Apocalipsi 14:1-20
14 Mãwãnacarea mʉ̃a unusia Oveja Zaquera Sioʉ̃ eya boroɗe nũmʉda. Idji ume ẽberãrãda 144 mil panasiɗaa. Ãdjirã dratuɗe Oveja Zaque trʉ̃da, dji Zeza trʉ̃ siɗa ɓʉ́ eroɓeasia.
2 Maʉ̃ne bajãnaa mʉ̃a ũrĩsia do bũga nũmʉ quĩrãca, baa jururua nũmʉ quĩrãca. Mʉ̃a ũrĩnara arpa zabadarãba biya zá duanʉ quĩrãca ɓasia.
3 Maʉ̃ne Ãcõrẽ bugue biya quiru quĩrãpita, animarã zaca zocai ɓea quĩmãrẽ panʉ quĩrãpita, veinticuatro drõãrã quĩrãpita biɗa trʉ̃ãbi djiwiɗida trʉ̃ã duanasiɗaa. Ni aɓaʉba maʉ̃ trʉ̃ãbira poya trʉ̃ã cawaɗaẽ́ basía. Aɓabe maʉ̃ 144 mil ẽberãrã Ãcõrẽba naʉ̃ ẽjũãnebema ẽdrʉ edaɗaba trʉ̃ã cawasiɗaa.
4 Maʉ̃ ẽberãrãra wẽrã adua ɓeasia. Ãcõrẽ itea ni maãrĩ biɗa biẽ́ ɓeaɗaẽ́ basía. Oveja Zaque wãbʉrʉza ẽpẽbadaa. Ãcõrẽba ãdjirãra idji itea, Oveja Zaque itea biɗa ɓeaɗamãrẽã naʉ̃ ẽjũãnebemada ẽdrʉ edasia. Néuɗebema naãrã ewaɗa Ãcõrẽa diaɗa quĩrãca panʉa.
5 Sewara ni aɓa biɗa oɗacaa. Aɓeɗa cadjirua neẽ́ ɓeaa.
Bajãnebema nezoca ũbea panʉba jarapeɗaɗa
6 Mãwãnacarea mʉ̃a bajãnebema nezocada unusia bajãne wãɓaribusida. Idjia beɗea biada eroɓasia jũma naʉ̃ ẽjũãnebemarãa, druazabemarãa, beɗeazabemarãa, puruzabemarãa biɗa jarai carea. Maʉ̃ beɗeara ewariza mãwã ɓaya.
7 Idjia nãwã jĩgua jarasia: “¡Ãcõrẽra wayaɗadua! Idjia cawa oi ewarira jũẽna bẽrã idjidrʉ dji dromaana aɗadua. Bajãda, egoroda, pusada, baido bogadrʉ ɓea siɗa oɗa bẽrã idjía bia beɗeaɗadua.”
8 Maʉ̃ bajãnebema nezoca caiɗu dewarada zepeɗa nãwã jarasia: “Babilonia puru dromara jũma ãrĩsia. Wãrãda jũma ãrĩsia. Maʉ̃ puruɗebemarãba auɗua o duanʉba druazabemarãa aɓarica cadjiruada obisiɗaa itua õgo diabʉda quĩrãca.”
9 14:9-10 Maʉ̃ bajãnebema nezoca wãnacarea dewarada wãɓari zesia. Idjia nãwã jĩgua jarasia: “Bariduaba animarã minijĩchia ɓʉ́a, jʉwaba oɗa idji za quĩrãca ɓʉ́a biɗa bia beɗeaibʉrʉ, idjaɓa dratuɗe wa jʉwaɗe maʉ̃ animarã sẽyãda idu ɓʉbibʉrʉ, Ãcõrẽba quĩrũbiɗeba maʉ̃ ẽberãra bio biẽ́ ɓʉya uva ɓa asega ɓʉ dawabʉrʉ quĩrãca. Maʉ̃ ẽberãra jũma bajãnebema nezocarã quĩrãpita, Oveja Zaque quĩrãpita biɗa azupre uruaba bio bia mĩga ɓaya.
11 Maʉ̃ ẽberã bia mĩga ɓʉma tʉbʉ uruara quica baya. Ewariza cowa nũmaya. Bariduaba animarã minijĩchia ɓʉ́a, jʉwaba oɗa idji za quĩrãca ɓʉ́a biɗa bia beɗeaibʉrʉ, ʉ̃nãũnira neẽ́ ɓaya. Maʉ̃ animarã trʉ̃ idu ɓʉbipeɗaɗaba ãsa, diamasi biɗa ʉ̃nãũnira neẽ́ panania.”
12 Maʉ̃ carea Ãcõrẽ ẽberãrãba naʉ̃ ẽjũãne bio droaɗida panʉa. Idjia ĩjã obi ɓʉ beɗeada ĩjã o ɓeaɗida panʉa idjaɓa Jesura bio ĩjã pananida panʉa.
13 Mãwãnacarea mʉ̃a bajãnaa ũrĩsia aɓa nãwã beɗeabʉrʉda: “Cartaɗe nãwã ɓʉdua: iɗiba ʉ̃taa bia ɓeaɗia dadjirã Boro Jesu ĩjã panʉne beubʉdara.”
Maʉ̃ne Ãcõrẽ Jaureba nãwã jarasia: “Wãrãda bia ɓeaɗia. Ãdjirãra bia mĩga panananebemada ʉ̃nãũnia. Ãdjia bia opeɗaɗa carea Ãcõrẽba ne biada bajãne diaya.”
Ãcõrẽba naʉ̃ ẽjũãne ɓea cawa oiɗebema
14 Mãwãnacarea mʉ̃a ʉ̃taa acʉbʉrʉɗe jʉ̃rãrã torroda unusia. Ẽberã zaca ɓʉda maʉ̃ jʉ̃rãrã ʉ̃rʉ̃ chũmʉda unusia.* Nepe oro oɗada jʉ̃ ɓasia. Idji jʉwaɗe neco peweɗea era ɓʉda eroɓasia.
15 Mãwã ɓʉɗe Ãcõrẽ de droma bajãne ɓʉɗeba nezocada aɓa dajadaa zepeɗa dji jʉ̃rãrã ʉ̃rʉ̃ chũmʉ́a nãwã jĩgua jarasia: “Ẽjũãnebema néura jũma purea taɓʉa. Ewai jara nũmʉ bẽrã bʉ necoba ewadua.”
16 Ara maʉ̃da jʉ̃rãrã ʉ̃rʉ̃ chũmʉba idji necoba naʉ̃ ẽjũãnebema néura ɓarima aɓabe orrawe tubʉrʉba jũma ewasia.
17 Maʉ̃be dewara nezocada Ãcõrẽ de droma bajãne ɓʉɗeba dajadaa zesia. Idjia biɗa neco peweɗea era ɓʉda eroɓasia.
18 Maʉ̃ne quera babada bajãne ɓʉmaʉba dewara nezocada zesia. Maʉ̃ nezocaba quera babada uruada urua eroɓabaria. Idjia bajãnebema nezoca neco peweɗea era eroɓʉ́a nãwã jĩgua jarasia: “Ẽjũãnebema uvara jũma purea nũmʉ bẽrã bʉ neco peweɗea era ɓʉba uvara dji cʉmʉne ewadua.”
19 Ara maʉ̃da bajãnebema nezocaba idji necoba naʉ̃ ẽjũãnebema néura ɓarima aɓabe orrawe tubʉrʉba uvara cʉmʉne jũma ewasia. Maʉ̃be uvara dji biwadʉgabadaɗe cuabuesia dji ɓa piai carea. Maʉ̃ba jara ɓʉa Ãcõrẽba cawa oiɗebemada.
20 Uvara Jerusaleʉ̃ puru dajada biwadʉgasia. Maʉ̃ne oada mamaʉba mĩga weaɓari wãsia.* Dji nãbuada cawayo ite jʉ̃bada ʉ̃tʉaɗe jũẽsia.
