Apocalipsi 16:1-21
16 Maʉ̃be mʉ̃a ũrĩsia aɓaʉda Ãcõrẽ de bajãne ɓʉɗeba jĩgua beɗeabʉrʉda. Maʉ̃ba bajãnebema nezocarã siete panʉ́a nãwã jarasia: “Jãʉ̃ siete epeɗeco jũgurua Ãcõrẽ quĩrũbiba bira ɓeara ẽjũãnaa weabueɗe wãnadua.”
2 Ara maʉ̃da aɓa wãpeɗa idji epeɗecoɗe ɓʉda naʉ̃ ẽjũãnaa weabuesia. Maʉ̃ba animarã minijĩchia ɓʉ trʉ̃ dratuɗe wa jʉwaɗe ɓʉ́ eroɓeara, maʉ̃ animarã za quĩrãca ɓʉ jʉwaba oɗaa bia beɗeabada siɗa aiɗa cadjirua minijĩchia ɓʉba jũma birasia.
3 Mãwãnacarea dewara nezocaba idji epeɗecoɗe ɓʉda pusaɗe weabuesia. Maʉ̃ba pusara oa babisia. Ẽberã beuɗa oa quĩrãca ũmesia. Maʉ̃ne jũma pusaɗe zocai ɓeara quinisiɗaa.
4 Mãwãnacarea dewara nezocaba idji epeɗecoɗe ɓʉda doza idjaɓa baido bogadrʉ ɓeaza weabuesia. Maʉ̃ba baidora jũma oa bacuasia.
5 Maʉ̃ne mʉ̃a ũrĩsia baido wagabari bajãnebema nezocaba Ãcõrẽa nãwã jarabʉrʉda:
¡Bʉdrʉ dji wãrã Ãcõrẽa! Bʉra iɗi ɓʉa idjaɓa naẽna ɓasia. Bʉa ẽberãrãra jipa cawa osia.
6 Ãdjirãba bʉ ẽberãrã oada, bʉɗeba beɗeabadarã oa siɗa erozoabisiɗaa.
Maʉ̃ carea bʉa ãdjirãa oada dobibʉrʉa ãdjia biẽ́ opeɗaɗa quĩrãca.
7 Maʉ̃be mʉ̃a ũrĩsia aɓaʉba bajãne ɓʉ quera babadamaʉba nãwã jarabʉrʉda: “Dai Boro Ãcõrẽ jũma poya ɓʉ, wãrãda bʉa jipa ariɗe cawa obaria.”
8 Mãwãnacarea dewara nezocaba idji epeɗecoɗe ɓʉda ʉ̃mãdau ʉ̃rʉ̃ weabuesia. Maʉ̃ba ʉ̃mãdaura wetara uruabisia ẽberãrãda bámãrẽã.
9 Ʉ̃mãdau jʉ̃wʉ̃rʉ̃ãba ãdjirã bio babʉda carea Ãcõrẽda biẽ́ jarabadjiɗaa, idjiabʉrʉ mãwã bia mĩgabi ɓʉ bẽrã. Baribʉrʉ ãdjia cadjirua obadara igaraɗaẽ́ basía idjaɓa Ãcõrẽdrʉ dji dromaana aɗaẽ́ basía.
10 Mãwãnacarea dewara nezocaba idji epeɗecoɗe ɓʉda animarã minijĩchia ɓʉ bugue ʉ̃rʉ̃ weabuesia. Ara maʉ̃da maʉ̃ animarãba poya ɓʉ druaɗe ewarira pãĩma nũmesia. Maʉ̃ne puaba ẽberãrãba ãdji quĩrãmera cabadjiɗaa.
11 Ãdji pua carea, ãdji aiɗa carea Ãcõrẽ bajãne ɓʉda biẽ́ jarabadjiɗaa. Baribʉrʉ ãdjia cadjirua obadara igaraɗaẽ́ basía.
12 Mãwãnacarea dewara nezocaba idji epeɗecoɗe ɓʉda Euprate do waiɓʉaɗe weabuesia. Ara maʉ̃da dora poasia ʉ̃mãdau odjabariareba druazabema bororã djõne zebʉdaɗe bia chãnamãrẽã.
13 Idjaɓa mʉ̃a jai cadjirua baujĩã quĩrãca ɓeada ũbea unusia. Aɓa je iteɗeba ẽdrʉsia. Aɓa animarã minijĩchia ɓʉ iteɗeba ẽdrʉsia. Idjaɓa Ãcõrẽneba beɗeabari dji wãrãẽ́ ɓʉ iteɗeba aɓa ẽdrʉsia.*
14 Maʉ̃ jairãba ne ununaca waiɓʉada quĩrãtanoa obadjiɗaa. Idjaɓa jũma druazabema bororãmaa wãnapeɗa jarasiɗaa ãbaa Ãcõrẽ ume djõne wãnamãrẽã. Ãcõrẽ dji droma ɓʉba jũmarã poyai ewariɗe mãwã djõnia.
15 16:15-16 Maʉ̃ bororãra ẽjũã Armagedoʉ̃ abadamaa djõne edesiɗaa. Maʉ̃ trʉ̃ra hebreo beɗeaa.
(Jesuba nãwã jarasia:) “¡Ũrĩnadua! Ne drʉabari quĩrãca mʉ̃ra cawaẽ́ne zeya. Bio bia ɓeaɗia dau ʉɓʉa ɓeara idjaɓa cacuaɗe jʉ̃bada jʉ̃ ɓeara. Mãwã mʉ̃ zebʉrʉɗe ãdjira ãcaɗa ɓeaɗaẽ́a ni quĩrã peraɗaẽ́a.”
17 Mãwãnacarea jĩrũarebema nezocaba idji epeɗecoɗe ɓʉda naʉ̃ deɗaaɗe weabuesia. Maʉ̃ne Ãcõrẽ de bajãne ɓʉɗeba idji bugue biya quirumaʉba beɗeaba nãwã jĩgua jarasia: “Ya jõsia. Waaẽ́a.”
18 Ara maʉ̃da baara purewa eda nũmesia, dji cãbãyã ɓae nũmesia, jururua nũmesia, idjaɓa de uremiada dji cãbãyã ure nũmasia. Ãcõrẽba ẽberã oɗa ewariɗeba maʉ̃ de uremia quĩrãca waɗi urecaa.
19 Maʉ̃ de uremiaba egorora drapeɗa puru droma ɓaɗada puru ũbea panʉ quĩrãca taɓesia. Idjaɓa jũma naʉ̃ ẽjũãnebema purura ãrĩsiɗaa. Ãcõrẽba quĩrãdoaẽ́ basía Babilonia puru dromada cawa oi carea. Idji quĩrũbiɗeba maʉ̃ purura bio cawa osia uva ɓa bio asega ɓʉ dawabʉrʉ quĩrãca.
20 De uremiaba pusaɗe morro ɓeara, eya ɓea siɗa jũma nẽbabisia.
21 Bajãneba hieloda mõgara waiɓʉa quĩrãca ẽberãrã ʉ̃rʉ̃ jurrusia. Maʉ̃ hielo zʉgʉara berara cien libra ɓeasia.* Maʉ̃ hielo jurru nũmʉba bio mĩga panʉ bẽrã ẽberãrãba Ãcõrẽda biẽ́ jarasiɗaa.
