba poya o ɓamãrẽã.* Mãwã egoroɗeba odjaɗa animarãba naʉ̃ ẽjũãne ɓeara cũrũgasia. Djõbada necoba animarã cõna waɗi zocai ɓʉ za quĩrãca ɓʉda idjia obisia.* Mãwã oɗacarea idjia jarasia jũmarãba maʉ̃gʉ́a bia beɗeaɗamãrẽã.
15 Ãcõrẽba iduaribisia animarã egoroɗeba odjaɗaba animarã jʉwaba oɗaa zocai ɓaira diaida.* Maʉ̃be animarã jʉwaba oɗara beɗeasia. Maʉ̃ jʉwaba oɗa animarãba idjía bia beɗeaɗaẽ́ra jũma quenabisia.
16 Maʉ̃ awara egoroɗeba odjaɗa animarãba jũmarãa sẽyãda ãdji jʉwa araɗe wa dratuɗe ɓʉbisia. Dji dromarãa, dji eɗaara queɗeaa, ne bara ɓeaa, ne neẽ́ queɗeaa, nezocarãa, nezocarãẽ́a biɗa maʉ̃ sẽyãda ɓʉbisia.
17 Aɓabe maʉ̃ sẽyã eroɓeaba poya ne nẽdoɗida panasiɗaa idjaɓa poya nẽdobueɗida panasiɗaa. Maʉ̃ sẽyãra pusaɗeba odjaɗa animarã trʉ̃a wa idji trʉ̃nebema numeroa.
18 Maʉ̃ numeroba caida jara ɓʉ cawai careara ne cawa ɓaida ɓʉa. Crĩcha cawa ɓʉba poya cawaya caida jara ɓʉda. Maʉ̃ numerora ẽberã trʉ̃da mãwã ɓʉa. Idji numerora naʉ̃gʉa: 666.
Beɗea eɗaare
^ 13:1. Jera pusa ĩbʉɗe nũmesia. Griego beɗeaɗe ʉ̃cʉrʉ cartaɗe ɓʉ́ ɓʉa: “Mʉ̃ra pusa ĩbʉɗe nũmesia.” Ʉ̃cʉrʉ Bibliaɗe maʉ̃ beɗeara 12:18ɗe ɓʉ́ ɓʉa.
^ 13:10. Jeremia 15:2; 43:11.
^ 13:14. Ãcõrẽba iduaribisia egoroɗeba odjaɗa animarãba maʉ̃ ne ununacara pusaɗeba odjaɗa animarã trʉ̃neba poya o ɓamãrẽã. Maʉ̃ beɗeara idjaɓa nãwã traducida ɓʉa: “Diauruba egoroɗeba odjaɗa animarãa ʉɓʉada diasia maʉ̃ ne ununacara pusaɗeba odjaɗa animarã trʉ̃neba poya o ɓamãrẽã.”
^ 13:14. Djõbada necoba animarã cõna waɗi zocai ɓʉ za quĩrãca ɓʉda idjia obisia. Maʉ̃ beɗeara idjaɓa nãwã traducida ɓʉa: “Djõbada necoba cõna waya zocai ɓeɗa animarã quĩrãca ɓʉda idjia obisia.”
^ 13:15. Ãcõrẽba iduaribisia animarã egoroɗeba odjaɗaba animarã jʉwaba oɗaa zocai ɓaira diaida. Maʉ̃ beɗeara idjaɓa nãwã traducida ɓʉa: “Diauruba idjía ʉɓʉada diasia pusaɗeba odjaɗa animarã zaca ɓʉ zocai ɓabimãrẽã.”
