Apocalipsi 17:1-18
17 Bajãnebema nezocarã siete epeɗeco eropananada aɓa mʉ̃maa zepeɗa nãwã jarasia: “Wãna. Mʉ̃a acʉbiya sãwã Ãcõrẽba wẽrã auɗua trʉ̃ ɓʉga ɓʉda cawa oida. Maʉ̃ wẽrãra do zocãrã ʉ̃rʉ̃ chũmabaria.
2 Naʉ̃ ẽjũãnebema bororãba idji ume cadjiruada obadjiɗaa. Idjaɓa maʉ̃ wẽrãba auɗua o ɓʉda unu panʉ bẽrã naʉ̃ ẽjũãnebemarãba auɗuada obadjiɗaa ituaba beu duanʉ quĩrãca.”
3 Ara maʉ̃da Ãcõrẽ Jaureɗeba ɓʉɗe bajãnebema nezocaba mʉ̃ra ẽjũã põãsa ewaraga ɓʉɗaa edesia. Mama mʉ̃a unusia wẽrãda animarã minijĩchia ɓʉ ʉ̃rʉ̃ chũmʉda. Maʉ̃ animarãra purea ɓasia idjaɓa trʉ̃ zocãrã Ãcõrẽ biẽ́ jara ɓʉda idji cacuaɗe ɓʉ́ eroɓasia. Maʉ̃ animarãba siete boroda idjaɓa die cachuda eroɓasia.
4 Maʉ̃ wẽrãba wua pursupursua ɓʉda idjaɓa purea ɓʉda jʉ̃ ɓasia. Oroba, mõgara nẽbʉaba, neta nẽbʉa ɓʉ biɗa djio ɓasia.* Taza oro oɗada idji jʉwaɗe eroɓasia. Maʉ̃ tazara ne jũma Ãcõrẽba quĩrĩãcaba idjaɓa jũma maʉ̃ wẽrãba auɗua o ɓʉba bira ɓasia.
5 Ẽberãba cawaiẽ́ ɓʉ trʉ̃da idji dratuɗe eroɓasia. Nãwã ɓʉ́ ɓasia:
Mʉ̃ra Babilonia puru dromaa. Mʉ̃ra wẽrã auɗuarã papaa, idjaɓa ne jũma naʉ̃ ẽjũãne Ãcõrẽba quĩrĩãca papaa.
6 Acʉbʉrʉɗe mʉ̃a cawasia maʉ̃ wẽrãra Ãcõrẽ ẽberãrã oaba, Jesuɗebema jaradia panʉ carea beapeɗaɗa oaba beu chũmʉda.
Maʉ̃ wẽrã ununa carea mʉ̃a cawa crĩchaẽ́ ɓesia.
7 Maʉ̃be bajãnebema nezocaba mʉ̃́a nãwã iwiɗisia: “¿Sãwãẽrã cawa crĩchaẽ́ ɓʉ? Maʉ̃ wẽrãnebemada, idji edebʉrʉ animarã minijĩchia ɓʉɗebema siɗa mʉ̃a cawabiya. Animarã siete boro eroɓʉɗebemada, die cachu eroɓʉɗebema siɗa cawabiya.
8 Bʉa ununa animarã minijĩchia ɓʉra naẽna zocai ɓasia, iɗira neẽ́a, baribʉrʉ ewari aɓa uria dau cʉre ɓʉɗeba ẽdrʉya. Mãwãnacarea Critoba idjira ewariza biẽ́ ɓʉya. Naʉ̃ ẽjũãne ɓeaba idji unubʉdaɗe cawa crĩchaɗaẽ́ panenia. Naʉ̃ ẽjũã oi naẽna ãdjirã trʉ̃ra ewariza zocai ɓeaɗi cartaɗe ɓʉẽ́ ɓeasia.
9 Bʉa ununaba ne jara quĩrĩã ɓʉ cawai careara ne cawa ɓaida ɓʉa. Siete bororãba jara ɓʉa siete eyada. Maʉ̃ siete eya ʉ̃rʉ̃ dji wẽrã auɗuada chũmʉa.
10 Idjaɓa maʉ̃ siete bororãba jara ɓʉa ẽberãrã bororãda siete panʉda. Maʉ̃ siete bororãnebemada juesuma beusiɗaa. Aɓaʉba waɗi ẽberãrãra poya eroɓʉa. Idjaɓa aɓabemada waɗi odjaẽ́ ɓʉa. Baribʉrʉ idji zebʉrʉɗe ẽberãrã boroda ɓeimĩna dãrã ɓaẽ́a.
11 Animarã minijĩchia ɓʉ naẽna ɓaɗa iɗi neẽ́ba jara ɓʉa ẽberãrã boro dewara zeiɗebemada. Idjira maʉ̃ siete bororãnebemaa. Critoba idjira ewariza biẽ́ ɓʉya.
12 Bʉa die cachu ununaba jara ɓʉa ẽberãrã bororã die pananinebemada. Ãdjirãra waɗibiɗa ẽberãrã bororãẽ́a. Baribʉrʉ animarã minijĩchia ɓʉra ẽberãrã boroda ɓebʉrʉɗe ãdjirã siɗa ẽberãrã bororãda ɓeaɗia. Mãwãmĩna dãrãnaẽ́a.*
13 Maʉ̃ die bororãba aɓari crĩchada edaɗia. Ãdji druara animarã minijĩchia ɓʉ jʉwaeɗa ɓʉɗia.
14 Maʉ̃ne ãdjirãra Oveja Zaque ume djõnia. Baribʉrʉ Oveja Zaqueba ãdjirãra poyaya idjida jũma dji droma ɓea Boro bẽrã idjaɓa jũma bororã cãyãbara dji dromaara ɓʉ bẽrã. Poyabʉrʉɗe idji bio ĩjã panʉra idji ume panania. Ãdjirãra trʉ̃sia idjaɓa edasia.”
15 Maʉ̃be bajãnebema nezocaba mʉ̃́a nãwã jarasia: “Wẽrã auɗua chũmʉma bʉa doda zocãrã unusia. Maʉ̃ do zocãrãba jara ɓʉa puruzabemada, beɗeazabemada, druazabema siɗa.
16 Bʉa die cachu ununaba, animarã minijĩchia ɓʉ biɗa maʉ̃ wẽrã auɗua ɓʉra igaraɗapeɗa quĩrãmania. Maʉ̃ bẽrã jũma idjia eroɓʉra jãrĩnia. Aɓeɗa ãcaɗa ɓʉɗia. Ãdjirãba idji djarada coɗia idjaɓa babueɗia.
17 Ãcõrẽba maʉ̃ die bororã soɗe ɓʉsia idjia quĩrĩã ɓʉ quĩrãca oɗamãrẽã. Maʉ̃ carea aɓari crĩchada edaɗapeɗa ãdji druara animarã minijĩchia ɓʉ jʉwaeɗa ɓʉɗia aɓa Ãcõrẽba jaraɗara jũma mãwãbʉrʉɗaa.
18 Bʉa ununa wẽrã auɗuaba puru dromada jara ɓʉa. Maʉ̃ puruɗebema boroba druazabema bororãda idji jʉwaeɗa eroɓʉa.”
